Kwa Babali
Kwa Babali
Magazini ye mu sweli ku bala ye, ne i kalile ku hatiswa mwa kweli ya July ka silimo sa 1879. Ku zwa ka nako yeo, magazini ye, i cinca-cincize ku likana ni mo ne li cinceza linako. (Mu bone maswaniso a fahalimu.) Ku kala ka yona magazini ye, ku ka ba ni licinceho ze ñwi mwa magazini ya Tawala ya Mulibeleli. Ki licinceho mañi ze ka ba teñi?
Mu talime fa litaba ze mwahali ze fa likepe la bubeli, mi mu ka bona kuli ku na ni taba ye li, “Mu Bale Litaba ze Ñata fa Intaneti.” Kweli ni kweli mwatasaa taba yeo mu ka bonanga litoho za litaba ze ka fumaneha feela fa sibaka sa fa Intaneti sa www.jw.org. Ki ufi mulelo wa ku beya litaba ze ñwi fa Intaneti?
Mwa linaha ze ñata, buñata bwa batu se ba tabela ku bala litaba fa Intaneti, mi ba ikutwanga ku lukuluha ha ba eza cwalo. Ka ku itusisa Intaneti, ba kona ku ipalela litaba ze ñata ze fumaneha feela fa Intaneti. Libuka ze ñata, limagazini ze ñata, ni mitende ye miñata, za kona ku baliwa fa Intaneti.
Bakeñisa kuli batu ba bañata se ba tabela ku bala litaba fa Intaneti, cwanoñu fa lu ezize licinceho kwa sibaka sa luna sa fa Intaneti sa www.jw.org, ilikuli si be se si tabisa ni kuli batu ku ba bele bunolo ku itusisa sona. Batu ba ba itusisa sibaka se, ba kona ku bala lihatiso ze fumaneha mwa lipuo ze fitelela 430. Kono ku kala ka yona kweli ye, batu ba ba itusisa sibaka sa luna sa fa Intaneti hape ba ka kona ku balanga litaba ze ñwi ze ne fumanehanga kamita mwa limagazini za luna, kono litaba zeo cwale li ka fumanehanga feela fa sibaka sa luna sa fa Intaneti. *
Bakeñisa kuli lu ka hatisanga litaba ze ñata fa Intaneti, ku kala ka yona magazini ye, makepe a hatiso ya nyangela ya Tawala ya Mulibeleli a ka kusufazwa ku zwa fa 32 ku taha fa 16. Ka nako ya cwale Tawala ya Mulibeleli i tolokiwa mwa lipuo ze 204. Bakeñisa kuli magazini ye se i kusufalizwe, ku ka ba bunolo cwale ku i toloka mwa lipuo ze ñata hahulu.
Lu sepa kuli licinceho ze, li ka lu tusa ku fitisa lushango lwa mwa Bibele lo lu pilisa kwa batu ba bañata hahulu. Lu ikatulezi ku zwelapili ku fa litaba ze monyehela ili ze tabisa mwa lihatiso mane ni fa Intaneti ilikuli li tuse batu ba bañata ba ba kuteka litaba za mwa Bibele kuli ba zibe ze i luta Bibele luli.
Bahatisi
[Litaluso za kwatasi]
^ para. 5 Ze ñwi za litaba ze ka fumanehanga feela fa Intaneti ki ze cwale ka taba ye li: “Ku ba Banca,” ili ye bonisa mo ba kona ku balela Bibele ba banca, ni taba ye li: “Ze ni Ituta Mwa Bibele,” ili taba ye ba lukiselizwe bashemi kuli ba itusisange kwa ku luta bana ba bona ba lilimo ze taalu ni ba lilimo ze sa fiti fo.
[Siswaniso se si fa likepe 3]
FA INTANETI
Mu buhe vidionyana ye li, “The Watchtower—Published Since 1879”
(Mu bone mwatasaa MAKANDE/Tawala ya Mulibeleli—Ki Magazini ye Ipitezi)
Hape Mwendi Mwakona Kutabela Litaba Ze
MUSEBEZI WA KUHATISA
Vidio Yekuswani: Tawala ya Mulibeleli—Ihatisizwe Kuzwa ka 1879
Mubone magazini yehasanyizwe hahulu mwa lifasi moicincelize mwa lilimo zefitile.
