Xikita nochi

Tlen kiualika

 TLAMACHTIL 1

¿Ken iyelis toTajtsin Dios?

¿Ken iyelis toTajtsin Dios?
  •  ¿Melauak motech motekipachoa toTajtsin Dios?

  • ¿Ken iyelis toTajtsin Dios? ¿Kipia itoka?

  • ¿Uelis timotokiskej itech?

1, 2. Ualeua, ¿tleka moneki ma titetlajtlanikan?

¿YOTIKITAK ken konemej miak tlamantli tetlajtlaniaj? Miakej peuaj tetlajtlaniaj ijkuak peuaj tlajtoaj. Itech inmixtololouan moita kinekij itlaj kimatiskej uan kijtoaj: “¿Kanin tlami iluikak?”, “¿tleka petlanij sitlalimej?”, “¿tleka tlakuikaj totomej?”. Maski tiknekij kuali tikinnankiliskej, ualeua amo tikmatij tlen tikinmiluiskej. Uan maski kuali tikinnankiliaj oksepa techtlajtlaniaj: “¿Uan tleka?”.

2 Amo san konemej nochipa tetlajtlaniaj. Ijkuak timoskaltiaj ok titetlajtlaniaj, pampa tikmatiskej ken tiajsitiuij kanaj, pampa amo itlaj ma techpano noso pampa itlaj tiknekij tikmatiskej. Maski ijkon, miakej ayakmo tetlajtlaniaj tlen okachi ipati. Noso ayakmo mochijchikauaj pampa kitemoskej intlanankilis.

3. ¿Tleka miakej tlaltikpaktlakamej ayakmo kitemoaj intlanankilis tlajtlanilmej tlen okachi inpati?

3 Ximokuayejyeko itech tlajtlanilistli tlen kajki ixko nin amochtli, noijki itech tlajtlanilmej tlen katej itech páginas 3, 6 uan  kanin peua nin tlamachtil. Ninmej san seki  tlajtlanilmej tlen okachi inpati tlen uelis timotlajtlaniskej. Maski ijkon, miakej tlaltikpaktlakamej ayakmo kitemoaj intlanankilis ninmej tlajtlanilmej. ¿Tleka? ¿Uelis tikajsiskej intlanankilis itech Biblia? Sekimej tlaltikpaktlakamej kijtoaj melauak oui tikajsikamatiskej tlen Biblia tlanankilia. Oksekimej amo tetlajtlaniaj pampa amo kinekij ma kinpinatikan. Uan oksekimej kijtoaj ninmej tlajtlanilmej moneki tikinkauiliskej ma kinnankilikan tlayekankej teopixkamej. ¿Tejuatsin tlen tikijtoa?

4, 5. ¿Tlen tlamantli tlen miak ipati uelis timotlajtlaniskej, uan tleka moneki ma tiktemokan intlanankilis?

4 Uelis tejuatsin tikneki tikmatis intlanankilis tlajtlanilmej tlen okachi inpati itech toyolilis. Ik non, ualeua timotlajtlania: “¿Tleka tiyoltokej? ¿San tinesij, tiueuejtij noso tikokoxkatij uan timikij? ¿Ken iyelis toTajtsin Dios?”. Kuali tikchiua tla ijkon timotlajtlania, amo ximosotlaua, ximochijchikaua pampa tikajsis tlen melauak intlanankilis. Jesucristo akin okachi kuali oTlamachtiaya, okijto: “Xiktlajtlanikah tlan nomechpoloa iwa nomechmakaskeh. Xiktemokah tlan nomechpoloa iwa nonkajsiskeh, xitenotsakah kan kaltentli iwa nomechtlatlapoliskeh” (Mateo 7:7).

5 Tla tejuatsin ‘ok tiktemojtok’ intlanankilis tlajtlanilmej tlen okachi inpati, tikitas ken ipati timochijchikauas (Proverbios 2:1-5). Maski san tlen omitsiluijkej oksekimej tlaltikpaktlakamej, onka intlanankilis uan uelis tikmatis. Katej itech Biblia uan amo oui tikajsikamatis. Tlen Biblia tlanankilia kichiua ma tiyolpakikan axkan, uan ma tikchiakan tlen kuali kanin tiyolpakiskej. Achto ma tikitakan se tlajtlanilistli tlen miakej tlaltikpaktlakamej kintekipachoa.

¿MOTEKIPACHOA TOTECH TOTAJTSIN DIOS?

6. ¿Tleka miakej tlaltikpaktlakamej mokuayejyekoaj toTajtsin Dios amo motekipachoa totech?

6 Miakej kijtoaj amo. Kijtoaj tla totech motekipachoskia,  amo ijkon tiyetoskiaj. San kanin onka guerras, tlaltikpaktlakamej mokokoliaj uan onka tlajyouilistli. Nochtin timokokoaj, titlajyouiaj uan mikij tokalchanejkauan. Ik non, sekimej kijtoaj: “Tla totech motekipachoskia toTajtsin Dios, ¿amo techpaleuiskia?”.

7. 1) ¿Tleka tikijtoaj miakej teopixkamej kichiuaj tlaltikpaktlakamej ma kineltokakan toTajtsin Dios amo motekipachoa totech? 2) ¿Tlen melauak tlamachtia Biblia itech nochi tlajyouilistli tlen panoa?

7 Uan noijki miakej tlayekankej teopixkamej kichiuaj tlaltikpaktlakamej ma kineltokakan toTajtsin Dios amo motekipachoa totech. Se neskayotl, ijkuak itlaj amo kuali tlapanoa, kijtoaj non itlanekilis toTajtsin Dios. Ijkon kitlajtlakoltiaj toTajtsin Dios pampa titlajyouiaj. Maski ijkon, ¿melauak tlen kijtoaj? ¿Tlen melauak tlamachtia Biblia? Santiago 1:13 kijtoa: “Ijkuak itla nomechyoltilana, amo xikijtokah Dios onomechtokti manomechyoltilana tlan amo kuali. Porke n amokuali amo weletis kitoktis Dios matlajtlakolchiwa, nion Dios weletis amaka kiyoltilanas matlajtlakolchiwa”. Ik non, amo itlajtlakol toTajtsin Dios nochi tlajyouilistli tlen panoa (xiktlajtolti Job 34:10-12). Kema, kitekauilia ma mochiua tlamantli tlen amo kuali, maski ijkon, se tlamantli kijtosneki ma kitekauili itlaj ma pano, uan okse tlamantli kijtosneki ma kichiua.

8, 9. 1) ¿Ika tlen neskayotl uelis tikijtos se tlamantli kijtosneki ikaj kitekauilis ma tlajyoui ikaj uan okse tlamantli kijtosneki ma kichiua? 2) ¿Tleka amo kuali ma tiktlajtlakoltikan toTajtsin Dios pampa titlajyouiaj?

8 Ximokuayejyeko itech se teta tlen ixtlamatki uan tetlasojtla tlen kipia se ikone tlen yiueyi uan ok chanti ikalijtik. Ijkuak ikone ayakmo kineki kitlakamatis uan ayakmo kineki yetos ikalijtik, itajtsin amo kitsakuilia. Nin telpochtli kichiua tlen amo kuali uan satepan tlajyouia miak. ¿Tikijtoskia teta kichiua ma tlajyoui ikone? Amo (Lucas 15:11-13). Noijki ijkon, toTajtsin Dios amo kintsakuilia tlaltikpaktlakamej pampa amo ma kichiuakan itlaj tlen amo kuali, maski ijkon, ye amo kichiua tlaltikpaktlakamej ma tlajyouikan, tlajyouiaj  pampa yejuan okimotemolijkej. Ik non, amo kuali ma kitlajtlakoltikan toTajtsin Dios pampa nochi tlajyouilistli tlen kinpanoa tlaltikpaktlakamej.

9 ToTajtsin Dios kimati tleka kinkauilia tlaltikpaktlakamej ma kichijtokan miak tlamantli tlen amo kuali. Ken akin oKichijchi nochi sapanoa ixtlamatki uan kipia sapanoa miak chikaualistli, amo moneki techiluis tleka kitekauilia itlaj ma pano. Maski ijkon, ken ye techtlasojtla, techiluia tleka. Itech tlamachtil 11 okachi tikitaskej tleka kitekauilia. Maski ijkon, kuali xikmato amo itlajtlakol titlajyouiaj. Melauak amo ijkon, pampa toTajtsin Dios kijtoa satepan ayakmo yetos tlajyouilistli (Isaías 33:2).

10. ¿Tleka tikneltokaj toTajtsin Dios kitlajtlamis nochi tlajyouilistli?

10 ToTajtsin Dios ye santo (Isaías 6:3). Nin kijtosneki ye melauak chipauak, amo kichiua tlen amo kuali. Ik non, uelis titlaneltokaskej itech, maski ijkon, itech tlaltikpaktlakamej amo uelis titlaneltokaskej pampa kichiuaj tlen amo kuali. Nion tekiua tlen okachi kuali tlanauatia amo uelis kipojpolos ouijkayotl tlen kichiuaj tlaltikpaktlakamej tlen amo yolkualmej. ToTajtsin Dios kipia sapanoa miak chikaualistli. Ye uelis kitlajtlamis nochi tlajyouilistli, uan ijkon kichiuas. Ijkuak kitlajtlamis tlen amo kuali, kitlajtlamis pampa nochipa (xiktlajtolti Salmo 37:9-11).

¿KEN MOMACHILIA TOTAJTSIN DIOS IJKUAK TITLAJYOUIAJ?

11. 1) ¿Ken kita toTajtsin Dios tlen amo kuali? 2) ¿Ken momachilia toTajtsin Dios ijkuak titlajyouiaj?

11 Ik non, ¿ken momachilia toTajtsin Dios ijkuak kita tlen panotok itech nochi Tlaltikpak uan itech nochi toyolilis? Biblia kijtoa toTajtsin Dios “kitlasojtla melajkayotl” (Salmo 37:28). Ye kita tla itlaj kuali noso amo kuali kajki, uan kikokolia nochi tlen amo kuali. Biblia kijtoa “omoyolkoko” ijkuak yiuejkika okatka miak tlamantli tlen amo kuali (Génesis 6:5, 6). Uan toTajtsin Dios amo kipatla iyelis (Malaquías 3:6).  Ok kikokolia tlen amo kuali uan ok kinmiknomati akinmej tlajyouiaj. Biblia techiluia toTajtsin Dios nochipa techmaluia (xiktlajtolti 1 Pedro 5:7).

Biblia techmachtia Jehová akin tetlasojtla oKichijchi nochi

12, 13. 1) ¿Tleka titetlasojtlaj, uan tlen kichiua nin ma tikmachilikan ijkuak tikitaj nochi tlajyouilistli tlen panotok itech nochi Tlaltikpak? 2) ¿Tleka uelis tikneltokaskej toTajtsin Dios kitlajtlamis nochi ouijkayotl?

12 ¿Tleka uelis tikneltokaskej toTajtsin Dios moyolkokoa ijkuak titlajyouiaj? Ma tikitakan okse tlamantli tlen techititis tlen kimachilia. Biblia kijtoa okichijchi tlaltikpaktlakatl ken ye tlachixtok (Génesis 1:26). Ik non, tikpiaj kuali toyelis pampa toTajtsin Dios noijki kipia. Se neskayotl, ¿timoyolkokoa ijkuak tikita ken tlajyouiaj tlaltikpaktlakamej tlen amo itlaj okichijkej? Tla tejuatsin timoyolkokoa, kuali xikmato toTajtsin Dios okachi moyolkokoa.

13 Se tlamantli tlen okachi kuali kichiua se tlaltikpaktlakatl ye tetlasojtla. Noijki itech nin otikmokixtijkej akin oKichijchi nochi, pampa Biblia kijtoa “Dios Ye n tlasojtlálistli” (1 Juan 4:8, 16). Titetlasojtlaj pampa toTajtsin Dios tetlasojtla. Tla tejuatsin uelis tikpojpoloskia nochi tlajyouilistli tlen panotok, ¿amo tikpojpoloskia? ¿Amo tikchiuaskia pampa titetlasojtla? ¡Kema! Ik non, uelis tikneltokas toTajtsin Dios kitlajtlamis nochi ouijkayotl tlen onka itech nochi Tlaltikpak. Nochi tlen yotiktlajtolti kanin peua nin amochtli, melauak mochiuas pampa toTajtsin Dios yokijto uan kichiuas. Maski ijkon, pampa tikneltokaskej nochi ninmej tlajtolmej moneki kuali ma tikixmatikan akin ijkon okijto.

 TOTAJTSIN DIOS KINEKI XIKIXMATI

Ijkuak tejuatsin tikneki ikaj ma mitsixmati, tikiluia motoka. Noijki toTajtsin Dios techiluia itoka itech Biblia

14. ¿Ken itoka toTajtsin Dios, uan tleka moneki ma tiktekitiltikan nin tokayotl?

14 Tla tikneki ikaj ma mitsixmati, ¿tlen achto tikchiua? ¿Amo melauak tikiluia motoka? Uan, ¿toTajtsin Dios kipia itoka? Miakej tlaneltokalismej kitokayotiaj “toTajtsin Dios” noso “toTeko”, maski ijkon, amo ijkon itoka. Ninmej san tlajtolmej, ken “tekiua” noso “akin tlamachtia”. Biblia kinotsa ken “toTajtsin Dios” uan “toTeko”. Maski ijkon, kijtoa toTajtsin Dios itoka: Jehová. Salmo 83:18 kijtoa: “Te, akin motoka  Jehová, san te okachi tiUeyititok ipan nochi Tlaltikpak”. Tla itech moBiblia amo ijkuilitok nin tokayotl, timitsyoleuaj xikita tleka itech tlamachtil “Itoka toTajtsin Dios: ken motekitiltia uan tlen kijtosneki”. Itoka toTajtsin Dios ijkuilitok itech tlajkuilolmej tlen yiuejkika omoijkuilojkej. Ik non, Jehová kineki xikmati ken itoka uan xiktekitilti. Uelis tikijtoskej toTajtsin Dios kitekitiltia Biblia pampa tikmatiskej akin ye.

15. ¿Tlen kijtosneki tokayotl Jehová?

15 Tokayotl Jehová, tlen toTajtsin Dios okimotlalili miak kijtosneki. Kijtosneki ye uelis kichiuas nochi tlen kijtoa uan tlen ye kineki. * Amo onka okse tokayotl ken ye kipia, pampa san ye ijkon itoka. Melauak, amo onka okse ken ye. Ma tikitakan seki tlamantli tlen kiteititiaj nin.

16, 17. ¿Tlen techmachtia itech Jehová ninmej tlajtolmej: 1) “nochi weleti tikchiwa”? 2) “Torey non nochipa yolitok”? 3) akin “oKichijchi nochi”?

 16 Ken yotikitakej Salmo 83:18 kijtoa itech Jehová: “San te okachi tiUeyititok”. Noijki san ye kipia sapanoa miak chikaualistli. Apocalipsis 15:3 kijtoa: “Saikpanoa weyi iwa kuajkualtsi nochi tlan otikchijchi, Totajtsi Dios Akin nochi weleti tikchiwa, nochi tlan tiktemachtia kuali iwa milák, tejwatsi Tirey de noch[i tlen onka]”. Ijkuak kijtoa “nochi weleti tikchiwa” kijtosneki san ye Jehová kipia chikaualistli, amo ikaj okse ijkon kipia. San ye kipia sapanoa miak chikaualistli. Itech 1 Timoteo 1:17, kijtoa Jehová ye “Torey non nochipa yolitok”. Ijkuak kijtoa “Torey non nochipa yolitok” techilnamiktia itlaj tlen san ye ueli kichiua: ye nochipa yoltok. Itech Apocalipsis 1:8 kijtoa: “Toteko Dios Akin nochi weleti kichiwa, Akin kajki okatka iwa oksepa wits”. ¿Amo techtlajtlachialtia nochi nin?

17 Onka okse tlamantli tlen kiteititia amo onka okse ken Jehová: san ye akin oKichijchi nochi. Apocalipsis 4:11 kijtoa: “Toteko Dios, sanwel Tejwatsi moaxka nweyílistli, mawistílistli iwa n weletílistli. Porke Tejwatsi otikchijchi nochi tlan onka, iwa tejwatsi otikmonekilti mayetokah, yika otikinchijchi”. Jehová okichijchi nochi tlen onka: ángeles, sitlalimej, tlakilotl tlen onka itech kuajmej, michimej tlen katej itech ueyi atl uan aueyatl, uan okseki tlamantli.

¿UELIS TIMOTOKIS ITECH JEHOVÁ?

18. ¿Tleka sekimej tlaltikpaktlakamej mokuayejyekoaj amo keman uelis motokiskej itech toTajtsin Dios, maski ijkon, tlen tlamachtia Biblia?

18 Sekimej momojtiaj ijkuak kimatij ken iyelis Jehová. Mokuayejyekoaj toTajtsin Dios sapanoa ueyititok uan amo keman uelis motokiskej itech noso kijtoaj toTajtsin Dios amo motekipachoa intech. ¿Melauak ijkon? Amo, Biblia amo ijkon tlamachtia, pampa kijtoa Jehová “Dios amo wejka kajki de tejwah tinochteh” (Hechos 17:27). Uan noijki techyoleua: “Xiwalmijkuanikah [noso ximotokikan] inawak  Dios, iwa Ye mijkuanis [noso motokis] nomonawak” (Santiago 4:8).

19. 1) ¿Ken uelis timotokiskej itech toTajtsin Dios, uan tlen tlateochiualistli tikseliskej? 2) ¿Tlen iyelis Jehová okachi mitspaktia?

19 ¿Ken uelis timotokis itech akin oKichijchi nochi? Achto, amo xikaua tikchiuas tlen axkan tikchijtok: ximomachti nochi tlen tiuelis itech toTajtsin Dios. Jesús okijto: “Tla mitsixmatiskeh sanwel Tejwatsi n de milajka Dios, iwa Cristo Jesús, Akin Tejwatsi otikwaltítlanki, kipiaskeh n yolílistli tlan ayik tlamis” (Juan 17:3). Kema, ken Biblia kijtoa tla timomachtiskej itech Jehová uan Jesús uelis tikpiaskej “yolílistli tlan ayik tlamis”. Yotimomachtijkej ken “Dios Ye n tlasojtlálistli” (1 Juan 4:8, 16). Uan noijki kipia okseki kuajkualtsitsintin iyelis. Biblia kijtoa ye “teiknomati uan kichiua tlen kuali, amo san niman kualani uan sapanoa tetlasojtla uan melauak” (Éxodo 34:6). Ye se Dios tlen ‘yolkuali uan kineki tetlapojpoluis’ (Salmo 86:5). Ye mochia (2 Pedro 3:9). Amo tekaua (Apocalipsis 15:4, TNM). Ijkuak timomachtijtias Biblia, tikitas ken Jehová yokiteititi nin kuali iyelis uan miak okseki.

20-22. 1) ¿Kijtosneki amo uelis timotokiskej itech toTajtsin Dios san pampa amo tikitaj? Xikyekijto tleka ijkon titlanankilia. 2) ¿Tlen uelis mitsiluiskej sekimej akinmej mitstlasojtlaj, maski ijkon, tlen moneki tikchiuas?

20 Tikmatij amo uelij tikitaj toTajtsin Dios, pampa ye se Espíritu (Juan 1:18; 4:24; 1 Timoteo 1:17). Maski ijkon, Biblia kijtoa ken iyelis. Ijkon ken okijto salmista, tejuatsin uelis tikitas “nochi tlen kualtsin kichiua Jehová” (Salmo 27:4; Romanos 1:20). Ijkuak okachi timomachtis itech ye, okachi tikmatis ye melauak yoltok, okachi tiktlasojtlas uan okachi tiknekis timotokis itech.

Tlasojtlalistli tlen kipia se teta kiteititia tlasojtlalistli tlen okachi ueyi: tlen techpialia toTajtsin Dios

21 Yolik tikajsikamatis tleka Biblia kijtoa ma tikitakan Jehová ken toTajtsin (Mateo 6:9). Ye amo san otechmakak toyolilis, ye kineki kuali ma tinemikan, ijkon ken se teta kineki kuali ma yetokan ikoneuan (Salmo 36:9). Biblia noijki techmachtia nochtin tlaltikpaktlakamej uelis timochiuaskej iyolikniuan  Jehová (Santiago 2:23). ¡Ximokuayejyeko: tejuatsin uelis timochiuas iyolikni akin oKichijchi nochi!

22 Ijkuak okachi timomachtis Biblia, sekimej akinmej mitstlasojtlaj, mitsiluiskej ayakmo ximomachti. Uelis ijkon kijtoskej pampa amo kinekij xikpatla motlaneltokilis. Maski ijkon, amo xikaua nin ma mitstsakuili pampa ayakmo timouikas iuan toTajtsin Dios, pampa san iuan ye akin okachi moneki timouikas.

23, 24. 1) ¿Tleka amo timomojtis titetlajtlanis itech tlen timomachtijtok? 2) ¿Tlen timomachtiskej itech okse tlamachtil?

23 Ijkuak yikin peuas timomachtis, uelis amo tikajsikamatis seki tlamachtilmej. Maski ijkon, amo ximomojti titetlajtlanis ijkuak itlaj amo tikajsikamatis. Jesús okijto moneki tiyetoskej tiyolyamankej ken se konetl (Mateo 18:2-4). Uan ken tikmatij, konemej nochipa tetlajtlaniaj. ToTajtsin Dios kineki xikajsi tlanankililmej. Biblia kuali tlajtoa itech sekimej tlaltikpaktlakamej tlen yiuejkika okatkaj tlen okinekiayaj kixmatiskej toTajtsin Dios. Ik non, kuali omomachtijkej iTlajtol toTajtsin Dios uan okitakej kox melauak okatka tlen omomachtiayaj (xiktlajtolti Hechos 17:11).

24 Kuali tikixmatiskej Jehová tla timomachtiaj Biblia, pampa amo onka okse amochtli ken nin. ¿Tleka? Timomachtiskej nin itech okse tlamachtil.

^ párr. 15 Uelis tikmatis tlen kijtosneki uan ken moijtoa itoka toTajtsin Dios itech tlamachtil “Itoka toTajtsin Dios: ken motekitiltia uan tlen kijtosneki”.