Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 45

Wetin Na Gɔd in Kiŋdɔm? Aw Wi Go Sho se Wi Want Mek I Rul Wi?

Wetin Na Gɔd in Kiŋdɔm? Aw Wi Go Sho se Wi Want Mek I Rul Wi?

YU SABI di prea we Jizɔs bin tich in disaypul dɛn?— If yu nɔ sabi, lɛ wi rid am na di Baybul na Matyu 6:9-13 (NW). Dis prea we bɔku pipul dɛn kin kɔl di Lɔds Prea tɔk se: “Lɛ yu Kiŋdɔm kam.” Yu no wetin na Gɔd in Kiŋdɔm?—

Wɛl, na kiŋ kin rul na sɔm kɔntri ɔ sɔm eria dɛn. Ɛn dɛn kɔl in gɔvmɛnt, Kiŋdɔm. Na ɔda kɔntri dɛn, dɛn kɔl di pɔsin we de bifo na di gɔvmɛnt, di prɛsidɛnt. Aw dɛn kɔl di Wan we de rul na Gɔd in gɔvmɛnt?— Dɛn kɔl am Kiŋ. Na dat mek dɛn kɔl Gɔd in gɔvmɛnt Kiŋdɔm.

Yu no udat Jiova Gɔd dɔn pik fɔ bi di Kiŋ na in gɔvmɛnt?— Na in Pikin, Jizɔs Krays. Wetin mek i bɛtɛ pas ɛnibɔdi we mɔtalman go pik?— Na bikɔs Jizɔs rili lɛk in Papa, Jiova. So ɔltɛm i de du wetin rayt.

 Lɔng tɛm bifo dɛn bɔn Jizɔs na Bɛtliɛm, di Baybul bin dɔn tɔk am, ɛn i se na in go bi di wan we Gɔd dɔn pik fɔ rul. Lɛ wi rid bɔt dis na Ayzaya 9:6, 7. I se: ‘Dɛn dɔn bɔn wan pikin gi wi, dɛn dɔn gi wi bɔypikin ɛn na in ed di gɔvmɛnt go de, ɛn in nem we dɛn go kɔl am, na Prins ɔf pis. in gɔvmɛnt in bɛtɛ wan ɛn fɔ kol at, dat go de sote go.’

Yu no wetin mek di vas kɔl di Wan we de rul Gɔd in Kiŋdɔm “Prins”?— Wɛl, prins na kiŋ in pikin. Ɛn Jizɔs na di Kiŋ we pas ɔlman in Pikin, ɛn da Kiŋ de na Jiova. Jiova dɔn mek Jizɔs bi Kiŋ fɔ In gɔvmɛnt we go rul di wɔl fɔ wan tawzin ia. (Rɛvɛleshɔn 20:6) Afta we Jizɔs baptayz, ‘i bigin prich se, “Una chenj una we ɛn lɛf fɔ du di bad tin dɛn we una de du, bikɔs Gɔd in Kiŋdɔm dɔn kam nia.”’—Matyu 4:17.

Wetin mek yu tink se Jizɔs tɔk se di Kiŋdɔm dɔn kam nia?— Na bikɔs di Kiŋ we go rul leta na ɛvin, bin de wit dɛn! Na dat mek Jizɔs tɛl di pipul dɛn se: “Gɔd in Kiŋdɔm de wit una.” (Lyuk 17:21, NW) Yu go lɛk fɔ mek Jiova in Kiŋ de nia yu so dat yu go ebul fɔ tɔk to am?—

So tɛl mi, us impɔtant wok Jizɔs kam du na di wɔl?— Jizɔs ansa da kwɛstyɔn de bay we i se: ‘A fɔ go na ɔda tɔŋ dɛn fɔ tɛl ɔda pipul dɛn di gud nyus bɔt Gɔd in Kiŋdɔm bikɔs na dat Gɔd sɛn mi fɔ kam du na di wɔl.’ (Lyuk 4:43) Jizɔs bin no se in wangren nɔ go ebul du di prichin wok. So, wetin yu tink se i du?—

Us wok Jizɔs kam du na di wɔl?

Jizɔs kɛr pipul dɛn go we i de prich ɛn sho dɛn aw fɔ prich. Di fɔs wan dɛn we i tren na 12 disaypul  dɛn we i bin leta pik as in apɔsul dɛn. (Matyu 10:5, 7) Bɔt yu tink se na in apɔsul dɛn nɔmɔ i tren fɔ du dis wok? Nɔ, di Baybul se Jizɔs tren bɔku ɔda wan dɛn fɔ prich. As tɛm de go, i sɛn 70 ɔda disaypul dɛn. I sɛn dɛn tu tu. Ɛn wetin dɛn bin de tich pipul dɛn?— Jizɔs se: ‘Una go tɛl pipul dɛn se, “Gɔd in Kiŋdɔm dɔn kam nia.”’ (Lyuk 10:9) Na da we de pipul dɛn lan bɔt Gɔd in gɔvmɛnt.

Trade trade na Izrɛl, nyu kiŋ dɛn kin rayd pan yɔŋ dɔnki fɔ kam insay di siti fɔ sho dɛnsɛf to di pipul dɛn. So na dis Jizɔs du we i bin de go Jɛrusɛlɛm fɔ di las tɛm. As wi bin dɔn lan, na Jizɔs gɛt fɔ bi di Rula na Gɔd in Kiŋdɔm. Yu tink se di pipul dɛn bin want am fɔ bi dɛn Kiŋ?—

Wɛl, as i bin de rayd de go, bɔku pipul dɛn bigin fɔ prɛd dɛn klos dɛn na di rod. Ɔda wan dɛn kɔt branch dɛn na stik ɛn put dɛn na di rod. We dɛn du dis, dɛn sho se dɛn want Jizɔs fɔ bi dɛn Kiŋ. Dɛn bin de ala se: “Gɔd blɛs di Kiŋ we i dɔn sɛn fɔ kam tinap fɔ am!” Bɔt nɔto ɔlman bin gladi. Infakt, sɔm edman dɛn pan Gɔd biznɛs bin ivin tɛl Jizɔs se: “Tɛl yu lanin bɔy dɛn mek dɛn sɛt dɛn mɔt.”—Lyuk 19:28-40.

Wetin mek di pipul dɛn disayd se dɛn nɔ want Jizɔs fɔ bi dɛn Kiŋ igen?

Afta fayv dez, dɛn ol Jizɔs ɛn kɛr am go to di gɔvnɔ, we nem Pɔntiɔs Paylet. Jizɔs in ɛnimi dɛn se Jizɔs bin de tɔk se in na kiŋ, ɛn i de agens di Roman gɔvmɛnt. So Paylet aks Jizɔs bɔt dis. Jizɔs tɛl am se i nɔ de tray fɔ tek in gɔvmɛnt. I tɛl Paylet se: “Mi nɔto Kiŋ na dis wɔl.”—Jɔn 18:36.

Paylet go na do ɛn tɛl di pipul dɛn se Jizɔs nɔ du no bad. Bɔt di pipul dɛn nɔ want Jizɔs fɔ bi dɛn Kiŋ igen. Dɛn nɔ want lɛ Paylet fri am. (Jɔn 18:37-40) Afta Paylet dɔn tɔk wit Jizɔs bak, Paylet bin shɔ se Jizɔs nɔ du bad tin. So wan tɛm mɔ, Paylet  kam wit Jizɔs na do ɛn tɔk se: “Una luk una Kiŋ!” Bɔt di pipul dɛn ala se: “Kɛr am go! Kɛr am go! Go ɛng am na di stik!”

Paylet aks dɛn se: “Lɛ a kil una kiŋ?” Di bigman dɛn pan di prist dɛn se: “Wi nɔ gɛt ɛni ɔda kiŋ pas Siza.” Yu ebul fɔ imajin dat? Dɛn wikɛd prist dɛn bin ebul fɔ tɔn di pipul dɛn agens Jizɔs!—Jɔn 19:1-16; NW.

Tide bak na di sem tin de apin. Bɔku pipul dɛn nɔ rili want Jizɔs fɔ bi dɛn Kiŋ. Dɛn de tɔk  se dɛn biliv Gɔd bɔt dɛn nɔ want lɛ Gɔd ɔ Krays tɛl dɛn wetin fɔ du. Dɛn want dɛn yon gɔvmɛnt fɔ de na dis wɔl.

Wetin wi tink bɔt dis? We wi lan bɔt Gɔd in Kiŋdɔm ɛn ɔl di fayn fayn tin dɛn we i go du, aw dat fɔ mek wi fil bɔt Gɔd?— Wi fɔ lɛk am, nɔto so?— So aw wi go sho se wi lɛk Gɔd, ɛn wi want fɔ de ɔnda in Kiŋdɔm?—

Wetin mek Jizɔs baptayz?

Wi kin sho Gɔd se wi lɛk am bay we wi falamakata Jizɔs in ɛgzampul. Wetin Jizɔs du fɔ sho se i lɛk Jiova?— I bin se: “Ɔltɛm a de du dɛn tin we i lɛk.” (Jɔn 8:29) Jizɔs bin kam na di wɔl fɔ ‘du ɔl wetin Gɔd want.’ (Jɔn 4:34; Di Ibru Pipul Dɛn 10:7) Lɛ wi tɔk bɔt wetin Jizɔs du bifo i bigin prich.

Jizɔs bin go to Jɔn we de baptayz pipul dɛn, na di Jɔdan Riva. Afta dɛn go insay di wata, Jɔn put Jizɔs ɔnda di wata, ɛn i es am ɔp bak. Yu no wetin mek Jɔn baptayz Jizɔs?—

Usay-ɛn-usay wi kin tɔk to ɔda pipul dɛn bɔt Gɔd in Kiŋdɔm?

Na Jizɔs tɛl Jɔn fɔ du am. Bɔt aw wi no se Gɔd bin want lɛ Jizɔs baptayz?— Wi no dat bikɔs we Jizɔs kɔmɔt ɔnda  di wata, i yɛri Gɔd in vɔys frɔm ɛvin se: “Yu na mi yon Pikin we a lɛk ɛn a gladi fɔ yu!” Gɔd ivin sɛn in oli spirit fɔ kam pan Jizɔs lɛk dɔv. So we Jizɔs baptayz, i sho se i want fɔ wɔship Jiova sote go.—Mak 1:9-11.

Bɔt naw yu na pikin stil. Wetin yu go du we yu big smɔl?— Yu go lɛk fɔ falamakata Jizɔs ɛn baptayz?— Yu fɔ falamakata am, bikɔs di Baybul se “i dɔn lɛf ɛgzampul fɔ una, so dat una go fala in fut mak gud gud wan.” (Pita In Fɔs Lɛta 2:21, NW) We yu baptayz, yu de sho se yu rili want fɔ de ɔnda Gɔd in Kiŋdɔm. Bɔt nɔto dat nɔmɔ yu fɔ du.

Wi nid fɔ du ɔl wetin Jizɔs dɔn tich wi. Jizɔs bin se wi ‘nɔ fɔ si wan we wit di pipul dɛn na di wɔl.’ Yu tink se wi go de obe am if wi put an pan di tin dɛn we de apin na di wɔl? Jizɔs ɛn in apɔsul dɛn nɔ bin put an pan dɛn tin dɛn de. (Jɔn 17:14) Wetin yu tink se dɛn du?— Dɛn tɔk to ɔda pipul dɛn bɔt Gɔd in Kiŋdɔm. Dat na bin impɔtant wok we dɛn bin de du. Yu tink se wisɛf ebul du am?— Yɛs, wi go du am if wi min wetin wi de se we wi pre fɔ lɛ Gɔd in Kiŋdɔm kam.

Duya rid ɔda skripchɔ dɛn we de tɛl wi wetin wi fɔ du fɔ sho se wi want lɛ Gɔd in Kiŋdɔm kam: Matyu 6:24-33; 24:14; Jɔn In Fɔs Lɛta 2:15-17; ɛn 5:3.