Mpendwa 30:1-16
30 Lyene Mose wanenyile intunguluzi+ zya mitundu ya Ina Izlaeli ati: “Yeova walanda wati:
2 Ndi cakuti umonsi walapa umulapo+ kuli Yeova uwa kucita icintu cimwi nanti walapa umulapo+ uwa kukanacita icintu cimwi, afwile ukufikilizya vino walanda.+ Afwile ukucita vyonsi vino walafile ukuti alacita.+
3 “Nupya ndi cakuti umwanaci walapa umulapo umwi kuli Yeova uwa kucita icintu cimwi nanti walapa umulapo uwa kukanacita icintu cimwi lino acili umwance nupya acili akaikala pali ya isi
4 na ya isi yuvwa imilapo ino watalapa nupya yatamulesizye, alafikilizya imilapo yonsi ino watalapa, nu mulapo onsi uno watalapa uwa kukanacita icintu cimwi nao kwene alaufikilizya.
5 Lelo ndi cakuti ya isi yamulesha lino yuvwa umulapo uno watalapa uwa kucita icintu cimwi nanti uwa kukanacita icintu cimwi, lyene ale atalafikilizya umulapo uwo. Yeova alamwelela pa mulandu wakuti ya isi iyamulesha.+
6 “Lelo ndi cakuti watwalwa lino walapa mpiti umulapo wa kucita icintu cimwi nanti lino walaya cimwi ukwaula ukwelenganyapo
7 na iya uvwa imilapo iiyo lelo wakana ukumulesha pa wanda uno uvwa, ale umwanaci wiyo alafikilizya imilapo yonsi ino walapa.
8 Lelo ndi cakuti iya wamulesha pa wanda uno uvwa imilapo iiyo, angafuuta umulapo wa kucita icintu cimwi nanti icintu cino walavile+ ukwaula ukwelenganyapo, nupya Yeova alamwelela.
9 “Lelo ndi cakuti mukamfwilwa nanti umwanaci wino yata walapa umulapo, alafikilizya vyonsi vino watalapa.
10 “Lelo ndi cakuti umwanaci walapa umulapo wa kucita icintu cimwi nanti uwa kukanacita icintu cimwi lino acili na iya,
11 na iya uvwa nupya atamulesizye, alafikilizya imilapo yonsi ino watalapa.
12 Lelo ndi cakuti iya wafuusile imilapo ya muci pa wanda uno uvwile, ale atalaifikilizya.+ Iya wafuusile imilapo iiyo, nupya Yeova alelela umwanaci wiyo.
13 Kulozya ku milapo ya kucita icintu cimwi nanti iya kuikaanya ukucita icintu cimwi, iya angapingulapo ukuti muci afikilizye imilapo iiyo nanti foo.
14 Lelo ndi cakuti iya atamulesizye mu manda alondelelapo, ale watazumilizya uku milapo yakwe yonsi, pano ale ataamulesizye pa wanda uno uvwile imilapo yakwe.
15 Lelo ndi cakuti iya wamulesha pa cisila ca wanda wa kuvwa imilapo yakwe, ale umulandu wa muci ulaya pali iya.+
16 “Yakwene ali masunde yano Yeova wanenyile Mose ukulozya kuli iya nu muci, alino na kuli isi nu mwanakwe umukazyana wino acili akaikala umu ng’anda yakwe isi.”
