Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 18

Yu Kin Mɛmba fɔ Tɛl Tɛnki?

Yu Kin Mɛmba fɔ Tɛl Tɛnki?

YU IT tide?— Yu no udat mek di it?— Sɔntɛm na yu mama mek am ɔ na ɔda pɔsin, bɔt wetin mek yu fɔ tɛl Gɔd tɛnki fɔ di it?— Na bikɔs na Gɔd de mek it de gro. Bɔt wi fɔ tɛl di pɔsin we mek di it ɛn di pɔsin we gi wi di it tɛnki.

Sɔntɛnde wi kin fɔgɛt fɔ tɛl tɛnki we ɔda pipul dɛn du gud tin fɔ wi, nɔto so? We di Gret Ticha bin de na dis wɔl, sɔm pipul dɛn bin de we bin gɛt wan sik we nem lɛprɔsi ɛn dɛn bin fɔgɛt fɔ tɛl tɛnki.

Yu no wetin na lɛprɔsi?— Lɛprɔsi na wan sik we de mek pɔsin in bɔdi de it-it ɛn kɔt kɔmɔt. We Jizɔs bin de na di wɔl, pipul dɛn we gɛt lɛprɔsi nɔ bin de liv wit ɔda pipul dɛn; dɛn bin de liv fawe. Ɛn if pɔsin we gɛt lɛprɔsi si ɔda pɔsin de kam, i fɔ ala fɔ wɔn di pɔsin mek i nɔ kam nia am. Dɛn bin de du dis so dat ɔda pipul dɛn nɔ go kam nia dɛn ɛn gɛt di sik.

Jizɔs bin gud to pipul dɛn we gɛt lɛprɔsi. Wan de we Jizɔs bin de go na Jerusɛlɛm, i bin want fɔ pas na wan smɔl tɔŋ. We i de nia di tɔŋ, tɛn pipul dɛn we gɛt lɛprɔsi kam mit am. Dɛn bin dɔn yɛri se Gɔd dɔn gi Jizɔs pawa fɔ mɛn ɔlkayn sik.

Di pipul dɛn we gɛt lɛprɔsi nɔ kam nia Jizɔs. Dɛn tinap fawe. Bɔt dɛn biliv se Jizɔs ebul fɔ mɛn dɛn sik. So we dɛn si di Gret Ticha, dɛn tɔk se: ‘Jizɔs, Ticha, ɛp wi!’

 Yu kin sɔri fɔ pipul dɛn we sik?— Jizɔs bin de sɔri fɔ dɛn kayn pipul dɛn de. I bin no se pɔsin we gɛt lɛprɔsi in at kin pwɛl. So i bin tɛl dɛn se: ‘Una go to di prist dɛn.’—Lyuk 17:11-14.

Wetin Jizɔs de tɛl dɛn man ya we gɛt lɛprɔsi fɔ du?

Wetin mek Jizɔs bin tɛl dɛn fɔ du dat? Na bikɔs na dat Jiova in lɔ bin se. Di lɔ bin se di prist fɔ luk pɔsin we gɛt lɛprɔsi. Na di prist go tɛl am if ɔl di sik dɔn dɔn na in bɔdi. We pɔsin we gɛt lɛprɔsi wɛl, i kin go de bak wit ɔda pipul dɛn.—Lɛvitikɔs 13:16, 17.

Bɔt dɛn pipul dɛn ya bin stil gɛt di sik. So yu tink se dɛn go to di prist jɔs lɛk aw Jizɔs bin tɛl dɛn?— Yɛs, dɛn go wantɛm  wantɛm. I go mɔs bi se dɛn man ya bin biliv se Jizɔs go pul di sik pan dɛn. Wetin apin afta dat?

Wɛl, we dɛn bin de go to di prist, dɛn ɔl wɛl. Di sik kɔmɔt na dɛn bɔdi. Dɛn bin wɛl bikɔs dɛn biliv se Jizɔs gɛt pawa fɔ mɛn dɛn. Dɛn bin rili gladi! Bɔt wetin yu tink se dɛn fɔ du fɔ sho se dɛn gɛt tɛnki? If na bin yu, wetin yu bin fɔ dɔn du?—

Wetin dis man we gɛt lɛprɔsi mɛmba fɔ du?

Wan pan di man dɛn we Jizɔs mɛn bin kam bak to Jizɔs. I bigin fɔ tɛl Jiova Gɔd tɛnki ɛn tɔk gud tin dɛn bɔt am. Na bin di rayt tin dat fɔ du bikɔs na Gɔd gi Jizɔs pawa fɔ mɛn am. Di man nil dɔŋ bifo di Gret Ticha ɛn tɛl am tɛnki. I bin rili gladi fɔ wetin Jizɔs dɔn du fɔ am.

Bɔt we di ɔda nayn man dɛn? Jizɔs bin aks se: ‘Nɔto tɛn pipul dɛn a mɛn, we di ɔda nayn? Fɔ se na wangren wan kam bak fɔ kam prez Gɔd?’

Yɛs, pan di tɛn pipul dɛn we Jizɔs mɛn na wangren pɔsin nɔmɔ kam bak fɔ kam prez Gɔd ɛn tɛl Jizɔs  tɛnki. Ɛn dis pɔsin we kam bak na Samɛritan, na pɔsin we kɔmɔt na ɔda kɔntri. Di ɔda nayn man dɛn nɔ kam bak fɔ tɛl Gɔd tɛnki ɛn dɛn nɔ tɛl Jizɔs tɛnki.—Lyuk 17:15-19.

Pan dɛn tɛn man dɛn ya, uswan yu go want fɔ bi? Yu go want fɔ tan lɛk di Samɛritan, nɔto so?— So we pɔsin du gud tin fɔ wi, wetin wi fɔ mɛmba fɔ se?— Wi fɔ se tɛnki. Bɔku tɛm pipul dɛn kin fɔgɛt fɔ tɛl tɛnki. Bɔt i fayn fɔ de tɛl tɛnki. We yu tɛl tɛnki, Jiova ɛn in Pikin, Jizɔs, de gladi.

Aw yu go falamakata da man we gɛt lɛprɔsi, we bin kam bak to Jizɔs?

If yu tek tɛm tink bɔt dis, yu go mɛmba se pipul dɛn dɔn du bɔku tin dɛn fɔ yu. Fɔ ɛgzampul, yu kin sik?— Sɔntɛm yu nɔ ɛva sik yet lɛk dɛn tɛn man dɛn ya bɔt yu go dɔn gɛt bad kol ɔ yu bɛlɛ go dɔn at. Na sɔmbɔdi bin kia fɔ yu?— Dɛn go dɔn gi yu mɛrɛsin ɛn du ɔda tin dɛn fɔ yu. Yu bin gladi we dɛn kia fɔ yu te yu wɛl, nɔto so?—

Di Samɛritan man bin tɛl Jizɔs tɛnki fɔ we i mek i wɛl ɛn dis bin mek Jizɔs gladi. Yu nɔ tink se yu mama ɛn papa go gladi we yu tɛl dɛn tɛnki we dɛn du sɔntin fɔ yu?— Yɛs, dɛn go gladi.

Wetin mek i impɔtant fɔ mɛmba fɔ tɛl tɛnki?

Sɔm pipul dɛn kin du sɔntin fɔ yu ɛvride ɔ ɛvri wik. Sɔntɛm na dɛn wok dɛn de du. Dɛn kin ivin gladi fɔ du am. Bɔt  sɔntɛnde yu kin fɔgɛt fɔ tɛl dɛn tɛnki. Yu ticha na skul go de tray tranga wan fɔ ɛp yu fɔ lan. Na in wok i de du. Bɔt i go gladi if yu tɛl am tɛnki fɔ we i de ɛp yu fɔ lan.

Sɔntɛnde pipul dɛn kin du smɔl smɔl tin dɛn fɔ yu. Sɔmbɔdi dɔn ɛva ɛp yu fɔ ol sɔntin we ebi? Ɔ sɔmbɔdi dɔn ɛva gi yu wata we yu de it? I fayn fɔ mek yu tɛl tɛnki we pɔsin du dɛn af-af tin dɛn ya fɔ yu.

If wi mɛmba fɔ tɛl tɛnki to pipul dɛn we de na dis wɔl, dat go mek wi mɛmba fɔ tɛl tɛnki to wi Papa we de na ɛvin. Bɔku tin dɛn de we wi fɔ tɛl Jiova tɛnki fɔ! Na in gi wi layf ɛn ɔl di gud tin dɛn we de mek wi ɛnjɔy layf. So wi gɛt bɔku rizin we fɔ mek wi prez Gɔd ɛn tɔk gud tin dɛn bɔt am ɛvride.

Rid dɛn vas dɛn ya na di Baybul we go ɛp wi fɔ no se wi fɔ de tɛl tɛnki: Sam 92:1; Lɛta Fɔ Ɛfisɔs 5:20; Lɛta Fɔ Kɔlɔse 3:17; ɛn Fɔs Lɛta Fɔ Tɛsalonayka 5:18.