Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 34

Wetin Go Apin to Wi we Wi Day?

Wetin Go Apin to Wi we Wi Day?

YU NO se tide pipul dɛn de ol, sik, ɛn day. Ivin sɔm pikin dɛnsɛf de day. Yu tink se yu fɔ fred day ɔ pɔsin we dɔn day?— Yu no wetin go apin to wi we wi day?—

Wɛl, tide nɔbɔdi nɔ de we dɔn day ɛn kam bak fɔ tɔk bɔt wetin de apin we pɔsin day. Bɔt we Jizɔs, di Gret Ticha, bin de na dis wɔl, wan man bin de we day ɛn gɛt layf bak. Wi go lan bɔt di wan dɛn we dɔn day bay we wi rid bɔt dis man in stori. Di man na bin Jizɔs in padi, ɛn i bin de na wan smɔl tɔŋ we dɛn kɔl Bɛtani, we de nia Jerusɛlɛm. In nem na Lazarɔs, ɛn i bin gɛt tu sista dɛn we nem Mata ɛn Meri. Mek wi si wetin di Baybul se bin apin.

Wan de, Lazarɔs bin rili sik. Da tɛm de, Jizɔs bin de fa frɔm usay dɛn de. So Mata ɛn Meri sɛn pɔsin fɔ go tɛl Jizɔs se dɛn brɔda Lazarɔs nɔ wɛl. Dɛn bin du dis bikɔs dɛn bin no se Jizɔs go kam ɛn mek dɛn brɔda wɛl. Jizɔs nɔto dɔktɔ, bɔt Gɔd gi am pawa fɔ mɛn ɔlkayn sik.—Matyu 15:30, 31.

Lazarɔs bin dɔn so sik dat bay di tɛm we Jizɔs de kam, Lazarɔs dɔn day. Bɔt Jizɔs tɛl in disaypul dɛn se Lazarɔs de slip ɛn I de go wek am. Di disaypul dɛn nɔ bin no wetin Jizɔs min. So Jizɔs tɔk klia wan se: “Lazarɔs dɔn day.” Wetin dis tɛl wi bɔt day?— Yɛs, day tan lɛk we pɔsin de pan dip slip. Na dip slip we pɔsin nɔ de ivin ebul fɔ drim.

 Jizɔs de kam fɛn Mata ɛn Meri. Bɔku pan dɛn padi dɛn bin dɔn kam bikɔs dɛn brɔda day, so dɛn kam fɔ tɛl dɛn ɔsh. We Mata yɛri se Jizɔs de kam, i go mit am. I nɔ tu te, Meri sɛf go mit Jizɔs. In at bin rili pwɛl ɛn i bin de kray, i fɔdɔm na Jizɔs in fut. Di ɔda padi dɛn we fala Meri dɛnsɛf bin de kray.

Di Gret Ticha aks usay dɛn bɛr Lazarɔs. Na in di pipul dɛn kɛr Jizɔs go na di kev usay dɛn bɛr Lazarɔs. We Jizɔs si di pipul dɛn de kray, insɛf bigin fɔ kray. I no aw pɔsin kin fil we sɔmbɔdi we i lɛk day.

Wan ston bin de bifo di kev, so Jizɔs tɔk se: “Una pul di ston we de na di domɔt.” Yu tink se dɛn fɔ du am?— Mata nɔ bin tink se na fayn tin fɔ du. I se: ‘Masta, di ples go smɛl bad bikɔs i dɔn tek 4 dez naw.’

Bɔt Jizɔs tɛl am se: ‘A nɔ bin dɔn tɛl yu se yu go si Gɔd in pawa, if yu biliv mi?’ Jizɔs bin min se Mata go si sɔntin we go briŋ ɔnɔ to Gɔd. Wetin yu tink se Jizɔs go du? We dɛn pul di ston kɔmɔt, Jizɔs pre lawd wan to Jiova. Dɔn i tɔk se: “Lazarɔs, kam na do!” Yu tink se i go kɔmɔt na do? I go ebul?—

Yu ebul fɔ wek pɔsin we de slip?— Yɛs, if yu ala lawd wan, di pɔsin go wek. Bɔt yu ebul wek pɔsin we dɔn day?— Nɔ. Ilɛksɛf yu ala lawd wan di pɔsin nɔ go yɛri yu. Natin nɔ de we mi, yu, ɔ ɛni ɔda pɔsin na dis wɔl tide go ebul fɔ du fɔ wek pɔsin we dɔn day.

Wetin Jizɔs dɔn du fɔ Lazarɔs?

Bɔt Jizɔs difrɛn. Gɔd gi am spɛshal pawa. So wan wɔndaful tin bin apin we Jizɔs kɔl Lazarɔs. Di man we dɔn day fɔ 4 dez kam na do! I dɔn gɛt layf bak! I ebul fɔ blo, waka,  ɛn tɔk bak! Jizɔs mek Lazarɔs gɛt layf bak.—Jɔn 11:1-44.

Naw tink bɔt dis: Wetin bin apin to Lazarɔs we i day? Yu tink se sɔntin lɛk sol ɔ spirit bin kɔmɔt insay am ɛn go de ɔdasay? Yu tink se Lazarɔs in sol bin go na ɛvin? Fɔ se i bin gɛt layf fɔ 4 dez na ɛvin wit Gɔd ɛn in enjɛl dɛn?—

Nɔ-o. Yu mɛmba, Jizɔs bin se Lazarɔs de slip. Aw i kin tan lɛk we yu de slip? We yu de pan dip dip slip, yu nɔ kin no wetin de apin arawnd yu, nɔto so?— Ɛn we yu wek, yu nɔ kin no aw lɔng yu dɔn slip fɔ pas te yu wach tɛm.

Na so i kin bi fɔ pipul dɛn we dɔn day. Dɛn nɔ kin no natin. Dɛn nɔ kin fil natin. Ɛn dɛn nɔ kin ebul du ɛnitin. Na so Lazarɔs bin de di tɛm we i day. Day tan lɛk we pɔsin de pan  dip dip slip we i nɔ de mɛmba ɛnitin. Di Baybul se: “Dayman nɔ de no natin.”—Ɛkliziastis 9:5, 10.

Wetin bin apin to Lazarɔs we i day?

Tink bɔt dis: If Lazarɔs bin dɔn de na ɛvin fɔ 4 dez, yu nɔ tink se i fɔ bin tɔk sɔntin bɔt dat?— Ɛn if na ɛvin i bin de, yu tink se Jizɔs bin fɔ dɔn gi am layf bak fɔ kam na dis wɔl ɛn lɛf ɛvin we na fayn fayn ples?— Nɔ-o!

Bɔt bɔku pipul dɛn se wi gɛt sol, ɛn dɛn se da sol de kin liv ivin afta di bɔdi dɔn day. Dɛn se Lazarɔs in sol bin gɛt layf sɔnsay. Bɔt nɔto so di Baybul se. Di Baybul se Gɔd mek di fɔs man Adam gɛt layf. Adam na bin sol. Di Baybul tɔk bak se we Adam sin, i day. I nɔ bin gɛt layf igen, ɛn i go bak na di dɔti usay Jiova pul am. Di Baybul tɔk bak se ɔl di wan dɛn we na Adam in pikin dɛn dɔn gɛt sin ɛn dɛnsɛf de day.—Jɛnɛsis 2:7, NW; 3:17-19; Lɛta Fɔ Rom 5:12.

Wi dɔn si klia wan se wi nɔ gɛt sol we difrɛn frɔm wi bɔdi. Wi ɔl na sol. Ɛn bikɔs pipul dɛn dɔn gɛt sin frɔm di fɔs man,  we na Adam, di Baybul se: “Di sol we de kɔmit sin go day.”—Izikɛl 18:4.

Wetin mek wi nɔ fɔ fred dayman?

Sɔm pipul dɛn kin fred pɔsin we dɔn day. Dɛn nɔ de go nia bɛringrɔn bikɔs dɛn tink se dayman gɛt sol we difrɛn frɔm in bɔdi ɛn we go du dɛn bad. Bɔt yu tink se pɔsin we dɔn day go ebul du bad to pɔsin we gɛt layf?— Nɔ, i nɔ go ebul.

Sɔm pipul dɛn biliv se pɔsin we dɔn day go kam bak lɛk spirit fɔ kam fɛn di wan dɛn we gɛt layf. So na dat mek dɛn kin put it fɔ di wan dɛn we dɔn day. Bɔt di wan dɛn we de du dat nɔ rili biliv wetin Gɔd se bɔt pɔsin we dɔn day. If wi biliv wetin Gɔd se, wi nɔ go de fred dayman. Ɛn wi go sho se wi rili gladi fɔ di layf we Gɔd gi wi bay we wi de du wetin i want.

Bɔt yu go de wɔnda: ‘Gɔd go gi layf bak to pikin dɛn we dɔn day? Yu tink se i rili want fɔ du am?’ Lɛ wi tɔk bɔt dat na di ɔda chapta.

Lɛ wi rid mɔ bɔt wetin di Baybul se bɔt dayman ɛn sol, insay Sam 115:17; 146:3, 4 ɛn Jɛrimaya 2:34.