Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 4

Gɔd Gɛt Nem

Gɔd Gɛt Nem

WE YU mit pɔsin fɔ di fɔstɛm, yu go want fɔ no in nem, nɔto so?— Na tru. Wi ɔl gɛt nem. Gɔd gi nem to di fɔs mɔtalman na dis wɔl. I kɔl am Adam. Adam in wɛf bin nem Iv.

Bɔt nɔto mɔtalman nɔmɔ kin gɛt nem. Tink bɔt ɔda tin dɛn we gɛt nem. We yu gɛt dɔg ɔ pus, yu kin gi am nem, nɔto so?— Yɛs, fɔ gɛt nem rili impɔtant.

Luk di bɔku bɔku sta dɛn na di skay. Yu tink se dɛn gɛt nem?— Yɛs, Gɔd gi ɔl di sta dɛn nem. Di Baybul tɛl wi se Gɔd de kɔnt ɔl di sta dɛn, ɛn “i no dɛn ɔl nem.”—Sam 147:4.

Yu no se ɔl di sta dɛn gɛt nem?

Udat yu go se na di pɔsin we impɔtant pas ɔlman na di wan ol wɔl?— Yɛs, na Gɔd. Yu tink se Gɔd gɛt nem?— Jizɔs sɛf bin tɔk se Gɔd gɛt nem. Wan tɛm Jizɔs pre to in Papa se: ‘A dɔn mek mi disaypul dɛn no yu nem.’ (Jɔn 17:26, NW) Yu sabi Gɔd in nem?— Gɔd insɛf sɛf tɛl wi wetin na in nem. I se: “Mi na Jiova. Na dat na mi nem.” So Gɔd in nem na JIOVA.—Ayzaya 42:8, NW.

Aw yu kin fil we ɔda pipul dɛn mɛmba yu nem?— Yu kin gladi, nɔto so?— Jiova insɛf want mek pipul dɛn no in nem. So wi fɔ de yuz Jiova in nem we wi de tɔk bɔt am. Jizɔs, we na di Gret Ticha, bin de yuz Gɔd in nem Jiova we i bin de tɔk to pipul dɛn. Wan tɛm Jizɔs bin se: “Una fɔ lɛk Jiova una Gɔd wit ɔl una at.”—Mak 12:30, NW.

 Jizɔs bin no se Gɔd in nem we na “Jiova,” rili impɔtant. Na dat mek i bin tich in disaypul dɛn fɔ yuz Gɔd in nem. I bin tich dɛn bak fɔ yuz Gɔd in nem we dɛn de pre. Jizɔs bin no se Gɔd want mek ɔlman sabi In nem we na Jiova.

Trade trade Gɔd bin sho wan Izrɛlayt man we nem Mozis aw In nem Jiova impɔtant. Di Izrɛlayt dɛn bin de liv na Ijipt. Dɛn bin de kɔl di pipul dɛn we bin de na Ijipt, di Ijipshian dɛn. Dɛn bin tɔn di Izrɛlayt dɛn to slev ɛn dɛn bin de trit dɛn bad bad wan. We Mozis big, i tray fɔ ɛp wan pan in pipul dɛn. Dat bin mek Fɛro, we na bin di kiŋ na Ijipt, vɛks bad bad wan. I bin want fɔ kil Mozis! So Mozis rɔnawe kɔmɔt na Ijipt.

Mozis go na wan ɔda ples we dɛn kɔl Midian. Na de i mared ɛn bigin bɔn pikin dɛn. In na pɔsin we bin de mɛn ship dɛn. Wan de we Mozis bin de  kia fɔ in ship dɛn nia wan mawnten, i si wan wɔndaful tin. I bin si plant we gɛt chuk chuk de kech faya, bɔt i nɔ bin de bɔn! Mozis bin go nia de fɔ si wetin de rili apin.

Yu no wetin bin apin?— Mozis bin yɛri vɔys we kɔmɔt midul di chuk chuk plant we bin de kech faya. Di vɔys bin de kɔl am se, “Mozis, Mozis.” Udat bin de kɔl am?— Na Gɔd bin de kɔl am! Gɔd bin gɛt bɔku wok we i bin want Mozis fɔ du fɔ am. Gɔd bin se: ‘A de sɛn yu to di kiŋ na Ijipt, we nem Fɛro, fɔ go pul mi pipul dɛn kɔmɔt na Ijipt.’ Gɔd bin prɔmis se i go ɛp Mozis fɔ du dat.

Us impɔtant tin Mozis lan frɔm di chuk chuk plant we bin de kech faya?

Bɔt Mozis bin se: ‘If a go to di Izrɛlayt dɛn ɛn tɛl dɛn se Gɔd sɛn mi to una ɛn dɛn nɔ biliv mi, ɛn dɛn aks mi se, “wetin nain nem,” wetin a fɔ ansa dɛn se.’ Gɔd bin tɛl Mozis fɔ tɛl di Izrɛlayt dɛn se: ‘Na Jiova sɛn mi to una. Na Jiova na mi nem sote go.’ (Ɛksodɔs 3:1-15; NW) Dis sho se na da nem de i go de yuz. I nɔ  go ɛva chenj am. Gɔd want mek pipul dɛn no in nem we na Jiova, sote go.

Aw Gɔd mek pipul dɛn no in nem na di Rɛd Si?

We Mozis bin go bak na Ijipt, di Ijipshian dɛn bin tink se Jiova na jɔs smɔl gɔd we di Izrɛlayt dɛn gɛt. Dɛn nɔ bin tink se na in na di Gɔd fɔ di wan ol wɔl. So Jiova bin tɛl di kiŋ na Ijipt se: ‘A go mek ɔlman na di wɔl no mi nem.’ (Ɛksodɔs 9:16, NW) Ɛn Jiova bin mek ɔlman no in nem. Yu no aw i bin du dat?—

Wɛl, i bin mek Mozis lid di Izrɛlayt dɛn kɔmɔt na Ijipt. We dɛn rich na di Rɛd Si, Jiova bin mek dray land midul di wata fɔ mek dɛn go krɔs. Di Izrɛlayt dɛn bin krɔs na di dray land ɛn natin nɔ bin du dɛn. Bɔt we Fɛro ɛn ɔl in sojaman dɛn go fɔ krɔs na di dray land, di wata we bin sheb midul kɔba dɛn ɔl ɛn dɛn ɔl bin day.

Kwik kwik wan pipul dɛn ɔlsay na di wɔl bigin fɔ yɛri wetin Jiova dɔn du na di Rɛd Si. Aw wi no se dɛn bin yɛri bɔt dis tin we apin?— Wɛl, lɛk 40 ia leta, di Izrɛlayt dɛn bin kam na Kenan, we na di land we Jiova prɔmis fɔ gi dɛn. Na de tu Izrɛlayt dɛn mit wan uman we nem Reab, ɛn i tɛl dɛn  se: ‘Wi bin dɔn yɛri bɔt aw Jiova mek di Rɛd Si dray fɔ lɛ di Izrɛlayt dɛn krɔs we dɛn bin de kɔmɔt na Ijipt.’—Jɔshwa 2:10.

Tide bɔku pipul dɛn na di wɔl jɔs tan lɛk di Ijipshian dɛn. Dɛn nɔ biliv se na Jiova na di Gɔd fɔ di wan ol wɔl. So Jiova want mek in pipul dɛn tɛl ɔda pipul dɛn bɔt am. Na dis Jizɔs bin du. Bifo di tɛm we i bin fɔ day, i pre to Jiova se: “A dɔn mek dɛn no yu nem.”—Jɔn 17:26, NW.

Jizɔs bin mek pipul dɛn no Gɔd in nem. Yu go ebul fɔ du di sem tin?

 Yu want fɔ tan lɛk Jizɔs? Wɛl, yu fɔ tɛl ɔda pipul dɛn se Gɔd in nem na Jiova. Yu go si se bɔku pipul dɛn nɔ no dat. Wan rizin na dat sɔm pan di pipul dɛn we translet di Baybul pul Gɔd in nem ɛn put “PAPA GƆD.” Bɔt insay bɔku Inglish Baybul dɛn yu go si Gɔd in nem na Sam 83:18. We dɛn translet am insay Krio, dis skripchɔ se, “Lɛ pipul dɛn no se, yu we nem Jiova, na yu wangren de oba ɔlman na di wɔl.”

Wetin wi lan frɔm dis skripchɔ?— Yɛs, wi lan se Jiova in nem impɔtant pas ɔl di nem dɛn na di wɔl. Na di Ɔlmayti Gɔd in nem, di Wan we na Jizɔs in Papa, ɛn di Wan we mek ɔltin. Ɛn mɛmba se Jizɔs bin tɛl wi se wi fɔ lɛk Jiova Gɔd wit ɔl wi at. Yu lɛk Jiova?—

Aw wi go sho se wi lɛk Jiova?— Wan we we wi go sho se wi lɛk Jiova na we wi tray fɔ no am lɛk wi Padi. Ɔda we we wi go sho se wi lɛk am na we wi tɛl ɔda pipul dɛn wetin na in nem. Wi kin tɛl dɛn bak bɔt di wɔndaful tin dɛn we Jiova dɔn mek ɛn di gud tin dɛn we i dɔn du. Dis go mek Jiova gladi pasmak bikɔs i want mek pipul dɛn no am. Wisɛf kin ɛp fɔ du dat, nɔto so?—

Nɔto ɔlman go lisin we wi de tɔk to dɛn bɔt Jiova. Bɔku pipul dɛn nɔ bin lisin ivin we Jizɔs, di Gret Ticha, bin de tɔk bɔt Am. Bɔt dat nɔ bin mek Jizɔs stɔp fɔ tɔk bɔt Jiova.

So lɛ wisɛf bi lɛk Jizɔs. Lɛ wi kɔntinyu fɔ tɔk bɔt Jiova. If wi du dat, Jiova Gɔd go gladi fɔ wi bikɔs wi sho se wi lɛk in nem.

Naw una rid mɔ skripchɔ dɛn na di Baybul we de sho se Gɔd in nem rili impɔtant: Ayzaya 12:4, 5, NW; Matyu 6:9, NW; Jɔn 17:6, NW; ɛn Lɛta Fɔ Rom 10:13, NW.