Piho ya Bashaeli ba Mubuso

“Bonalimai Ba Ba Se Ba Libezwi” Ba Hupulwa

KWA makalelo a 2001, Haykaz, Paki ya Jehova wa lilimo za buhulu ze 15, n’a potezi “Bonalimai Ba Ba Se Ba Libezwi,” ili maswaniso a mwa Bern, kwa Switzerland, a n’a bonisa nyandiso yeo ba Nazi ne ba nyandisize ka yona Lipaki za Jehova. Ha sa felize ku bona maswaniso ao, Haykaz a li: “Ne ni utwanga fela ka za ku nyandiswa kwa Lipaki za Jehova mwa puso ya ba Nazi, kono fa ne li lona lwa pili ku bona litaba ze ñozwi ni maswaniso luli a teñi. Maswaniso, lipiho za be ne ba li teñi ka nako yeo, ni ze talusizwe fa maswaniso ki bocaziba ba litaba ze ne ezahezi ne li ni tahiselize ku ba ni minahano ye miñata.”

Ha se ku fitile nako ye ñwi, Haykaz ha n’a filwe ku ñola piho ya ku balela sitopa sa hae fa sikolo se si pahami, n’a ketile ku ñola taba ye li “Lipaki za Jehova—Bonalimai Ba Ba Se Ba Libezwi Be Ne Ba Nyandisizwe ki Ba Nazi.” Bo muluti ba hae ba lumela taba yeo kono ba bulelela Haykaz kuli a eze lipatisiso ni mwa libuka-buka fela. Haykaz ka tabo a lumela. “Ne ni ñozi ka bukuswani litaba ze ne ni fumani mwa libuka ze ñwi ze bulela ka za Lipaki za Jehova mwa nako ya puso ya ba Nazi. Hape ne ni talusize mo ne ni ikutwela ka za maswaniso e ne ni boni a ‘Bonalimai Ba Ba Se Ba Libezwi.’ Piho ya n’a ñozi ya makepe a 43 ne i na ni maswaniso.”

Mwa November 2002, Haykaz a fa piho ya hae kwa bana ba sikolo ba bañwi, baluti, lubasi lwa hae, ni balikani ba hae. Hasamulaho, kwa ba ni nako ya lipuzo ni likalabo, ili nto ye ne mu file kolo ya ku talusa lituto ze tomile fa Bibele za lumela. Musizana yo muñwi ya n’a li mwahal’a baputehi ha n’a buzize libaka Haykaz ha n’a ketile taba ye, Haykaz n’a talusize kuli libuka ze ñata za litaba za kale ha li buleli ka za Lipaki za Jehova mi n’a bata kuli batu ba zibe ka m’o Lipaki ka bundume ne ba kumalezi tumelo ya bona ya Sikreste. Kiñi se ne si zwile mwa piho ya hae?

Haykaz n’a bulezi kuli: “Be ne ni kena ni bona sikolo ne ba komokile. Ne ba sa zibi kuli Lipaki za Jehova ka sikwata ne ba nyandisizwe maswe. Hape, ba bañata ne ba sa zibi kuli Lipaki be ne ba tamezwi mwa minganda ya tukufazo ya ba Nazi ne ba apezi sisupo se si ipitezi sa pulipela.”

Ha sa file piho ya hae, Haykaz n’a bile ni kolo ye tuna ya ku bulela ku ba n’a kena ni bona mwa sitopa si li siñwi ni ku buhisana ni bona lituto za Lipaki ze tomile fa Bibele ka za ku pompelwa mali, za bucwala, ni za mizamao. “Ha ku na ni yo mukana ku bona ya n’a ni sheununile kamba ku ni seha,” kona mwa taluseza Haykaz. Mi hape, piho ya hae cwale i bulukilwe mwa sifalana sa libuka sa fa sikolo seo. Seo si ka tusa kakuli bundume bwa Lipaki za Jehova cwale ha bu na ku libalwa.