Mpendwa 10:1-36
10 Lyene Yeova wanenyile Mose ati:
2 “Uipangile mapenga yaili;+ usule siuva pa kuyapanga, nupya uwayaomvya uku kwamilako Aina Izlaeli na pa kupasa inkambi.
3 Lino mapenga yoili yalila, Aina Izlaeli yonsi yalaiza kuli wewe pa mulyango wi tenti lya kupepelapo.+
4 Ndi cakuti ipenga lyonga lyalila, intunguluzi na akalamba ya maumba ya Ina Izlaeli umuli antu masauzandi, aliyo yalaiza sile kuli wewe.+
5 “Ndi cakuti mwalizya ipenga ukuomvya iciunda icipusaneko, antu ali umu nkambi zya ku ufumondaka+ yalinzile ukutenuka.
6 Ndi cakuti mwalizya iciunda icipusane umuku wakwe ciili, antu ali umu nkambi zya ku kaeya+ yalinzile ukutenuka. Vikwene avino lyonsi yalinzile ukulizya ipenga lino iumba limwi likutenuka.
7 “Lelo lino mukukolonganika Aina Izlaeli, mutalinzile ukulizya mapenga+ umu nzila ipusaneko.
8 Ya simapepo ya mwana Aloni aalinzile ukulizya mapenga,+ nupya vivyo kwene avino cilaaya umu nkulo zinu zyonsi.
9 “Ndi cakuti mwaya umu kulwa na alwani inu akumucuzya umu mpanga inu, mulinzile ukulizya mapenga+ ukuomvya iciunda ca mu nkondo, nupya Yeova Leza winu alamwiusha nu kumupususha uku yalwani inu.
10 “Nupya pa nsita ino mukusansamuka,+ kuli kuti pa mitebeto+ na pa manda ya kutandikilako umu myezi, muce mwalizya mapenga pa malambo inu aakoca+ na pa malambo ya mutende;+ mapenga yaa yalalenga Leza amwiusha. Nene Yeova Leza winu.”+
11 Lyene umu mwaka uwalenga ciili, umu mwezi wakwe ciili, pa wanda uwalenga 20,+ ikumbi lyakatwike ukufuma pa cikuulwa ca muzilo+ umwali imbokosi ya Upangano.
12 Fwandi Aina Izlaeli yatenwike+ ukufuma umu lwanga lwa Sinai ukulingana na maumba yao, nupya ikumbi lyaile ilimilila umu lwanga lwa Palani.+
13 Uu wali ali muku wa kutandikilako uno yatenwike kulingana na vino Yeova wanenyile Mose.+
14 Lyene aali umu nkambi yakwe ya mwana Yuda umwali imitundu itatu, aatandikilepo ukutenuka ukulingana na maumba yao, nupya Nashoni+ mwana Aminadabu u wayatungululanga.
15 Uwatungululanga umutundu wakwe ya mwana Isakali a Netaneli+ mwana Zuali.
16 Uwatungululanga umutundu wakwe ya mwana Zebuluni a Eliabu+ mwana Heloni.
17 Lino icikuulwa ca muzilo capangulwilwe,+ ya mwana Geshoni+ na ya mwana Melali+ apeezilwe umulimo wa kusenda ivya ku cikuulwa ca muzilo, yatenwike.
18 Lyene amu nkambi yakwe Lubeni umwali imitundu itatu, yatenwike ukulingana na maumba yao, nupya Elizuli+ mwana Shedeuli u wayatungululanga.
19 Uwatungululanga umutundu wakwe ya mwana Simyoni a Shelumieli+ mwana Zulishadai.
20 Uwatungululanga umutundu wakwe ya mwana Gadi a Eliyasafu+ mwana Deueli.
21 Lyene Aina Koati apeezilwe umulimo wa kusenda iviya vya muzilo,+ yatenwike. Icikuulwa ca muzilo cali nu kupangwa lino yatatala yafika.
22 Lyene amu nkambi yakwe ya mwana Efulemu umwali imitundu itatu yatenwike kulingana na maumba yao, nupya Elishama+ mwana Amiudi u wayatungululanga.
23 Uwatungululanga umutundu wakwe ya mwana Manase a Gamalieli+ mwana Pedazuli.
24 Uwatungululanga umutundu wakwe ya mwana Benjamini a Abidani+ mwana Gidyoni.
25 Lyene amu nkambi yakwe ya mwana Dani umwali imitundu itatu, yatenwike ukulingana na maumba yao, yakwene aliyo yashalikilanga ala yakucingilila inkambi zyonsi, nupya Ahieza+ mwana Amishadai u wayatungululanga.
26 Uwatungululanga umutundu wakwe ya mwana Asheli a Pagieli+ mwana Okilani.
27 Uwatungululanga umutundu wakwe ya mwana Nafutali a Ahila+ mwana Enani.
28 Vikwene avino Aina Izlaeli na maumba yao yalondelanga pa kutenuka.+
29 Lyene Mose wanenyile Hobabu mwana Leweli*+ sivyala umwina Midyani ati: “Tukuya uku ncende ino Yeova walanzile ati, ‘Ndaipeela kuli mwemwe.’+ Twapita,+ nupya tumakusunga ningo, pano Yeova walaya Aina Izlaeli ivintu ivisuma.”+
30 Lelo Hobabu wamunenyile ati: “Nsikupita, nimaswilila uku mpanga yane na kuli ya lupwa yane.”
31 Lino Mose uvwile vivyo wamunenyile ati: “Awe utatusha, pano wewe umanyile kuno tulinzile ukupangila inkambi umu lwanga, nupya wewe ungatutungulula.
32 Nupya ndi cakuti wapita naswe,+ ivisuma vyonsi vino Yeova alatupeela, naawe kwene tulakupeela.”
33 Fwandi yafumile pa mwamba wakwe Yeova+ nu kupita ulwendo lwa manda yatatu, ni mbokosi+ yakwe Yeova yayakoleelile, nupya yafumile yakulonda incende apa kupuzila.+
34 Nupya ikumbi+ lyakwe Yeova lyali papela yao umusanya lino yatenwike pa nkambi.”
35 Lyonsi lino yakukuusha Imbokosi ya Upangano, Mose walandanga ati: “We Yeova+ katuka, nupya leka alwani yako yutuke, leka aakupata nayo kwene yutuke.”
36 Nupya ndi cakuti yafisha Imbokosi ya Upangano, Mose walandanga ati: “We Yeova, si ya pamwi ni mintapendwa ya Ina Izlaeli.”+
Mafutunoti
^ Kuli kuti Yetulo.
