အားပေးမှုဖြစ်စေတဲ့ မေတ္တာကို ဆက်ပြနေပါ
‘မေတ္တာဟာ အားပေးမှု ဖြစ်စေတယ်။’—၁ ကော. ၈:၁။
၁။ ယေရှု မသေဆုံးခင် နောက်ဆုံးညမှာ အရေးကြီးတဲ့ ဘယ်အကြောင်းကို ဆွေးနွေးခဲ့သလဲ။
ယေရှု မသေဆုံးခင် နောက်ဆုံးညမှာ မေတ္တာအကြောင်း အကြိမ် ၃၀ နီးပါး ပြောခဲ့တယ်။ အထူးသဖြင့် “အချင်းချင်း ချစ်” ဖို့ တပည့်တွေကို တိုက်တွန်းတယ်။ (ယော. ၁၅:၁၂၊ ၁၇) အချင်းချင်းချစ်တဲ့ မေတ္တာက နောက်လိုက်စစ်တွေဖြစ်ကြောင်း သိသာထင်ရှားစေပါလိမ့်မယ်။ (ယော. ၁၃:၃၄၊ ၃၅) အဲဒီမေတ္တာဟာ ခံစားချက်သက်သက် မဟုတ်ဘဲ ကိုယ်ကျိုးစွန့်မေတ္တာ ဖြစ်တယ်။ “မိတ်ဆွေတွေအတွက် အသက်စွန့်တာထက် ပိုမွန်မြတ်တဲ့ မေတ္တာဆိုတာ မရှိဘူး။ ကျွန်တော့်ပညတ်ကို လိုက်နာမယ်ဆိုရင် ခင်ဗျားတို့ဟာ ကျွန်တော့်မိတ်ဆွေတွေပဲ” လို့ ယေရှု ပြောတယ်။—ယော. ၁၅:၁၃၊ ၁၄။
၂။ (က) ဘုရားလူမျိုးအလယ်မှာ ဘာတွေ့ရသလဲ။ (ခ) ဒီဆောင်းပါးမှာ ဘယ်မေးခွန်းတွေကို ဆွေးနွေးကြမလဲ။
၂ ဘုရားသခင့် ကျေးကျွန်တွေရဲ့ စစ်မှန်တဲ့ ကိုယ်ကျိုးစွန့်မေတ္တာနဲ့ စည်းလုံးမှုက ဘုရားလူမျိုးဖြစ်ကြောင်း ခွဲခြားဖော်ပြတယ်။ (၁ ယော. ၃:၁၀၊ ၁၁) ဘယ်လူမျိုး၊ ဘာသာစကား၊ နောက်ခံပဲဖြစ်ဖြစ် ယေဟောဝါရဲ့ လူမျိုးအလယ်မှာ ခရစ်တော်လို မေတ္တာမျိုး ရှိနေတာ ကျေးဇူးတင်စရာပါပဲ။ ‘အထူးသဖြင့် ဒီနေ့ခေတ်မှာ မေတ္တာရှိဖို့ ဘာကြောင့် လိုသလဲ။ ယေဟောဝါနဲ့ ယေရှုက မေတ္တာနဲ့ ဘယ်လို အားပေးသလဲ။ ခရစ်တော်လိုပဲ “အားပေးမှုဖြစ်စေ” တဲ့မေတ္တာ ဘယ်လို ပြနိုင်သလဲ’ လို့ သင် တွေးမိနိုင်တယ်။—၁ ကော. ၈:၁။
အခုအချိန်မှာ မေတ္တာရှိဖို့ ဘာကြောင့် လိုအပ်
၃။ “နောက်ဆုံးကာလ” က လူတွေအပေါ် ဘယ်လို သက်ရောက်မှု ရှိသလဲ။
၃ ဒီ “နောက်ဆုံးကာလ” မှာ ဘဝဟာ “ဒုက္ခတွေ၊ ဝမ်းနည်းစရာတွေနဲ့ပဲ ပြည့်နေ” တဲ့အတွက် လူတွေ စိတ်သောကအမျိုးမျိုး ခံစားနေရတယ်။ (ဆာ. ၉၀:၁၀။ ၂ တိ. ၃:၁-၅) နှစ်တိုင်း လူပေါင်း ၈၀၀,၀၀၀ ကျော် ကိုယ့်ကိုယ်ကိုယ် သတ်သေကြတယ်။ စက္ကန့် ၄၀ မှာ တစ်ယောက်နှုန်းပါပဲ။ ခရစ်ယာန်တချို့တောင် ဖိစီးမှုတွေကြောင့် ကိုယ့်ကိုယ်ကိုယ် သတ်သေကြတာ ဝမ်းနည်းစရာပဲ။
၄။ ကျမ်းစာခေတ်တုန်းက ဘယ်သူတွေ သေဆုံးချင်ခဲ့ကြသလဲ။
၄ ကျမ်းစာခေတ်တုန်းက ဘုရားသခင့် သစ္စာရှိကျေးကျွန်တချို့လည်း စိတ်ဖိစီးမှုကြောင့် သေဆုံးချင်ခဲ့ကြတယ်။ ဥပမာ၊ ယောဘက “အသက်ရှင်ရတာကို ရွံမုန်းလှပြီ။ ဆက်အသက် မရှင်ချင်တော့ဘူး” လို့ ညည်းတယ်။ (ယောဘ ၇:၁၆။ ၁၄:၁၃) ယောနက စိတ်ဓာတ်ကျတဲ့အတွက် “ယေဟောဝါဘုရား၊ အခု ကျွန်တော့်အသက်ကို နုတ်ယူလိုက်ပါတော့။ အသက်ရှင်နေရတာထက် သေသွားတာကမှ ပိုကောင်းဦးမယ်” လို့ ပြောတယ်။ (ယောန ၄:၃) တစ်ကြိမ်မှာ သစ္စာရှိပရောဖက် ဧလိယကလည်း “ယေဟောဝါဘုရား၊ ကျွန်တော့်အသက်ကို ရုပ်သိမ်းလိုက်ပါတော့။ ကျွန်တော် အသက်မရှင်ချင်တော့လို့ပါ” လို့ ပြောတယ်။ (၁ ဘု. ၁၉:၄) ယေဟောဝါက သူတို့ကို တန်ဖိုးထားပြီး ဆက်အသက်ရှင်စေချင်တယ်။ သူတို့ရဲ့ခံစားချက်ကို အပြစ်တင်မယ့်အစား သေချင်စိတ်ကို အနိုင်ယူဖို့ ကူညီပေးတယ်။ သစ္စာရှိရှိ ဆက်အမှုဆောင်နိုင်ဖို့ မေတ္တာနဲ့ အားပေးတယ်။
၅။ အထူးသဖြင့် အခုအချိန်မှာ ညီအစ်ကို/မတွေ ဘာကြောင့် မေတ္တာ လိုနေသလဲ။
၅ ညီအစ်ကို/မတွေဟာ လက်လျှော့လိုက်တဲ့အထိ မဖြစ်ရင်တောင် ဖိစီးမှုများတဲ့ အခြေအနေတွေကြောင့် မေတ္တာပါပါ အားပေးဖို့ လိုနေတယ်။ တချို့က နှိပ်စက်ညှဉ်းပန်းမှု၊ ကဲ့ရဲ့လှောင်ပြောင်မှု ကြုံနေရတယ်။ တချို့က အလုပ်မှာ ပြစ်တင်ဝေဖန်ခံနေရတယ်။ အချိန်ပို ဆင်းရလို့၊ အချိန်မီပြီးရမယ့် အလုပ်တွေ များလွန်းလို့ ပင်ပန်းနွမ်းနယ်နေကြတယ်။ တချို့က အိမ်ထောင်ရေး ပြဿနာ၊ မယုံကြည်သူ အိမ်ထောင်ဖက်ရဲ့ ဆန့်ကျင်မှုကြောင့် စိတ်ပန်းလူပန်း ဖြစ်နေကြတယ်။ သူတို့ ရှေ့ဆက်နိုင်ဖို့ ဘယ်သူ ကူညီပေးမလဲ။
ယေဟောဝါက မေတ္တာနဲ့ အားပေး
၆။ ယေဟောဝါက ကျေးကျွန်တွေကို မေတ္တာနဲ့ ဘယ်လိုအားပေး သလဲ။
၆ ယေဟောဝါက မိမိကျေးကျွန်တွေကို အမြဲချစ်မယ်လို့ ကတိပေးပြီး အားပေးတယ်။ “မင်းဟာ ငါ့အတွက် တန်ဖိုးရှိတယ်။ ဒါကြောင့် မင်းကို ဂုဏ်တင်ခဲ့တယ်၊ ချစ်ခဲ့တယ်။ . . . မကြောက်နဲ့။ မင်းနဲ့အတူ ငါရှိတယ်” ဆိုတဲ့ ယေဟောဝါရဲ့ စကားက သစ္စာရှိ အစ္စရေးတွေကို အတော်အားရှိစေမှာပဲ။ (ဟေရှာ. ၄၃:၄၊ ၅) ယေဟောဝါရဲ့ ကျေးကျွန်တစ်ယောက်အနေနဲ့ သင်လည်း ဘုရားမေတ္တာကို စိတ်ချနိုင်တယ်။ * ‘တန်ခိုးကြီးတဲ့အရှင်က မင်းကို ကယ်တင်လိမ့်မယ်။ မင်းကြောင့် အကြီးအကျယ် အားရရွှင်လန်းလိမ့်မယ်’ လို့ ကျမ်းစာမှာ ကတိပေးတယ်။—ဇေ. ၃:၁၆၊ ၁၇။
၇။ ယေဟောဝါရဲ့ မေတ္တာဟာ မိခင်မေတ္တာနဲ့ ဘယ်လို ဆင်တူသလဲ။ (ဆောင်းပါးအစမှာပါတဲ့ ပုံကို ကြည့်ပါ။)
ဟေရှာ. ၆၆:၁၂၊ ၁၃) ကလေးကို မိခင် ချီပိုက်ပြီး ဒူးပေါ် ချော့မြှူတဲ့ မြင်ကွင်းဟာ စိတ်ကြည်နူးစရာပါပဲ။ ဒီနည်းနဲ့ စစ်မှန်တဲ့ ဝတ်ပြုသူတွေအပေါ် ဘုရားသခင်ရဲ့ အကြင်နာမေတ္တာကြီးမားပုံကို ပုံဖော်ထားတယ်။ သင်ဟာ ယေဟောဝါအတွက် တန်ဖိုးရှိတယ်ဆိုတာ စိတ်ချပါ။—ယေ. ၃၁:၃။
၇ မိမိလူတွေ ဘယ်လို စမ်းသပ်မှုပဲ ကြုံနေပါစေ အားပေးနှစ်သိမ့်မယ်လို့ ယေဟောဝါ ကတိပေးတယ်– ‘မင်းတို့ ချီပိုက်ခံရလိမ့်မယ်။ ဒူးပေါ်မှာ ခုန်ဆွနေလိမ့်မယ်။ မိခင်က သားကို နှစ်သိမ့်ပေးသလို ငါကလည်း မင်းတို့ကို နှစ်သိမ့်ပေးမယ်။’ (၈၊ ၉။ ယေရှုရဲ့ မေတ္တာက ဘယ်လို ခွန်အားပေးနိုင်သလဲ။
၈ ဘုရားသခင့်မေတ္တာကို သိရတဲ့ နောက်အကြောင်းရင်း ရှိတယ်– “ဘုရားသခင်က လူ့လောကကို အလွန်ချစ်တယ်။ ဒါကြောင့် မိမိရဲ့သားကို ယုံကြည်သက်ဝင်သူတိုင်း ဖျက်ဆီးမခံရဘဲ ထာဝရအသက်ရနိုင်ဖို့ အဲဒီတစ်ဦးတည်းသော သားကိုတောင် ပေးအပ်ခဲ့တယ်။” (ယော. ၃:၁၆) ယေရှုလည်း အသက်ပေးတဲ့အထိ ကျွန်တော်တို့ကို ချစ်တယ်။ အလွန်အားရှိစရာပါပဲ။ “ဒုက္ခရောက်ခြင်း၊ စိတ်ဆင်းရဲခြင်း” ကတောင် ‘ခရစ်တော်ရဲ့ မေတ္တာကို မခံစားရအောင် မတားဆီးနိုင်’ ဘူးလို့ ကျမ်းစာမှာ ကတိပြုထားတယ်။—ရော. ၈:၃၅၊ ၃၈၊ ၃၉။
၉ စိတ်ပန်းလူပန်းဖြစ်ပြီး ဘုရားရေးရာဘက် ချုံးချုံးကျစေတဲ့ စမ်းသပ်မှုတွေနဲ့ လုံးပန်းနေရချိန်မှာ ခရစ်တော်ရဲ့ မေတ္တာက ခံနိုင်ရည်ရှိဖို့ ခွန်အားပေးတယ်။ (၂ ကောရိန္သု ၅:၁၄၊ ၁၅ ကိုဖတ်ပါ။) ယေရှုရဲ့ မေတ္တာက သဘာဝဘေး၊ နှိပ်စက်ညှဉ်းပန်းမှု၊ စိတ်ဓာတ်ကျမှု၊ စိုးရိမ်ပူပန်မှုစတဲ့ ပြဿနာတွေ ရင်ဆိုင်ရချိန်မှာတောင် အရှုံးမပေးဖို့ ခွန်အားပေးတယ်။
ကျွန်တော်တို့ရဲ့ မေတ္တာကို ညီအစ်ကိုတွေ လိုအပ်
၁၀၊ ၁၁။ စိတ်ဓာတ်ကျနေသူတွေကို အားပေးဖို့ ဘယ်သူတွေမှာ တာဝန်ရှိသလဲ။ ရှင်းပြပါ။
၁၀ ယေဟောဝါ မေတ္တာနဲ့ အားပေးတဲ့ နည်းတစ်နည်းကတော့ ခရစ်ယာန်အသင်းတော်အားဖြင့်ပါပဲ။ ညီအစ်ကို/မတွေကို ချစ်ခြင်း၊ ဘုရားရေးရာပိုင်းသာမက စိတ်ပိုင်းကိုပါ အားပေးခြင်းအားဖြင့် ဘုရားမေတ္တာကို တုပနိုင်တယ်။ (၁ ယော. ၄:၁၉-၂၁) “အခုလိုပဲ အချင်းချင်း ဆက်ပြီး နှစ်သိမ့်အားပေးနေကြပါ” လို့ ခရစ်ယာန်တွေကို တမန်တော်ပေါလု တိုက်တွန်းတယ်။ (၁ သက်. ၅:၁၁) အကြီးအကဲတွေသာ မဟုတ်ဘဲ ညီအစ်ကို/မအားလုံး အချင်းချင်း နှစ်သိမ့်အားပေးခြင်းအားဖြင့် ယေဟောဝါနဲ့ ယေရှုကို တုပနိုင်တယ်။—ရောမ ၁၅:၁၊ ၂ ကိုဖတ်ပါ။
၁၁ အသင်းတော်မှာ စိတ်ပိုင်း မကျန်းမာသူတချို့ ဆေးကုဖို့ လိုအပ်နိုင်တယ်။ (လု. ၅:၃၁) အကြီးအကဲတွေနဲ့ တခြားသူတွေဟာ ကျွမ်းကျင်တဲ့ စိတ်ရောဂါကု ဆရာဝန်တွေ မဟုတ်ကြဘူး။ ဒါပေမဲ့ “စိတ်ဓာတ်ကျနေသူတွေကို ကြင်ကြင်နာနာ ပြောဖို့၊ အားနည်းသူတွေကို ထောက်မဖို့၊ လူတိုင်းကို စိတ်ရှည်ဖို့” လိုတယ်။ (၁ သက်. ၅:၁၄) ခရစ်ယာန်အားလုံးဟာ စိတ်ဓာတ်ကျနေသူတွေကို စာနာမှုပြခြင်း၊ စိတ်ရှည်ခြင်း၊ ကြင်ကြင်နာနာ ပြောခြင်းအားဖြင့် အားပေးဖို့ လိုတယ်။ သင်ဟာ နှစ်သိမ့်အားပေးတတ်သူလား။ အားပေးတဲ့အခါ ပိုထိရောက်ဖို့ ဘာလုပ်နိုင်သလဲ။
၁၂။ အသင်းတော်ရဲ့ မေတ္တာပြမှုကြောင့် အားရှိသွားသူတစ်ဦးအကြောင်း ပြောပြပါ။
၁၂ စိတ်ဝေဒနာ ခံစားနေရသူတွေကို မေတ္တာနဲ့ ဘယ်လို အားပေးနိုင်သလဲ။ ဥရောပမှာရှိတဲ့ ညီအစ်မတစ်ယောက်က “ကိုယ့်ကိုယ်ကိုယ် သတ်သေဖို့ တစ်ခါတလေ တွေးမိတယ်။ ဒါပေမဲ့ အထောက်အမကောင်းတွေ ရထားတယ်။ အသင်းတော်က ညီအစ်ကို/မတွေ အမြဲအားပေးပြီး မေတ္တာပြကြတယ်။ ကျွန်မမှာ စိတ်ကျရောဂါ ရှိတာကို လူနည်းနည်းပဲ သိပေမဲ့ အသင်းတော်တစ်ခုလုံးက ဂရုစိုက်ကြတယ်။ မောင်နှံတစ်စုံဆိုရင် မိဘတွေလိုပဲ။ ကျွန်မအတွက် တစ်ရက်ကို ၂၄ နာရီ အသင့်ရှိနေကြတယ်” လို့ပြောတယ်။ လူတိုင်း တစ်ပုံစံတည်း ထောက်မနိုင်မှာတော့ မဟုတ်ဘူး။ ဒါပေမဲ့ စိတ်ရင်းမှန်နဲ့ ကူညီပေးတာက စိတ်ဝေဒနာ ခံစားနေရသူတွေအတွက် အများကြီး အထောက်အကူ ဖြစ်စေပါတယ်။ *
တခြားသူတွေကို မေတ္တာနဲ့ အားပေးနိုင်ပုံ
၁၃။ တခြားသူတွေကို အားပေးနိုင်ဖို့ ဘာလုပ်ရမလဲ။
၁၃ ကောင်းစွာ နားထောင်ပေးပါ။ (ယာ. ၁:၁၉) စာနာမှုရှိရှိ နားထောင်ပေးခြင်းဟာ မေတ္တာပြခြင်းဖြစ်တယ်။ စိတ်ဓာတ်ကျနေသူရဲ့ ခံစားချက်ကို နားလည်နိုင်ဖို့ လိမ္မာပါးနပ်စွာ မေးခွန်းမေးနိုင်တယ်။ ဒါမှ သူ့ကို ကိုယ်ချင်းစာပြီး အားပေးနိုင်မယ်။ သင့်မျက်နှာအမူအရာမှာ စိတ်ရင်းမှန်နဲ့ စိုးရိမ်ကြောင်း ပေါ်လွင်နေသင့်တယ်။ စိတ်ရှည်ပါ။ ကြားဖြတ်မပြောပါနဲ့။ စိတ်ရှည်စွာ နားထောင်ပေးခြင်းက ခံစားချက်ကို ပိုနားလည်စေနိုင်တယ်။ စိတ်ဓာတ်ကျနေသူက သင့်ကို ယုံကြည်စိတ်ချလာပြီး သင့်အားပေးစကားကို နားထောင်ချင် လာပါလိမ့်မယ်။ မေတ္တာပါပါ တကယ်ဂရုစိုက်ကြောင်း ပြခြင်းက သူ့ကို နှစ်သိမ့်ပေးနိုင်ပါတယ်။
၁၄။ ဝေဖန်တဲ့ သဘောထားကို ဘာကြောင့် ရှောင်ရမလဲ။
၁၄ ဝေဖန်တဲ့သဘောထားကို ရှောင်ပါ။ စိတ်ဓာတ်ကျနေသူတွေကို ဝေဖန်တာက ဝေဒနာကို ပိုဆိုးစေနိုင်တယ်။ မေတ္တာနဲ့ အားပေးဖို့ ကြိုးစားတာကို အချည်းနှီးဖြစ်သွားစေနိုင်တယ်။ “မစဉ်းစားဘဲပြောတဲ့ စကားဟာ ဓားနဲ့ထိုးသလိုပဲ။ ဉာဏ်ပညာရှိသူရဲ့ စကားကတော့ ဒဏ်ရာကိုတောင် ပျောက်ကင်းစေတယ်။” (ပညာ. ၁၂:၁၈) စိတ်ဓာတ်ကျနေသူကို စကားနာ “ထိုး” ဖို့ မရည်ရွယ်ပေမဲ့ အမှတ်တမဲ့ “ထိုး” မိတဲ့အခါ အတော် နာကျင်စေနိုင်တယ်။ မေတ္တာနဲ့ အားပေးနိုင်ဖို့ သူ့နေရာမှာ အတတ်နိုင်ဆုံး ဝင်ခံစားပေးပြီး စာနာပေးဖို့ လိုတယ်။—မ. ၇:၁၂။
၁၅။ တခြားသူတွေကို မေတ္တာနဲ့ အားပေးဖို့ ဘယ်ကိရိယာကို သုံးနိုင်သလဲ။
၁၅ ကျမ်းစာနဲ့ နှစ်သိမ့်ပေးပါ။ (ရောမ ၁၅:၄၊ ၅ ကိုဖတ်ပါ။) ကျမ်းစာဟာ “ခံနိုင်ရည်နဲ့ နှစ်သိမ့်မှု ပေးသနားတဲ့ ဘုရားသခင်” ဆီက ဖြစ်လို့ နှစ်သိမ့်မှု ပေးနိုင်တယ်။ ကျမ်းစာလေ့လာမှု လမ်းညွှန် လိုမျိုး လေ့လာမှုအထောက်အကူများစွာလည်း ရှိတယ်။ အဲဒါတွေက ပြဿနာအမျိုးမျိုးကို ရင်ဆိုင်ဖြေရှင်းဖို့ အားပေးမှုဖြစ်စေတဲ့ ကျမ်းချက်တွေ၊ စာပေတွေကို ရှာတွေ့စေနိုင်တယ်။
၁၆။ စိတ်ဓာတ်ကျနေသူကို အားပေးတဲ့အခါ ဘယ်အရည်အသွေးတွေ လိုသလဲ။
၁၆ ကရုဏာရှိပါ၊ ကြင်နာပါ။ ယေဟောဝါဟာ “ကရုဏာကြီးတဲ့အဖ၊ နှစ်သိမ့်ခြင်းအမျိုးမျိုးရဲ့ အရှင်” ဖြစ်ပြီး ကျေးကျွန်တွေကို “ကရုဏာ” ပြတယ်။ (၂ ကောရိန္သု ၁:၃-၆ ကိုဖတ်ပါ။ လု. ၁:၇၈။ ရော. ၁၅:၁၃) ဒီကဏ္ဍမှာ ပေါလု ပုံသက်သေကောင်း ပြခဲ့တယ်။ “နို့တိုက်မိခင်က ရင်သွေးကို တယုတယ ပြုစုသလို ကျွန်တော်တို့လည်း ခင်ဗျားတို့ကို တယုတယ ဆက်ဆံခဲ့တယ်။ ခင်ဗျားတို့ကို ချစ်ခင်မြတ်နိုးလွန်းလို့ ဘုရားသခင်ရဲ့ သတင်းကောင်းကို ဝေမျှဖို့သာမက အသက်ကိုပေးဖို့တောင် အသင့်ပါပဲ။ ခင်ဗျားတို့ဟာ ကျွန်တော်တို့ ချစ်မြတ်နိုးရသူတွေ ဖြစ်လာလို့ပါ” ဆိုပြီး သူရေးတယ်။ (၁ သက်. ၂:၇၊ ၈) ကျွန်တော်တို့က ဘုရားလို ကရုဏာပြမယ်ဆိုရင် စိတ်ဓာတ်ကျနေသူရဲ့ ဆုတောင်းချက်ကို အဖြေရစေနိုင်တယ်။
၁၇။ ညီအစ်ကို/မတွေကို မျှမျှတတ ရှုမြင်ခြင်းက အားပေးဖို့ ဘယ်လို ကူညီပေးသလဲ။
၁၇ ညီအစ်ကိုတွေဆီက ပြည့်ဝစုံလင်မှုကို မမျှော်လင့်ပါနဲ့။ ညီအစ်ကို/မတွေကို မျှမျှတတ ရှုမြင်ပါ။ ခြောက်ပြစ်ကင်း သဲလဲစင်ဖြစ်ဖို့ မျှော်လင့်တာဟာ လက်တွေ့မကျတဲ့အပြင် စိတ်ပျက်စေနိုင်တယ်။ (ဒေ. ၇:၂၁၊ ၂၂) ယေဟောဝါဟာ ကျေးကျွန်တွေဆီကနေ လက်တွေ့ကျကျ မျှော်လင့်တယ်။ ဘုရားသခင်ရဲ့ ပုံသက်သေကို တုပမယ်ဆိုရင် တခြားသူတွေရဲ့ မစုံလင်မှုတွေကို သည်းခံနိုင်ပါလိမ့်မယ်။ (ဧ. ၄:၂၊ ၃၂) အတတ်နိုင်ဆုံး မလုပ်ဘူးလို့ ထင်စေမယ့်အစား ချီးမွမ်းပေးပါ။ တခြားသူတွေနဲ့ မနှိုင်းယှဉ်ပါနဲ့။ စိတ်ရင်းမှန်နဲ့ ချီးမွမ်းတာက အားရှိစေနိုင်တယ်။ အမှုတော်မှာ “ပျော်ရွှင်ကျေနပ်” ဖို့ ကူညီပေးနိုင်တယ်။—ဂလ. ၆:၄။
၁၈။ တခြားသူတွေကို ဘာကြောင့် မေတ္တာနဲ့ အားပေးချင်ကြသလဲ။
၁၈ ယေဟောဝါနဲ့ ယေရှုက ကျွန်တော်တို့ တစ်ယောက်စီကို အလွန်တန်ဖိုးထားတယ်။ (ဂလ. ၂:၂၀) ညီအစ်ကို/မတွေကို ကျွန်တော်တို့ သိပ်ချစ်လို့ မေတ္တာနဲ့ ကြင်နာစွာ ဂရုစိုက်ချင်တယ်။ ဒါကြောင့် “ငြိမ်သက်ခြင်းရှိစေတဲ့အရာ၊ အားပေးမှုဖြစ်စေတဲ့အရာတွေကို လုပ်ဆောင်ဖို့ အစွမ်းကုန် ကြိုးစားကြစို့။” (ရော. ၁၄:၁၉) လာမယ့်ပရဒိသုမှာ စိတ်ဓာတ်ကျစရာအကြောင်း လုံးဝ ရှိတော့မှာ မဟုတ်ဘူး။ စစ်၊ သေခြင်း၊ ဖျားနာမှု၊ နှိပ်စက်ညှဉ်းပန်းမှု၊ အိမ်တွင်းရေး ပြဿနာ၊ စိတ်ဓာတ်ကျစရာတွေ ရှိတော့မှာ မဟုတ်ဘူး။ အနှစ်တစ်ထောင် ကုန်တဲ့အခါ လူတွေ ပြည့်ဝစုံလင်လာမယ်။ နောက်ဆုံးစမ်းသပ်မှုကို အောင်မြင်သူတွေဟာ ယေဟောဝါဘုရားရဲ့ မြေကြီးဆိုင်ရာ သားသမီးတွေအဖြစ် မွေးစားခံရပြီး “ဘုရားသခင့် သားသမီးတွေရဲ့ ဘုန်းအသရေနဲ့ပြည့်စုံတဲ့ လွတ်လပ်မှုကို ခံစားရမယ်။” (ရော. ၈:၂၁) ကျွန်တော်တို့အားလုံး ကမ္ဘာသစ်ထဲ ဝင်ရောက်နိုင်ဖို့ အချင်းချင်းကို မေတ္တာနဲ့ ဆက်အားပေးကြပါစို့။
^ အပိုဒ်၊ 6 ယေဟောဝါထံ ချဉ်းကပ်လော့ စာအုပ် အခန်း ၂၄ ကိုကြည့်ပါ။
^ အပိုဒ်၊ 12 သေကြောင်းကြံခြင်းနဲ့ပတ်သက်တဲ့ ဆောင်းပါးတွေကို “အသက်ဆက်ရှင်သင့်တဲ့ အကြောင်းရင်း သုံးချက်” (ဧပြီ ၂၀၁၄)၊ “အသက်ရှင်ရကျိုးနပ်” (စက်တင်ဘာ ၈၊ ၂၀၀၂) နိုးလော့! မှာ ကြည့်ပါ။