Xikita nochi

Tlen kiualika

 OKSEKI TLAMACHTILMEJ

¿Moneki tiiluichiuaskej?

¿Moneki tiiluichiuaskej?

BIBLIA amo okipeualti iluimej tlen kichiuaj tlaneltokalismej noso okseki tlen mochiuaj itech nochi Tlaltikpak. Tla ijkon, ¿kanin okiskej? Tla uelis tias itech se biblioteca, uelis tikitas seki amochmej tlen tlajtoaj itech seki iluimej tlen mochiuaj kanin tejuatsin tichanti. Ma tikitakan seki neskayomej.

 Semana Santa. Maski kijtoaj kilnamikij imikilis uan iyolitilis Jesús, kichiuaj miak tlamantli tlen toTajtsin Dios amo kipaktia, ijkon ken ijkuak kinkixtiaj teotsitsintin uan kinnemitiaj. Amochtli Grandes Religiones Ilustradas okijto achto ualaskia Jesús, “sapanoa okinmaluiayaj teotsitsintin [...]. Okintlaliliayaj tlakemitl tlen sapanoa patio, noijki okintlaliliayaj koskamej, brazaletes uan anillos; okintlaliliayaj tlapechtli tlen sapanoa patio uan noijki okinkixtiaya uan okinnemitiayaj”.

Yankuik Xiuitl. Iluitl tlen mochiua itech Yankuik Xiuitl, tlatlamantli mochiua itech okseki altepemej. Se amochtli ijkon kijtoa itech kanin ouala: “Itech xiuitl 46 achto nesiskia Cristo, ueyi tekiua romano Julio César okitlali tonal 1, metstli enero, ken se tonal kanin iluichiuaskiaj Yankuik Xiuitl. Romanos okitlalijkej non tonal pampa kiiluichiuiIiskiaj Jano, iteotsin kaltlatsakuil uan akin otlapeualtiaya. Metstli enero [tlen ika latín Januarius] okitokayotijkej ken iteotsin Jano, tlen okipiaya ome ixko: se otlachixtoka tlayekapan uan okse tlakuitlapan” (The World Book Encyclopedia). Ik non, iluimej tlen mochiuaj itech Yankuik Xiuitl, amo uitsej itech Biblia.

Mikailuitl (Todos Santos). Se amochtli kijtoa: “Intonal akinmej yomikej [...] se tonal tlen okitlalijkej itech Iglesia Católica Romana pampa kinmilnamikiskej akinmej yomikej. [...] Seki tlamachtilmej kineltokaj inTonal akinmej yomikej amo kisa itech Biblia uan amo kilnamikij keman opejki kichiuaj. Ijkon panoa iuan akinmej tekitij itech intlalan tlen katej itech nochi uejueyi altepemej, kineltokaj itech yoak akinmej Yomikej ualmokuepaj kanin achto ochantiayaj uan tlakuaj iuan akinmej yoltokej” (La edición de 1910 de La Encyclopædia Britannica).

Okseki iluimej. Amo uelis titlajtoskej itech nochi iluimej tlen mochiuaj itech nochi Tlaltikpak. Ken otikitakej, Jehová amo kinselia nochi iluimej tlen kinueyichiuaj tlaltikpaktlakamej noso kalmej tlen iaxkauan tekiuajkej (Jeremías 17:5-7; Hechos 10:25, 26). Uan noijki, pampa tikmatiskej tla se iluitl kipaktia toTajtsin Dios noso amo, moneki achto tikmatiskej kanin kisa noso kanin uits (Isaías 52:11; Apocalipsis 18:4). Tlanauatilmej tlen otikitakej itech tlamachtil 16, techpaleuiaj pampa tikmatiskej ken kita toTajtsin Dios iluimej tlen amo kisaj itech Biblia.