Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 15

Wan Stori we De Sho se Wi Fɔ Du Gud

Wan Stori we De Sho se Wi Fɔ Du Gud

YU TINK se i fayn fɔ tink bad bɔt ɔda pɔsin ivin bifo yu rili sabi am?— Nɔ-o, i nɔ fayn. Dis min se wi nɔ lɛk di pɔsin jɔs bikɔs i difrɛn frɔm wi ɔ i de tɔk ɔda langwej.

Yu tink se i rayt fɔ tink da we de?— Nɔ, i nɔ rayt ɛn i nɔ de sho se wi na gud pɔsin. Wi nɔ fɔ trit ɔda pɔsin bad jɔs bikɔs i difrɛn frɔm wi.

Tink bɔt dis. Yu sabi ɛnibɔdi we gɛt difrɛn kɔlɔ frɔm wi ɔ we de tɔk langwej we wi nɔ de tɔk?— Sɔntɛm yu ivin sabi pipul dɛn we difrɛn frɔm yu bikɔs sɔm pat na dɛn bɔdi ambɔg ɔ dɛn gɛt sik. Yu de du gud to di wan dɛn we difrɛn frɔm yu?—

Aw wi fɔ trit di wan dɛn we luk difrɛn frɔm wi?

If wi lisin to di Gret Ticha, Jizɔs Krays, wi nɔ go du bad to ɛnibɔdi. Wi nɔ fɔ wɔri bɔt us kɔntri di pɔsin kɔmɔt, ɔ if in kɔlɔ difrɛn frɔm wi yon. Wi fɔ stil du gud to am. Dis na lɛsin we Jizɔs Krays tich wi, pan ɔl we nɔto dat bɔku pipul dɛn biliv. Lɛ wi tɔk bɔt dat.

Wan man we na Ju we nɔ bin lɛk ɔda pɔsin we difrɛn frɔm am, bin kam to Jizɔs ɛn aks am se, ‘Wetin a fɔ du fɔ gɛt layf we go de sote go?’ Jizɔs bin no se dis man bin want lɛ i tɔk se na di wan dɛn nɔmɔ we dɛn ɔl gɛt di sem kɔlɔ ɔ we de tɔk di sem langwej i fɔ du gud to. Jizɔs nɔ bin ansa di kwɛstyɔn fɔ am, bifo dat, i aks am se: ‘Wetin Gɔd in Lɔ se wi fɔ du?’

Di man ansa se: ‘Yu fɔ lɛk Jiova we na yu Gɔd wit ɔl yu at, ɛn yu fɔ lɛk yu neba lɛk aw yu lɛk yusɛf.’ Jizɔs tɛl am se: ‘Yu ansa  fayn. Go du wetin yu jɔs tɔk so ɛn yu go gɛt di layf we go de sote go.’

Bɔt di man nɔ bin want fɔ lɛk ɔ du gud to pipul dɛn we difrɛn frɔm am. So i tray fɔ fɛn ɛkskyuz. I aks Jizɔs se: “Udat na mi neba?” I go mɔs bi se i bin want lɛ Jizɔs se: “Yu neba dɛn na yu padi dɛn” ɔ, “Na pipul dɛn we yu ɛn dɛn na di sem.” Fɔ ansa di man in kwɛstyɔn, Jizɔs pul wan stori bɔt wan Ju ɛn wan Samɛritan. Na so di stori go.

Wan man bin kɔmɔt Jerusɛlɛm de go Jɛriko. Dis man na bin Ju. As i de waka go, tifman dɛn kech am. Dɛn ib am na grɔn ɛn tek in mɔni ɛn in klos dɛn na in an. Dɛn bit am ɛn lɛf am fɔ mek i day na di rod.

Afta smɔl tɛm, wan prist kam pas na di rod. I si di man we dɛn dɔn bit bad bad wan. If na bin yu, wetin yu bin fɔ dɔn du?— Wɛl, di prist bin jɔs go in we ɛn pas na di ɔda say na di rod. I nɔ ivin stɔp. I nɔ du ɛnitin fɔ ɛp di man we dɛn dɔn bit.

 Dɔn wan ɔda man we lɛk Gɔd biznɛs kam pas na di rod. In na Livayt we de wok na di tɛmpul we de na Jerusɛlɛm. Yu tink se i go stɔp fɔ ɛp di man we dɛn dɔn bit?— Nɔ-o. I du di sem tin we di prist bin du.

Wan man we kɔmɔt Sameria kam pas. Yu de si am de kam na di rod?— I si di Ju man we dɛn dɔn bit bad bad wan ledɔm na grɔn. Bɔt bɔku Samɛritan ɛn Ju dɛn nɔ lɛk dɛnsɛf. (Jɔn 4:9) So yu tink se dis Samɛritan man go lɛf di man we ledɔm na grɔn ɛn nɔ ɛp am? Yu tink se i go tɔk to insɛf se: ‘Wetin mek a fɔ ɛp dis man we na Ju we dɛn dɔn bit? I bin fɔ ɛp mi if na mi dɛn bin bit’?

Wetin mek di Samɛritan man na gud neba?

 Wɛl, di Samɛritan man luk di man we ledɔm na di rod ɛn fil sɔri fɔ am. I nɔ bin gɛt maynd fɔ lɛf am de mek i day. So i kam dɔŋ in dɔnki ɛn go mit di man ɛn bigin fɔ kia fɔ in wund dɛn. I put ɔyl ɛn wayn na di wund. Dis go mek di wund dɛn wɛl. Dɔn i rap am fayn wit klos.

Di Samɛritan man tek tɛm put di man we dɛn dɔn bit, ɔp in dɔnki. Dɛn go saful saful te dɛn rich na wan smɔl otɛl, usay di Samɛritan man bin rɛnt ples fɔ di Ju man fɔ mek i go de de, ɛn i kia fɔ am gud wan.

We Jizɔs dɔn fɔ pul di stori, i aks di man we i bin de tɔk to, se: ‘Pan dɛn tri man ya we a jɔs tɔk bɔt so, uswan pan dɛn yu tink se na gud neba?’ Wetin yu go se? Na di prist, di Livayt, ɔ di Samɛritan?—

Di man ansa se: ‘Na di man we lɛf fɔ go usay i de go ɛn kia fɔ di man we dɛn bit na in na gud neba.’ Jizɔs se: ‘Na tru. Yusɛf go du di sem tin.’—Lyuk 10:25-37.

 Na fayn stori dis, nɔto so? I de mek wi no udat dɛn na wi neba dɛn. Wi neba nɔto jɔs wi tayt padi dɛn. Ɛn nɔto pipul dɛn nɔmɔ we wi ɔl gɛt di sem kɔlɔ ɔ we wi ɔl de tɔk di sem langwej. Jizɔs tich wi fɔ du gud to ɔlman, ilɛk usay dɛn kɔmɔt, aw dɛn bɔdi tan, ɔ di langwej we dɛn de tɔk.

Na so Jiova Gɔd tan. I lɛk ɔlman. Jizɔs se: ‘Una Papa we de na ɛvin de mek di san shayn pan bad pipul dɛn ɛn pan gud pipul dɛn. Ɛn i de mek ren kam pan gud pipul dɛn ɛn pan bad pipul dɛn.’ So wi fɔ du gud to ɔlman, jɔs lɛk aw Gɔd de du.—Matyu 5:44-48.

Aw yu go bi gud neba?

So if yu si sɔmbɔdi we bad tin apin to, wetin yu go du?— Wetin yu go du if di pɔsin kɔmɔt na ɔda kɔntri ɔ yu ɛn in nɔ gɛt di sem kɔlɔ? In na yu neba stil, ɛn yu fɔ ɛp am. If yu fil se yu tu smɔl fɔ ɛp, yu kin aks big pɔsin fɔ ɛp yu. Ɔ yu kin kɔl polisman ɔ ticha. If yu du dat, yu go de sho se yu gud, lɛk da Samɛritan man.

Di Gret Ticha want lɛ wi gud. I want lɛ wi ɛp ɔda pipul dɛn, ilɛk udat dɛn bi. Na dat mek i pul dis stori bɔt di gud Samɛritan.

Fɔ no mɔ bɔt aw fɔ du gud to pipul dɛn ilɛk us kɔntri dɛn kɔmɔt ɔ wetin na dɛn kɔlɔ, na fɔ rid Prɔvabs 19:22; Di Apɔsul Dɛn Wok [Akt] 10:34, 35; ɛn 17:26.