“Ni ka Kona Cwañi ku Kutaza?”

Mwa lifasi kaufela ku na ni mizwale ni likaizeli ba ba toma mutala o munde hahulu ka ku tiiseza ku kutaza niha ba na ni mapongo. Ha lu nyakisiseñi mutala wa bo Dalia ba ba pila mwa Vilnius, ili muleneñi wa naha ya Lithuania.

Bo Dalia ki likaizeli ba ba na ni lilimo ze bato eza 35. Ku zwa ka nako ye ba pepwa, ba nyandisizwe ki butuku bo buñwi bwa mwa booko (cerebral apoplexy). Ba omelezi luñañali mi ba na ni butata bo butuna bwa ku sa bulela hande kabakala butuku bo. Kabakaleo, ki ba lubasi feela lwa bona ba ba kona ku ba utwisisa hande. Bo Dalia ba ina ni bo maa bona, bo Galina, ba ba ba babalela. Bo Dalia niha ba bile ni butata bo butuna ni lipilaelo, ba zwelapili ku ba ni tabo. Ki kabakalañi?

Bo Galina ba li: “Ka 1999, munyanaa ka Apolonija naa tile ku to lu potela. Ne lu lemuhile kuli Apolonija, ya li yo muñwi wa Lipaki za Jehova, naa ziba hande Bibele, mi Dalia a kalisa ku mu buza lipuzo ze ñata. Hasamulahonyana, Apolonija a kalisa ku ituta Bibele ni Dalia. Ka linako ze ñwi, ne ni banga ni bona ha ba ituta mi ne ni tusanga ku talusa za bulela Dalia. Kono ne ni lemuhile kuli lika kaufela za naa ituta Dalia ne li mu tusa luli. Ku si ka fita kale nako ye telele, ni na na ikupela ku ituta Bibele.”

Bo Dalia ha ne ba kalisize ku utwisisa lituto za mwa Bibele, ba kala ku katazwa hahulu ki puzo ye ñwi. Kwa mafelelezo, ba buza bo Apolonija puzo ye ne ba kataza, ba li: “Na ya omelezi luñañali ni ka kona cwañi ku kutaza?” (Mat. 28:19, 20) Bo Apolonija ba omba-omba bo Dalia, ba li: “U si ke wa ikalelwa. Jehova u ka ku tusa.” Mi Jehova wa tusanga luli.

Bo Dalia ba kutazanga cwañi? Ba kutazanga ka linzila li sikai. Likaizeli ba ba tusanga ku ñola mañolo a na ni litaba za mwa Bibele. Pili bo Dalia ba bulelelanga likaizeli litaba ze ba bata kuli ba ñole. Mi cwale likaizeli bao ba ñolanga liñolo le li na ni litaba ze ba bulezi bo Dalia. Bo Dalia hape ba kutazanga ka ku lumelanga tushango ka luwaile lwa bona lwa ku fumbata. Mi ha bu sile hande, mizwale ni likaizeli ba nganga bo Dalia ni ku ya ni bona kwa libaka ko ku fumaneha batu ni mwa makululu kuli ba yo kutaza.

Bo Dalia ni bo maa bona ba tiiselize ku eza zwelopili mwa niti. Kaufelaa bona ne ba ineezi ku Jehova mi ne ba kolobelizwe mwa November ka 2004. Mwa September ka 2008, kwa tomiwa sikwata se si bulela puo ya Sipolishi mwa Vilnius. Bakeñisa kuli ne ku tokwahala bakutazi ba Mubuso ba bañata mwa sikwata seo, bo Dalia ni bo maa bona ba kalisa ku kopananga ni sona. Bo Dalia ba li: “Mwa likweli ze ñwi na ikalelwanga ha ni si ka ya kale mwa sebelezo. Kono ha ni se ni lapezi ku Jehova ka za taba yeo, ku si ka fita kale nako ye telele mutu yo muñwi u ezanga tukiso ya ku ya ni na mwa sebelezo ya mwa simu.” Kaizelaa luna ya latwa Dalia u ikutwa cwañi ka za muinelo wa li ku ona? U li: “Butuku bo, bu ni omelelisize luñañali, kono munahano wa ka wa beleka. Mi ni tabile hahulu kuli na kona ku bulelela ba bañwi ka za Jehova!”