Zasoneka Luka 5:1-39

  • Babakidi e mbizi mu mpil’a sivi; alongoki antete (1-11)

  • Nkwa wazi owukilu (12-16)

  • Yesu owukidi mbevo a vola (17-26)

  • Yesu obokele Levi (27-32)

  • Kiuvu mu kuma kia fionkonona (33-39)

5  Lumbu kimosi vava katelamene vana yanga dia Ngenesarete,* e ndonga izidi mu wá e diambu dia Nzambi, imfinangese.+  Omwene nzaza zole vana nteto a yanga, kansi abaki a mbizi bakulumuka muna nzaza yo sukula makonde mau.+  I bosi, okotele muna nzaza ya Simone, undodokele vo kanunguna yo fioti muna maza. Ovuende muna nzaza, oyantikidi longa e ndonga.  Vava kamene longa, ovovese Simone vo: “Nunguna e nzaza vana kati, nuleka makonde meno, kimana nuabaka e mbizi.”  Simone ovutwidi vo: “E Mfumu, tusadidingi o fuku wau wawonso ke tubakidi kima ko,+ kansi muna lutumu lwaku ileka e makonde.”  Vava bavangidi wo, babakidi mbizi zayingi za maza. O makonde mau mayantikidi bâkuka.+  Muna kuma kiaki, babokele akwau muna nzaza yankaka beza kubasadisa. Bezidi, bazadisi e nzaza zau zole, i bosi e nzaza ziyantikidi dimuka.  Simone Petelo wau kamwene wo, ofukamene vana ndose a Yesu yo vova vo: “E Mfumu, katuka ova ngina, kadi i nsumuki.”  Kadi oyandi ye awonso bakedi yandi basivikidi kikilu mu kuma kia ulolo wa mbizi za maza babakidi, 10  i diau mpe divangamene kwa wan’a Zebedayo,+ Yakobo yo Yoane, ana basalanga e ntwadi yo Simone. Yesu ovovele kwa Simone vo: “Kumoni wonga ko. Tuka owau okala se mbaki a wantu.”+ 11  Batwese nzaza zau vana kumu, bayambwidi lekwa yawonso, banlende.+ 12  Lumbu kimosi, vava kakala muna vata dimosi, mwakala yakala dimosi wazala yo wazi. Vava kamwene Yesu, oyenzekele o ntu, undodokele vo: “E Mfumu, avo ozolele wo, umpelelesa.”+ 13  Yesu olambwidi o koko kwandi, unsimbidi yo vova vo: “Nzolele wo! Velela kwaku.” Vana vau, o wazi unkatukidi.+ 14  I bosi, Yesu okanikini kwa muntu vo kazayisi dio kwa muntu ko: “Kansi wenda kuyisonga kwa nganga, watambika lukau lwa mpelela aku, wauna o Mose kakanikina,+ muna umbangi kwa yau.”+ 15  Kansi e nsangu zandi zimwangane kikilu, ndong’ayingi izidi lungalakana mu wá, yo wukwa muna mayela mau.+ 16  Kansi, nkumbu miayingi kayendanga kuna makanga, kasamba. 17  Lumbu kimosi, vava kalonganga, Afarisi ye alongi a Nsiku, ana batuka muna mavata mawonso ma Ngalili, ma Yuda ye ma Yerusaleme, bakedi kûna; o nkum’a Yave* wa wuka ukedi yandi.+ 18  Muna diadi, valwaka wantu banatanga nkwa kimbevo kia vola vana kipoyo, bavavidi una balenda kunkotesela yo kunlwakisa vana vakala o Yesu.+ 19  Kansi wau ke balendele kunkotesa ko mu kuma kia ndonga, bamente kuna nludi a nzo, bankulumwini muna kipoyo, vana kati kwa awana bakala kuna ntwal’a Yesu. 20  Vava kamwene lukwikilu lwau, ovovele vo: “E nkundi, masumu maku malolokelo.”+ 21  I bosi, asoneki ye Afarisi bayantikidi yindula, oku vo: “Nani ndioyo otiangunanga Nzambi? Nani olenda loloka masumu, avo ke Nzambi kaka ko?”+ 22  Kansi, Yesu obakwidi ngindu zau, ubavutwidi vo: “Adieyi nuyindulanga omu ntima mieno? 23  Adieyi diasazu mu vova: ‘O masumu maku malolokelo’ yovo, ‘Telama yo diata’? 24  Kansi, kimana nuazaya wo vo Mwan’a muntu ovuidi wisa kialoloka masumu ova nza—” ovovese mbevo a vola vo: “Ivovese vo, Telama, bonga kipoyo kiaku, wenda kuna nzo aku.”+ 25  Vana vau otelamene vana bena, onete kipoyo kina kalekeswa, wele kuna nzo andi, wele kembelela Nzambi. 26  Awonso basivikidi kikilu yo kembelela Nzambi, bamwene o wonga, bavovele vo: “Mambu masivi tumwene o unu!” 27  I bosi, ovaikidi, omwene mvakulwisi a mpaku, nkumbu andi Levi, ovuende vana vevakulwilwanga e mpaku, umvovese vo: “Undanda.”+ 28  Otelamene, osisidi lekwa yawonso, oyantikidi kunlanda. 29  I bosi, Levi unlambisidi lambu diampwena muna nzo andi, mwakala ndong’ayingi ya avakulwisi a mpaku ye akaka mpe badianga yau vana meza.+ 30  Afarisi ye asoneki au bayantikidi yidima, bavovese alongoki andi vo: “Ekuma nudilanga yo nua kumosi ye avakulwisi a mpaku ye asumuki?”+ 31  Yesu ubavovese vo: “Awana bena yo vimpi ke bevuanga ngang’a mawuku mfunu ko, kansi ambevo kaka bekumvuanga o mfunu.+ 32  Kizidi bokela ansongi ko, kansi asumuki, kimana baviluka o ntima.”+ 33  Bamvovese vo: “Alongoki a Yoane befionkononanga* yo dodokela ntangwa zawonso, alongoki a Afarisi mpe i wau bevanganga, kansi alongoki aku, dia yo nua.”+ 34  O Yesu ubavutwidi vo: “Nga akundi a toko diansompi balenda fionkonona* ekolo e toko diansompi kena yau? 35  Kansi e lumbu ikwiza ina e toko diansompi+ kekatulwa vana bena; muna lumbu yayina befionkonona.”*+ 36  Ubatelele diaka e kingana vo: “Ke vena muntu ko ozenganga tenda kia mvuatu ampa kalonda kio muna mvuatu wankulu. Avo ovangidi wo, ke fwasa kaka mvuatu ampa ko, kansi e tenda kiampa nswaswani kikala yo mvuatu ankulu.+ 37  Diau dimosi mpe, ke vena muntu ko osianga e vinyu ampa muna madila mankulu ma nkand’a bulu. Avo ovangidi wo, e vinyu ampa ibukisa madila, yo tiamuka, e madila mefwasuka. 38  Kansi e vinyu ampa muna madila mampa ma nkand’a bulu isiwanga. 39  Ke vena muntu ko onuini vinyu ankulu kazola ina yampa, kadi edi kevova vo: ‘Ina yankulu iwete.’”

Mvovo vana yand'a lukaya

I sia vo, Mbu a Ngalili.
Yovo “beminanga nsoki.”
Yovo “mina nsoki.”
Yovo “bemina nsoki.”