Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

¿Tlen melauak tlamachtia Biblia?

 TLAMACHTIL 14

¿Ken uelis yolpakiskej kalchanejkej?

¿Ken uelis yolpakiskej kalchanejkej?
  • ¿Tlen moneki pampa yetos se kuali teta?

  • ¿Ken uelis kichiuas iteki siuatl akin yomonamikti?

  • ¿Tlen kijtosneki yetoskej kuali tetajmej?

  • ¿Ken uelis tlapaleuiskej konemej pampa ma yolpakikan inkalchanejkauan?

1. ¿Tlen moneki kichiuaskej kalchanejkej pampa yolpakiskej?

TOTAJTSIN JEHOVÁ kineki nochtin kalchanejkej ma yolpakikan. Ik non, itech iTlajtol Biblia techiluia tlen moneki kichiuaskej sejse tlen katej itech se kalchanejke. Ijkuak nochtin tlen katej itech kalchanejkej kichiuaj tlen Jehová kijtoa, melauak nochtin kuali katej. Ken okijto Jesús: “¡Okachi kuali yolpakilisojkeh akimeh kikakih itlajtol Dios iwa kitlakitah!” (Lucas 11:28).

2. Tla tiknekij ma yolpakikan tokalchanejkauan, ¿tlen moneki tikmatiskej?

2 Pampa tokalchanejkauan uelis yolpakiskej, moneki kuali tikajsikamatiskej Jehová ye akin okitlali kalchanejke. Pampa Jesús okijto Dios ye “Totajtsi” (Mateo 6:9). Melauak nochtin kalchanejkej katej pampa toTajtsin Dios okintlali, ik non, ye kuali kimati tlen moneki kichiuaskej kalchanejkej pampa ma yolpakikan (Efesios 3:14, 15). Ijkon ken kijtoa Biblia, ¿tlen kineki toTajtsin Dios ma kichiua sejse tlen katej itech kalchanejke?

TOTAJTSIN DIOS OKINTLALI KALCHANEJKEJ

3. ¿Ken techiluia Biblia opejki kalchanejke? ¿Uan ken tikmatij melauak ijkon opanok?

3 Jehová okinchijchi achto ome tlaltikpaktlakamej, Adán uan Eva, uan okinnamikti. Okinmakak ken inkalijtik se kuajkualtsin  xochitlali —xochitlali Edén— uan okinnauati ma kinpiakan inkoneuan. Okinmilui: “Xikinpiakan namokoneuan uan ximomiaktilikan uan xiktemitikan Tlaltikpak uan xikmaluikan” (Génesis 1:26-28; 2:18, 21-24). Nin tlapoualistli melauak opanok. Jesús okiteititi tlen kijtoa Génesis itech ken opejki kalchanejke melauak opanok (Mateo 19:4, 5). Axkan sapanoa titlajyouiaj uan amo tikatej ken toTajtsin Dios okinekiaya, maski ijkon, kalchanejkej kema uelis yolpakiskej. Ma tikitakan tleka.

4. 1) ¿Ken uelis tinochtin titlapaleuiskej pampa ma yolpakikan tokalchanejkauan? 2) Pampa tokalchanejkauan ma yolpakikan, ¿tleka moneki momachtiskej tlen okichi Jesús?

4 Tinochtin uelis tikchiuaskej tlen moneki pampa ma yolpakikan tokalchanejkauan. Pampa uelis tiyolpakiskej moneki tikchiuaskej ken toTajtsin Dios uan moneki timotlasojtlaskej (Efesios 5:1, 2). Maski ijkon, ¿ken uelis tikchiuaskej ken toTajtsin Dios tla amo tikitaj? Maski amo uelij tikitaj, uelis tikmatiskej tlen kichiua, pampa okiualtitlanki itlayekankone (Juan 1:14, 18). Ijkuak tejuan tikakij uan tikitaj tlen Jesucristo okichi uelis tikijtoskej ken tikitaskiaj Jehová pampa melauak okichi nochi ijkon ken iTajtsin (Juan 14:9). Ik non, tinochtin uelis titlapaleuiskej pampa ma yolpakikan tokalchanejkauan tla tejuan titetlasojtlaj ken Jesús uan tikchiuaj ken ye.

NESKAYOTL PAMPA TLAKAMEJ AKINMEJ YOMONAMIKTIJKEJ

5, 6. 1) ¿Tlen neskayotl okinmakak Jesús nochtin tlakamej akinmej yomonamiktijkej ijkon ken ye okichi ika itlanechikol? 2) ¿Tlen moneki tikchiuaskej pampa toTajtsin Dios ma techtlapojpolui?

5 Biblia techiluia tlakatl moneki kitas isiua ijkon ken Jesús okinmitak imachtijkauan. Xikita tlen technauatia nikan: “Tlakatl non yotimonamikti, xiktlasojtla mosiwa, ijkó kemi Cristo otechtlasojtlak tejwah non Dios okimpéjpenki iwa omotemakti para makimiktikah por tejwah [...]. Noiwa moneki n tlakatl makitlasojtla isiwa, kemi ye inewia kitlasojtla ikuerpo. Porke akin kitlasojtla isiwa, noiwa ye motlasojtla. Porke amaka kikokolia ikuerpo, yej kimalwia iwa kitlakualtia. Ijkó noiwa kichiwa Cristo inwah [itlanechikol, TNM]” (Efesios 5:23, 25-29).

 6 Pampa Jesús okintlasojtlak imachtijkauan nin se kuali neskayotl pampa nochtin tlakamej akinmej yomonamiktijkej. Maski imachtijkauan okatkaj tlajtlakolejkej, Jesús “okintlasojtlak asta n iksemi tonati”, pampa ye okinek kitemakas iyolilis inpampa (Juan 13:1; 15:13). Ik non, akinmej yomonamiktijkej kinmiluia “xiktlasojtlakah nomosiwa iwa amo san xikinmajwatokah” (Colosenses 3:19). ¿Tlen kipaleuis se tlakatl pampa kitlakamatis nin tlanauatil uan okachi ijkuak isiua amo kichiua ken moneki? Moneki kilnamikis ye noijki tlajtlakole uan pampa toTajtsin Dios kitlapojpoluis moneki itlaj kichiuas. ¿Tlen moneki kichiuas? Achto moneki kintlapojpoluis akinmej kichiuiliaj itlaj tlen amo kuali, uan nin kijtosneki noijki isiua. Kema, siuatl noijki moneki ijkon kichiuas (xiktlajtolti Mateo 6:12, 14, 15). Ik non, itech se kuali namiktilistli moneki motlapojpoluiskej tlakatl uan siuatl.

7. ¿Tlen okajsikamatiaya Jesús, uan tleka se kuali neskayotl pampa tlakamej?

7 Tlakamej noijki moneki kitaskej ken Jesús okinmajsikamatiaya imachtijkauan. Ye kuali okimatiaya tlen ueliskia kichiuaskej uan tlen okinekiayaj. Se neskayotl, ijkuak yejuan melauak osotlauatokaj okinmilui: “Xiwikih, matimosewitih kan amaka nemi” (Marcos 6:30-32). Tlakatl noijki ijkon moneki kitas isiua. Biblia kijtoa siuamej “amo chikawakeh”, ik non, kinauatia tlakatl ma kitlakaita isiua. ¿Tleka? Pampa ye uan isiua kiseliskej “nemilistli” (1 Pedro 3:7). Tlakatl akin yomonamikti moneki kilnamikis toTajtsin Dios kinpatioita tlakamej uan siuamej pampa yolmelauakej (Salmo 101:6).

8. 1) ¿Tleka uelis moijtos tlakatl “akin kitlasojtla isiwa, noiwa ye motlasojtla”? 2) ¿Tlen kijtosneki tlakatl uan isiua axkan “ayakmó ome, yej sanwel se”?

8 Itech Biblia kijtoa tlakatl “akin kitlasojtla isiwa, noiwa ye motlasojtla”. Pampa Jesús okijto “yejwah ayakmó ome, yej sanwel se” (Mateo 19:6). Ik non, akinmej yomonamiktijkej moneki kinekiskej motekaskej san iuan inamik (Proverbios 5:15-21; Hebreos 13:4). Pampa uelis kichiuaskej amo moneki motekipachos san itech ye, noijki itech inamik (1 Corintios 7:3-5). Miak ipati tlen moijtoa itech Biblia “amaka kikokolia ikuerpo, yej kimalwia  iwa kitlakualtia”. Tlakatl moneki kitlasojtlas isiua ijkon ken ye motlasojtla, uan noijki moneki kilnamikis Jesucristo kiyekana uan kitlajtlanilis tlen okichi (Efesios 5:29; 1 Corintios 11:3).

9. ¿Tlen iyelis Jesús moijtoa itech Filipenses 1:8? ¿Tleka tlakatl akin yomonamikti moneki kitlasojtlas isiua?

9 Tlatitlanil Pablo okijto “tlasojtlalistle katlej Jesucristo nechmaka” (Filipenses 1:8). Tlasojtlalistli tlen Jesús okiteititi okichi oksekimej kuali ma momachilikan. Siuamej akinmej okatkaj imachtijkauan Jesús kuali omomachiliayaj iuan, pampa ye kuali okinchiuiliaya (Juan 20:1, 11-13, 16). Noijki ijkon, siuamej akinmej yomonamiktijkej kichiaj innamik noijki ma kintlasojtlakan uan ma kinchiuilikan tlen kuali.

NESKAYOTL PAMPA SIUAMEJ AKINMEJ YOMONAMIKTIJKEJ

10. ¿Tlen kuali neskayotl kinmaka Jesús nochtin siuamej akinmej yomonamiktijkej?

10 Ken nochtin, noijki kalchanejkej moneki ikaj ma kinyekana pampa kuali ma yetokan. Noijki Jesús kipia ikaj akin kiyekana uan ye kitlakamati. “Dios kinawatia Cristo”, ijkon ken “teokich ye akin kiyakana isiwa” (1 Corintios 11:3). Jesús nochipa kitlakamati tlen kiluia toTajtsin Dios. Nin se kuali neskayotl pampa tinochtin tikpiaj ikaj akin techyekana uan tlen moneki tiktlakamatiskej.

11. ¿Ken moneki kitas siuatl inamik, uan tlen panos tla ijkon kichiua?

11 Pampa titlajtlakolejkej, ualeua tlakamej akinmej yomonamiktijkej kichiuaj itlaj tlen amo kuali uan amo kuali kinyekanaj ikalchanejkauan. ¿Tlen moneki kichiuas siuatl ijkuak kitas amo kuali kichiua inamik? Amo kinekis kinyekanas ikalchanejkauan nion amo kijtos tlen amo kuali itech inamik. Moneki kilnamikis toTajtsin Dios kipatioita akin amo san niman kualani uan kimati mochia (1 Pedro 3:4). Tla ijkon kichiua, amo okachi oui kitlakaitas inamik ijkon ken kijtoa Jehová, noijki ijkuak okachi oui. Noijki itech Biblia kijtoa: “Tesiwa noiwa makitlakita iokich” (Efesios 5:33). Maski ijkon, ¿tla inamik amo kiselia Cristo ken akin kiyekana? Biblia kinmiluia siuamej akinmej yomonamiktijkej: “Xiktlakitakah nomookich. Ijkó,  non amo tlaneltokakeh, tlaneltokaskeh ijkuak nomechitaskeh kenijki nontetlakitah, iwa mach ok monekis xiktetlapowikah itlajtol Dios. Porke yejwah kitaskeh kenomi nonmoyekuikah iwa nonmotlakitah” (1 Pedro 3:1, 2).

12. ¿Uelis siuatl kiluis inamik tlen mokuayejyekoa?

12 Ualeua siuatl uelis amo mokuayejyekos ijkon ken inamik, maski tlaneltoka itech Jesús noso amo. Maski ijkon, tla ika tlasojtlalistli kiluia tlen mokuayejyekoa, amo kijtosneki amo kitlakaita. Tlen kijtoa uelis yetos melauak uan nochtin ikalchanejkauan mopaleuiskej tla tlakatl kikaki. Itech Biblia techiluia Sara okilui inamik, Abrahán, ken uelis kiyektlaliskia se ouijkayotl tlen okipiayaj itech inkalijtik. Maski Abrahán amo okipakti tlen okilui Sara, toTajtsin Dios okilui: “Xikaki” (xiktlajtolti Génesis 21:9-12). Maski ijkon, ijkuak tlakatl kipejpena kichiuas itlaj tlen amo kixnamiki nion se itlanauatil toTajtsin Dios, siuatl kiselia tlen inamik kipejpena uan kipaleuia (Hechos 5:29; Efesios 5:24).

¿Tleka Sara se kuali neskayotl pampa siuamej?

13. 1) Ijkon ken kijtoa Tito 2:4, 5, ¿tlen moneki kichiuaskej siuamej akinmej yomonamiktijkej? 2) ¿Tlen kijtoa Biblia ijkuak moxeloaj noso mokajkauaj ixpan tekiuajkej?

13 Tlen kichiua siuatl miak ipati pampa ikalchanejkauan kuali ma yetokan. Se neskayotl, Biblia kinmiluia siuamej akinmej yomonamiktijkej “moneki kintlasojtlaskeh inmokich iwa impilwah. Noiwa makipiakah kuali intlalnamikilis, mayetokah yolchipawakeh, ma [kimaluikan] incha, mayetokah kualteh n siwameh iwa makintlakitakah inmokich” (Tito 2:4, 5). Tla ijkon kichiua siuatl akin yomonamikti uan kipia ikoneuan, nochtin ikalchanejkauan kitlasojtlaskej uan kitlakaitaskej (xiktlajtolti Proverbios 31:10, 28). Maski ijkon, nochtin akinmej yomonamiktijkej noijki tlajtlakolejkej. Ik non, ualeua sekimej moxeloaj noso mokajkauaj ixpan tekiuajkej pampa itlaj ouijkayotl kipiaj. ITlajtol toTajtsin Dios kijtoa uelis moxeloskej tla panoa seki tlamantli. Maski ijkon, amo ikaj moneki san mauiltis ika nin tlamantli pampa Biblia techyekiluia: “N tesiwa amo makikajkawa iokich. [...] Iwa n teokich amo makikajkawa isiwa” (1 Corintios 7:10, 11). Noijki, itech Biblia kijtoa san uelis mokajkauaskej ixpan tekiuajkej tla tlakatl noso siuatl auilnemi, kijtosneki tla momekatia (Mateo 19:9).

 SE KUALI NESKAYOTL PAMPA TETAJMEJ

14. ¿Ken okinmitaya Jesús konemej, uan tlen kinekij yejuan ma kichiuakan intatajuan?

14 Jesús okinmachti tetajmej tlen moneki kinchiuiliskej inkoneuan. Ijkuak sekimej tlaltikpaktlakamej amo okinekiayaj konemej ma motokikan itech Jesús, ye okinmilui: “Xikinkawilikah n pípilteh mawikih nonawak, iwa amo xikintsakuilikah”. Biblia techiluia satepan “Jesús okinmonapaloltiaya n pípilteh iwa okintiochiwaya ijkuak okintlaliliaya imawah impah” (Marcos 10:13-16). Pampa Jesús okixelo kauitl pampa yetos iuan konemej, ¿amo tikneltoka non tlen moneki tikchiuas iuan mokoneuan? Yejuan kinekij xiyeto inmiuan miak kauitl, amo san seki kauitl. Moneki tikxelos kauitl pampa tikinmachtis, pampa non tlen Jehová tlanauatia ma kichiuakan tetajmej (xiktlajtolti Deuteronomio 6:4-9).

15. ¿Tlen uelis kichiuaskej tetajmej pampa kinmaluiskej inkoneuan?

15 Axkan itech ninmej tonalmej okachi mochijtok tlen amo kuali. Ik non, konemej kinekij intatajuan ma kinmaluikan itech akinmej kinekij kinchiuiliskej tlen amo kuali, ken neskayotl, itech akinmej kinekij inmiuan motekaskej. Jesús okinmalui imachtijkauan, uan noijki okinnotski “nopilwah”. Ijkuak okikitskijkej, seki kauitl achto kimiktiskiaj, okitemo  ken uelis yejuan choloskiaj (Juan 13:33; 18:7-9). Tla tejuatsin titeta, xikinmalui mokoneuan itech nochi tlamantli amo kuali tlen Diablo kineki kinchiuilis. Noijki xikinmilui ma momaluikan itech tlamantli tlen amo kuali (1 Pedro 5:8). * Axkan itech ninmej tonalmej onka miak tlamantli tlen uelis kichiuas konemej ma moijtlakokan itech intlalnakayo, ma moxelokan itech toTajtsin Dios uan amo ma kipiakan chipauak inkuayejyekol.

¿Tlen uelis momachtiskej tetajmej itech ken Jesús okinmitaya konemej?

16. ¿Tlen uelis momachtiskej tetajmej itech tlen okichiuaya Jesús ijkuak imachtijkauan okichiuayaj itlaj amo kuali?

16 Itech yoak ijkuak kimiktiskiaj Jesús, imachtijkauan omokualanijkej  itech akin okachi okipiaya ipati. Jesús amo okualanki inmiuan, okachi kuali ika miak tlasojtlalistli okinmachti ika ineskayo (Lucas 22:24-27; Juan 13:3-8). Tla tejuatsin tikinpia mokoneuan, ¿ken uelis tikchiuas ken Jesús ijkuak tikinnojnotsas? Melauak moneki tikinnojnotsas, maski ijkon, moneki tikchiuas ijkon ken moneki uan amo sapanoa tikualanis. Achto tikijtos itlaj, kuali ximokuayejyeko pampa motlajtoluan amo ma ‘kintsopitikan ken se espada’ (Jeremías 30:11; Proverbios 12:18). Moneki tiknojnotsas pampa konetl ma kajsikamati non tlen okachi kipaleuis (Efesios 6:4; Hebreos 12:9-11).

SE NESKAYOTL PAMPA KONEMEJ

17. ¿Tleka Jesús se kuali neskayotl pampa konemej?

17 Konemej, ¿uelis itlaj momachtiskej itech Jesús? Kema. Ye okinmachti konemej, ika ineskayo, ken moneki kintlakamatiskej intatajuan. Okijto: “Ne sanwel nikijtoa tlan Notajtsi Dios onechmachti [...], porke nochipa nikchiwa tlan Ye kipaktia” (Juan 8:28, 29). Ijkon ken Jesús okitlakamatki iTajtsin tlen kajki iluikak, noijki konemej moneki kintlakamatiskej intatajuan. Noijki Biblia kinnauatia ijkon ma kichiuakan (xiktlajtolti Efesios 6:1-3). Maski Jesús amo okipiaya tlajtlakoli, nochipa okintlakamatki itatajuan José uan María maski tlajtlakolejkej. Melauak non otlapaleui pampa nochtin ikalchanejkauan ma yolpakikan (Lucas 2:4, 5, 51, 52).

18. Xikijto tleka Jesús nochipa okitlakamatki iTajtsin Jehová, uan akinmej yolpakij ijkuak konemej kintlakamatij intatajuan.

18 ¿Ken uelis konemej okachi kichiuaskej ken Jesús uan ijkon kinyolpaktiskej intatajuan? Moneki kintlakamatiskej intatajuan. Maski ualeua oui, toTajtsin Dios non tlen kineki ma kichiuakan (Proverbios 1:8; 6:20). Jesús nochipa okitlakamatki iTajtsin Jehová, maski okipanok miak tlamantli tlen oui. Ijkuak oajsik tonal pampa kichiuaskia itlaj melauak oui tlen iTajtsin okilui ma kichiua, okilui: “Techachiwili nin tlaijyowílistli”. Kijtosneki okitlajtlanili ma kimakixti itech tlen omonekiaya kichiuas. Maski ijkon, ye okichi itlanekilis iTajtsin, pampa ye okajsikamatiaya non tlen iTajtsin okimatiaya okachi kuali okatka (Lucas 22:42). Konemej tlen tetlakamatij kinyolpaktiaj  intatajuan uan noijki Jehová, intajtsin tlen kajki iluikak (Proverbios 23:22-25). *

¿Itech tlen moneki mokuayejyekoskej telpokamej uan ichpokamej ijkuak kinyejyekoskej?

19. 1) Satanás, ¿ken kinyejyekoa telpokamej? 2) ¿Tlen kimachiliaj tetajmej ijkuak konemej kichiuaj itlaj tlen amo kuali?

19 Diablo okiyejyeko Jesús, uan noijki tikmatij ye kinyejyekos nochtin telpokamej pampa ma kichiuakan tlen amo kuali (Mateo 4:1-10). Se neskayotl, uelis kichiuas oksekimej telpokamej ma kinyejyekokan, pampa ye kimati melauak oui kixikoskej non. Ik non, miak ipati nochtin telpokamej ma mochijchikauakan pampa amo mouikaskej iuan akinmej kichiuaj tlen amo kuali (1 Corintios 15:33). Ma tikitakan ineskayo Dina ichpoch Jacob: ye omouikaya iuan akinmej amo okiueyichiuayaj Jehová, uan non okichi melauak ma tlajyoui (Génesis 34:1, 2). Telpochtli uan ichpochtli, ¿yotimokuayejyeko ken tlajyouiaj kalchanejkej ijkuak ikaj kichiua itlaj tlen amo kuali ken auilnemilistli? (Proverbios 17:21, 25.)

TLEN MONEKI PAMPA KALCHANEJKEJ MA YOLPAKIKAN

20. ¿Tlen moneki kichiuaskej sejse pampa inkalchanejkauan ma yolpakikan?

20 Ijkuak panos se ouijkayotl itech kalchanejkej, okachi amo oui moyektlalis tla tikchiuaj tlen kijtoa Biblia. Ken yotimomachtijkej, tla tikchiuaj tlen ompa moijtoa tokalchanejkauan uelis yolpakiskej. Ik non, tlakatl akin yomonamikti moneki kitlasojtlas  isiua uan ma kita ijkon ken Jesús okitak itlanechikol. Siuatl akin yomonamikti moneki kitlakaitas inamik uan ma kichiua ken siuatl tlen moijtoa itech Proverbios 31:10-31. Tetajmej, xikinmachtikan nanmokoneuan (Proverbios 22:6). Tlakatl akin tlayekanaj itech inkalijtik, “makimati kenijki tlanawatis itech icha” (1 Timoteo 3:4, 5; 5:8). Saiktlami, konemej, xikintlakamatikan nanmotatajuan (Colosenses 3:20). Nochtin tlen katej itech se kalchanejke tlajtlakolejkej. Ik non, ma tiyetokan tiyolyamankej uan ma tikintlajtlanilikan oksekimej ma techtlapojpoluikan.

21. ¿Tlen tlamantli kualtsin tikchiaj, uan ken uelis kalchanejkej yolpakiskej axkan?

21 Kema, itech Biblia tikajsis miakej tlamachtilmej tlen miak ipati pampa kalchanejkej ma yolpakikan. Noijki techtlapouia itech yankuik tlali tlen toTajtsin Dios techmakas uan itech Xochitlali kanin nemiskej miakej itekipanojkauan toTajtsin Dios tlen yolpakij (Apocalipsis 21:3, 4). ¡Melauak kualtsin yetos! Maski ijkon, noijki axkan itech ninmej tonalmej uelis nochtin kalchanejkej yolpakiskej, tla kichiuaj nochi tlen toTajtsin Dios techiluia itech iTlajtol, Biblia.

^ párr. 15 Itech tlamachtil 32 itech amochtli Aprendamos del Gran Maestro, tlen kichijchiuaj iTlaixpantijkauan Jehová, ompa tikajsis miak tlapaleuilistli pampa tikinmaluis mokoneuan.

^ párr. 18 Konemej amo uelis kintlakamatiskej intatajuan tla kinmiluiaj ma kichiuakan itlaj tlen toTajtsin Dios kijtoa amo ma tikchiuakan (Hechos 5:29).