Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 41

Pikin dɛn We Mek Gɔd Gladi

Pikin dɛn We Mek Gɔd Gladi

US PIKIN na di wɔl yu tink se dɔn mek Jiova gladi pasmak?— Na in Pikin, Jizɔs. Lɛ wi tɔk bɔt sɔm tin dɛn we Jizɔs du fɔ mek in Papa we de na ɛvin gladi.

Frɔm usay Jizɔs in famili bin de to usay Jiova in tɛmpul bin de na Jerusɛlɛm, yu go waka tri dez. Jizɔs bin se di tɛmpul na in “Papa in os.” Ɛni ia, in ɛn in famili bin de go de tri tɛm fɔ go di Pasova.

Wan tɛm, we Jizɔs bin ol 12 ia, in famili bin de tɔn bak na dɛn os afta di Pasova. We dɛn stɔp na di ples usay dɛn fɔ slip, dɛn notis se Jizɔs nɔ de wit dɛn fambul dɛn ɛn padi dɛn. So wantɛm wantɛm Josɛf ɛn Meri go bak na Jerusɛlɛm fɔ go fɛn Jizɔs. Usay yu tink se i bin de?—

Dɛn si am na di tɛmpul. I bin de lisin to di ticha dɛn, ɛn i bin de aks dɛn kwɛstyɔn dɛn. Ɛn we dɛn aks am sɔntin, i bin de gi dɛn di ansa ɔltɛm. Dɛn bin sɔprayz we i bin de ansa dɛn fayn fayn wan. Yu si wetin mek Gɔd bin gladi fɔ in Pikin?—

We Josɛf ɛn Meri bin si Jizɔs, dɛn bin rili gladi. Bɔt Jizɔs nɔ bin wɔri sɛf. I no se di tɛmpul na gud ples fɔ de. So i bin aks dɛn se: “Una nɔ no se a fɔ de na mi Papa in Os?” I no se di tɛmpul na Gɔd in os, ɛn i bin lɛk fɔ de de.

Afta dat, Josɛf ɛn Meri tek Jizɔs ɛn go wit am na dɛn os na Nazarɛt. Aw yu tink se Jizɔs bin de trit in mama ɛn papa?—  Di Baybul se i kɔntinyu fɔ “yɛri dɛn wɔd.” I bin de du wetin in mama ɛn papa tɛl am fɔ du, ilɛksɛf dat min se i fɔ go gɛt wata na watawɛl.—Na wi mek am italiks; Lyuk 2:41-52.

Aw Jizɔs bin mek Gɔd gladi di tɛm we in na bin pikin?

So tink bɔt dis: Pan ɔl we Jizɔs nɔ wande sin, i bin stil de obe in mama ɛn papa we de sin. Yu tink se dis bin mek Gɔd gladi?— Yɛs. Wetin mek wi se so? Na bikɔs Gɔd in Wɔd tɛl pikin dɛn se: “Una we na pikin, una fɔ de du wetin di wan dɛn we bɔn una tɛl una fɔ du.” (Lɛta Fɔ Ɛfisɔs 6:1) Yusɛf kin mek Gɔd gladi if yu obe yu mama ɛn papa, jɔs lɛk Jizɔs.

Wan ɔda we fɔ mek Gɔd gladi na we yu de tɛl pipul dɛn bɔt am. Sɔm pipul dɛn go de tɔk se dis nɔto tin we yɔŋ pipul dɛn fɔ du. Bɔt we pipul dɛn bin want stɔp sɔm yɔŋ bɔbɔ dɛn fɔ du dis, Jizɔs bin se: ‘Una nɔ dɔn rid wetin rayt na Gɔd in Buk we se, “Gɔd dɔn lan yɔŋ pikin dɛn fɔ mek dɛn prez am gud gud  wan”?’ (Matyu 21:16) So wi ɔl ebul fɔ tɔk bɔt Jiova ɛn bɔt aw i wɔndaful, if wi rili want fɔ du am. If wi du dat, Gɔd go gladi.

Usay wi de lan bɔt Gɔd, we wi go yuz fɔ tɔk to ɔda pipul dɛn?— Na frɔm wi Baybul stɔdi we wi de du na os. Bɔt wi go lan mɔ na di ples usay Gɔd in pipul dɛn de mit fɔ stɔdi. Bɔt aw wi go ebul fɔ no udat na Gɔd in pipul dɛn?—

Wɛl, wetin dɛn pipul dɛn ya de du na dɛn mitin? Aks yusɛf dɛn kwɛstyɔn ya: Dɛn rili de tich wetin de insay di Baybul? Dɛn de rid ɛn tɔk bɔt am? Dat na di we aw wi kin lisin to Gɔd, nɔto so?— Na Kristian mitin dɛn, wi kin want fɔ yɛri wetin Gɔd se, nɔto so?— Bɔt wetin yu go du if pipul dɛn se yu nɔ fɔ liv yu layf jɔs lɛk aw di Baybul se? Yu tink se dɛn pipul dɛn de na Gɔd in pipul dɛn?—

Mek wi tink bɔt ɔda tin. Di Baybul se Gɔd in pipul dɛn go bi pipul dɛn we i dɔn tek “fɔ in nem.” (Di Apɔsul Dɛn Wok [Akt] 15:14) Ɛnti Gɔd in nem na Jiova, wi kin aks pipul dɛn if Jiova na dɛn Gɔd. If dɛn se nɔ, wi go no se dɛn nɔto Gɔd in pipul dɛn. Dɔn Gɔd in pipul dɛn de tɔk to ɔda pipul dɛn bɔt in Kiŋdɔm. Ɛn dɛn de sho se dɛn lɛk Gɔd bay we dɛn de du wetin i want.—Jɔn In Fɔs Lɛta 5:3.

If yu sabi pipul dɛn we de du ɔl dɛn tin ya, na fɔ jɔyn dɛn fɔ wɔship Gɔd. Yu fɔ lisin gud wan na di mitin ɛn gi ansa we dɛn aks kwɛstyɔn. Na dat Jizɔs bin du we i bin de na Gɔd in os. If yu du dɛn tin ya, yu go mek Gɔd gladi, jɔs lɛk Jizɔs.

Yu tink bɔt ɔda pikin dɛn we di Baybul tɔk bɔt we mek Gɔd gladi?— Timoti na bin wan fayn ɛgzampul. In papa nɔ bin  de wɔship Jiova. Bɔt in mama, Yunis, ɛn in grani, Lɔis, bin de wɔship Jiova. Timoti bin lisin to dɛn ɛn lan bɔt Jiova.

Pan ɔl we Timoti in papa nɔ bin de wɔship Jiova, wetin Timoti bin want fɔ du?

We Timoti big, di apɔsul Pɔl bin kam na di tɔŋ we i bin de. I kam no se Timoti want fɔ wɔship Jiova. So i kɔl Timoti fɔ jɔyn am fɔ wɔship Jiova mɔ. Dɛn bin de tɛl pipul dɛn bɔt Gɔd in Kiŋdɔm ɛn bɔt Jizɔs ɛnisay we dɛn go.—Di Apɔsul Dɛn Wok [Akt] 16:1-5; Sɛkɛn Lɛta To Timoti 1:5; 3:14, 15.

Bɔt yu tink se di ɛgzampul dɛn we de na di Baybul na bɔt bɔy pikin dɛn nɔmɔ we mek Gɔd gladi?— Nɔ-o. Mek wi tɔk bɔt wan smɔl Izrɛlayt gyal pikin we mek Gɔd gladi. Di tɛm we i bin de na di wɔl, di pipul dɛn na Sirya ɛn di pipul dɛn na Izrɛl na bin ɛnimi dɛn. Wan de, Sirya kam fɛt Izrɛl, ɛn dɛn kɛr dis smɔl titi go as slev. Dɛn kɛr am go na di os usay di bigman fɔ ɔl di sojaman dɛn bin de, ɛn di man bin  nem Neman. We i go de, i kam bi Neman in wɛf in savant.

Bɔt Neman bin gɛt wan sik we dɛn kɔl lɛprɔsi. No dɔktɔ nɔ bin ebul ɛp am. Bɔt dis titi we kɔmɔt Izrɛl bin biliv se wan pan Gɔd in prɔfɛt dɛn go ebul ɛp Neman. Mɛmba se Neman ɛn in wɛf nɔ de wɔship Jiova. So yu tink se dis titi fɔ tɛl dɛn wetin i sabi? If na bin yu, wetin yu fɔ dɔn du?—

Aw dis Izrɛlayt titi mek Gɔd gladi?

Di smɔl titi se: ‘If nɔmɔ Neman go go to Jiova in prɔfɛt na Izrɛl, i go mɛn in bad bad sik.’ Neman bin lisin to di titi ɛn go to Jiova in prɔfɛt. We i du wetin di prɔfɛt tɛl am, i bin wɛl. Dis bin mek Neman bigin fɔ wɔship di tru Gɔd.—Sɛkɛn Kiŋ 5:1-15.

Yu go lɛk fɔ ɛp sɔmbɔdi fɔ lan bɔt Jiova ɛn wetin i de du, lɛk aw dis titi bin du?— Udat yu tink se yu go ɛp?— Fɔs, dɛn nɔ kin tink se dɛn nid pɔsin fɔ ɛp dɛn. Bɔt yu kin tɔk to dɛn bɔt di gud tin dɛn we Jiova dɔn du. Ɛn sɔntɛm dɛn go lisin. If yu du dis, yu go mek Gɔd gladi.

Ɔda tin dɛn we go ɛnkɔrej yɔŋ pipul dɛn fɔ gladi we dɛn de wɔship Gɔd de na Sam 122:1; 148:12, 13; Ɛkliziastis 12:1; Fɔs Lɛta To Timoti 4:12; ɛn Di Ibru Pipul Dɛn 10:23-25.