Zasoneka Luka 18:1-43
18 I bosi, muna kubasonga o mfunu wa sambanga ntangwa zawonso yo lembi yoya, ubatelele kingana,+
2 oku vo: “Muna mbanza mosi mwakala mfundisi walembi vuminanga Nzambi, ngatu zitisa muntu.
3 Mwakala mpe nkento wafwilwa yakala muna mbanza yayina wayendanga kwa yandi, oku vo: ‘Undungisa muna mfundu yo ntantu ame.’
4 Kuna lubantiku kazola wo ko, kansi kuna kwalanda uvovele vo: ‘Kanele vo kivuminanga Nzambi ko, ngatu zitisa muntu,
5 wau vo nkento ndioyu wafwilwa yakala okwamanananga kuntokanesa, ikunlungisa kimana kayambula kuntokanesa muna ndomb’andi.’”+
6 I bosi, o Mfumu ovovele vo: “Nuwá, owu uvovele mfundisi, kana una vo nkwa vilwa!
7 O Nzambi, nga kalendi lungisa awana kasola ko, ana bekumbokelanga fuku yo mwini,+ wau kekubasonganga luzindalalu e?+
8 Inusamunuini vo, oyambula vo balungiswa mu nzaki. Kansi, o Mwan’a muntu vava kekwiza, nga owana kikilu lukwikilu* ova nza?”
9 Otele mpe kingana eki kw’awana bebundang’e vuvu muna unsongi wa yau kibeni, y’awana bevezanga ankaka:
10 “Wantu wole batombokele kuna tempelo basamba, o mosi Mfarisi, o wankaka mvakulwisi a mpaku.
11 O Mfarisi otelamene, osambidi muna nsi a ntima oku vo: ‘E Nzambi, itondele, kadi kina nze wantu awaya ko—mivi, minkondwa unsongi, minta-zumba—musungula mvakulwisi a mpaku ndioyu.
12 Muna lumingu, lumbu yole ifionkononanga;* ivanang’e tini kia kumi muna yawonso ibakanga.’+
13 Kansi, o mvakulwisi a mpaku, otelamene kuna vala, kazolele nkutu sengola meso ku zulu ko, tulu kiandi kaka kabundidinge, oku vo: ‘E Nzambi, umfwil’e nkenda, i nsumuki kwame.’+
14 Inusamunuini vo, muntu ndioyo okulumukini kuna nzo andi se nkwa unsongi ke mu Mfarisi ko.+ Kadi konso ona okuyitundidikanga, okululwa, kansi konso ona okuyikululanga, otundidikwa.”+
15 O wantu bantwasidi mpe e nsedia kimana kabasimba, kansi alongoki wau bamwene wo, bayantikidi kubasima.+
16 Yesu obokele e nsedia, ovovele vo: “Nuyambula yingiana-ngiana beza kwa mono, ke nubasimi ko, kadi e Kintinu kia Nzambi kia awana bena nze yingiana-ngiana yayi.+
17 Kieleka inuvovese vo, konso ona olembi tambula Kintinu kia Nzambi nze kingiana-ngiana, ke kota mo nkutu ko.”+
18 Mfumu mosi wa Ayuda unyuvuidi vo: “E Nlongi Ambote, adieyi mfwete vanga muna vua moyo a mvu ya mvu?”+
19 Yesu umvovese vo: “Ekuma ungikidi vo wambote? Ke vena muntu ambote ko, mosi kaka, i Nzambi.+
20 E nkanikinu ozeye mio: ‘Kute zumba ko,+ kuvondi ko,+ kuyiyi ko,+ kusie kimbangi kia luvunu ko,+ zitisa se diaku yo ngudi aku.’”+
21 Ovutwidi vo: “Mawonso mama ilundanga mo tuka muna kileke kiame.”
22 O Yesu vava kawidi wo umvovese vo, “Diambu dimosi okondelo: Teka yawonso una yau yo vana e nzimbu kwa asukami, okala yo lusalu kuna zulu; wiza ndandi.”+
23 Vava kawidi wo, okendalele kikilu, kadi mvuama kikilu kakala.+
24 O Yesu untadidi, ovovele vo: “Diampasi dikala kw’awana bena ye nzimbu mu kota muna Kintinu kia Nzambi!+
25 Kieleka, diasazu kwa samo kaviokela muna vundu dia ntumbu, ke mu mvuama ko kakota muna Kintinu kia Nzambi.”+
26 Awana bawidi wo, bavovele vo: “Nani olenda vuluzwa?”+
27 Ovutwidi vo: “Mana ke malendakana ko kwa wantu, kwa Nzambi malendakana.”+
28 Kansi Petelo ovovele vo: “Oyeto tusisidi lekwa yeto yo kulanda.”+
29 Ubavovese vo: “Kieleka inuvovese vo, ke vena ona wasisa nzo ko yovo nkento yovo mpangi zandi yovo se ye ngudi, yovo wana, mu kuma kia Kintinu kia Nzambi,+
30 kalembi tambula yayingi omu kolo kiaki, muna tandu* kikwiza, moyo a mvu ya mvu.”+
31 I bosi, onete yau Kumi ye Zole vana fulu kia yau kaka, ubavovese vo: “Wau se tutomboka kuna Yerusaleme, o mambu mawonso masoneka angunza mu kuma kia Mwan’a muntu melungana.+
32 Oyekolwa vana moko ma esi zula,+ osakanenua,+ otiangunua yo taulwilwa o mete.+
33 Vava bemana kunzwabula, bekumvonda,+ kansi muna lumbu kiatatu ofuluka.”+
34 Kansi, ke basidi bakula kana diambu dimosi ko, kadi e nsas’a mvovo miami yaswekama kwa yau, ke babakwidi mana kavovelo ko.
35 Vava Yesu kafinamene kota muna Yeriko, vakedi mpofo ifongele vana mbel’a nzila, ilombanga tukau.+
36 Wau kawidi e ndonga iviokanga, oyuvuidi kana nkia diambu.
37 Bansamunuini vo: “Yesu wa Nazarete oviokanga!”
38 Obokele vo: “E Yesu, e Mwan’a Davidi, umfwil’e nkenda!”
39 Awana bakedi kuna ntwala bayantikidi kunsima kimana kabutama, kansi oyandi osakisi diaka oboka, oku vo: “E Mwan’a Davidi, umfwil’e nkenda!”
40 Yesu oningamene, ovovele vo benda yandi vana kena. Vava kalwaka, unyuvuidi vo:
41 “Adieyi ozolele yavanga kwa ngeye?” Umvutwidi vo: “E Mfumu, yambula yamona diaka.”
42 O Yesu umvovese vo: “Mona kwaku; o lukwikilu lwaku lusaswidi.”+
43 Vana vau omwene, oyantikidi kunlanda,+ okembele Nzambi. O nkangu awonso wau bamwene wo, basanisini Nzambi.+
Mvovo vana yand'a lukaya
^ Yovo “lukwikilu lwa mpila yayi.”
^ Yovo “iminanga nsoki.”
^ Tala Nsas’a Mvovo.
