Zasoneka Luka 4:1-44
4 I bosi, Yesu ozele yo mwand’avelela, okatukidi kuna Yodani, oneto kuna makanga kwa mwanda+
2 mu lumbu 40 kuna katontelwa kwa Nkadi ampemba.+ Yandi kadie má muna lumbu yayina, vava yafokoka, omwene nzala.
3 Muna kuma kiaki, Nkadi ampemba umvovese vo: “Avo ngeye u mwan’a Nzambi, vovesa e tadi diadi diakituka se mbolo.”
4 Kansi, Yesu umvutwidi vo: “Diasonama vo: ‘O muntu ke zingilanga kaka mu mbolo* ko.’”+
5 Untombwele yo kunsonga yintinu yawonso ya nza mu fikolo.+
6 I bosi, Nkadi ampemba umvovese vo: “Ikuvana e wisa kiaki kiawonso yo nkembo au, kadi kwa mono kiavewa,+ ivana kio kwa konso ona nzolele.
7 Avo unsambidi, ozevo e wisa kiaki kiawonso kikala se kiaku.”
8 Yesu umvutwidi vo: “Diasonama vo: ‘Yave* wa Nzambi aku kaka ofwete sambila, yandi kaka ofwete sadila e salu kiavauka.’”+
9 I bosi, unète kuna Yerusaleme, untelamese vana lusangidiku lwa* tempelo, umvovese vo: “Avo ngeye u mwan’a Nzambi, uyituba vana nsi,+
10 kadi diasonama vo: ‘Okanikina mbasi zandi muna wete diaku, batanina,’
11 ‘Bekunatina muna moko mau, kimana walembi wanda o kulu vana tadi.’”+
12 Yesu umvutwidi vo: “Diasonama vo: ‘Kufwete tonta Yave* wa Nzambi aku ko.’”+
13 Nkadi ampemba vava kamene kuntonta, okatukidi vana kena yavana kevua diaka ntangwa yambote.+
14 O Yesu ovutukìdi kuna Ngalili+ muna ngolo za mwanda. E nsangu zandi zimwangane muna zunga kiawonso.
15 Oyantikidi longela muna masambilu mau, ozitisu kwa wantu awonso.
16 Olweke kuna Nazarete,+ kuna kasansukila, mun’owu wa fu kiandi muna Lumbu kia Vundu, okotele muna sambilu,+ otelamene katanga.
17 Bamvene o nkand’a Yesaya wa ngunza, oyalumwini wo, osolwele fulu kiasonama vo:
18 “O mwand’a Yave* wina yame, kadi oyandi unkusidi o mazi yasamuna e nsangu zambote kw’asukami. Untumini yasamuna luvevoko kwa abakami, e mbweno kwa mpofo, yavevola awana bebangikwanga,+
19 yasamuna o mvu a dienga dia Yave.”*+
20 Obudikidi o nkanda, ovutwidi wo kwa selo yo vuanda; o meso ma wantu awonso muna sambilu mantungunuini.
21 Oyantikidi kubavovesa vo: “O unu e sono kiaki nuwidi kilungane.”+
22 Awonso bayantikidi kunsila umbangi wambote, basivikidi mpe muna mambu ma ngemba mavaikanga muna nu’andi,+ bavovele vo: “Ondioyo nga ke mwan’a Yosefe ko e?”+
23 Ubavovese vo: “Kalukatikisu ko vo, se nuavova diambu diadi mu kuma kiame, ‘E nganga, ukiwuka. Mana tuwidi mavangamene muna Kafanau,+ vanga mo mpe mwamu vata diaku.’”
24 Ovovele vo: “Kieleka, inuvovese vo, kavena nkutu ngunza ko otambulwanga muna zunga kiandi.+
25 Inuvovese e ludi vo: Muna Isaele mwakala akento ayingi bafwilwa akala muna tandu kia Eliya wa ngunza, vava kiakangama e mvula mu mvu ntatu ye ngonde sambanu, mwakala mpe mvengele angolo muna nsi yawonso.+
26 Kansi, Eliya katumwa kw’akento awaya ko, kuna kwa nkento wafwilwa yakala kuna Sarefate a Sidone kaka katumwa.+
27 Diau dimosi mpe, akwa wazi ayingi bakala muna Isaele muna tandu kia Elesa wa ngunza, kansi ke mosi ko muna yau waveleleswa,* Namani kaka wa musi Suria.”+
28 Wantu awonso muna sambilu bafungidi makasi vava bawidi o mambu mama,+
29 batelamene, bamvaikisi kuna mbazi a mbanza, banete vana ndambu a mongo vana vatungilwa e mbanz’au, kimana banengomona kuna ndimba.
30 Kansi, oyandi oviokele vana kati kwau, wele kwandi.+
31 I bosi, okulumukini kuna Kafanau, imosi muna mbanza za Ngalili. Ubalongele muna Lumbu kia Vundu,+
32 basivikidi kikilu e mpil’andi ya longela,+ e kuma kadi kuna wisa kavovela.*
33 Muna sambilu mukedi nkwa nkuya, nkwa mwand’a usafu, okazidi muna nding’angolo, oku vo:+
34 “Nkia diambu tuna diau yo ngeye, e Yesu wa musi Nazarete?+ Nga wizidi kutufwasa e? Ntomene kuzaya, u Mvauki a Nzambi.”+
35 Kansi, Yesu otumbidi wo, oku vo: “Dingalala, vaika muna yandi.” O nkuya umbwisidi vana kati, uvaikidi muna yandi, ke usidi kumvanga diambu ko.
36 Yau awonso basivikidi, bavovanene vo: “Nkia diambu diadi? Kadi muna wisa ye ngolo kavovesele mianda mia usafu, mivaikidi!”
37 E nsangu zandi zimwangane muna zunga kiawonso.
38 Vava kavaikidi muna sambilu, okotele muna nzo a Simone. O kô wandi wa nkento ngianduka yangolo kakala yau, bamvovese kimana kansadisa.+
39 Otelamene vana kakala, otumbidi e ngianduka, osasukidi. Vana vau otelamene, oyantikidi kubakubikila madia.
40 Vava kiadimuka e ntangwa, awonso bakala ye wantu ana bakala ye yimbevo ya mpila mu mpila babatwese kwa yandi. Otensekele moko mandi muna yau awonso, ubasaswidi.+
41 E nkuya mpe mivaikidi muna wantu ayingi, bakazidi yo vova vo: “Ongeye u Mwan’a Nzambi.”+ Ubatumbidi, kabayambwidi ko bavova,+ kadi bazaya wo vo yandi i Kristu.+
42 Muna mene-mene, ovaikidi, wele kuna makanga.+ Kansi, e ndonga imvavidi, bezidi kwa yandi, bankakididi kimana kalembi katuka vana bena.
43 Ubavovese vo: “Mfwete kwenda mpe muna mavata mankaka muna samuna e nsangu zambote za Kintinu kia Nzambi, kadi i diau yatuminua.”+
44 Dianu vo, wele longingi muna masambilu ma Yuda.
Mvovo vana yand'a lukaya
^ Yovo “madia.”
^ Yovo “nludi a.”
^ Yovo “wawukwa.”
^ I sia vo, mana kabalonganga kwa Nzambi matuka.
