Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 22

Wetin Mek Wi Nɔ Fɔ Lay?

Wetin Mek Wi Nɔ Fɔ Lay?

LƐ WI se wan smɔl titi tɛl in mama se: “A go kam na os jɔs afta a kɔmɔt skul.” Bɔt i te na skul de ple wit in padi dɛn ɛn we i kam na os, i tɛl in mama se: “Na mi ticha se mek a lɛf afta skul.” Yu tink se i fayn we i tɔk so?—

Us bad tin dis bɔbɔ dɔn du?

Ɔ sɔntɛm wan bɔbɔ tɛl in papa se: “Nɔto mi kik di bɔl insay os.” Bɔt if na in du am, yu tink se i bad fɔ mek i se nɔto in?—

Di Gret Ticha bin tɛl wi di rayt tin fɔ du. I se: “Jɔs mek yu ‘Yɛs’ bi yɛs, ɛn yu ‘Nɔ’ bi nɔ, bikɔs ɛnitin apat frɔm dis kɔmɔt frɔm di wikɛd wan.” (Matyu 5:37, NW) Wetin Jizɔs min we i tɔk dat?— I min se wi fɔ du wetin wi dɔn tɔk.

Wan stori de na di Baybul we de sho wetin mek i fayn fɔ tɔk di tru. Di stori de bɔt tu pipul dɛn we se dɛn na Jizɔs in disaypul. Lɛ wi si wetin bin apin.

 I nɔ rich tu mɔnt we Jizɔs day, bɔku pipul dɛn we bin de fa ples bin kam na Jerusɛlɛm fɔ wan impɔtant program we di Ju dɛn bin de kɔl Pɛntikɔst. Di apɔsul Pita bin gi wan fayn tɔk we i tɛl di pipul dɛn bɔt Jizɔs, we Jiova bin gi layf bak. Na di fɔs tɛm dis we bɔku pan di wan dɛn we kam na Jerusɛlɛm lan bɔt Jizɔs. Ɛn naw dɛn want fɔ no mɔ. So, wetin dɛn du?

Dɛn te pas aw dɛn fɔ te. So afta sɔm tɛm, sɔm pipul dɛn mɔni bin dɔn, ɛn dɛn nid pɔsin fɔ ɛp dɛn fɔ bay tin fɔ it. Di disaypul dɛn we de na Jerusɛlɛm want fɔ ɛp dɛn strenja dɛn ya. So bɔku pan dɛn sɛl dɛn tin dɛn ɛn briŋ di mɔni to Jizɔs in apɔsul dɛn. Ɛn di apɔsul dɛn gi di mɔni to di wan dɛn we nid am.

Ananayas ɛn in wɛf, Safayra, we de na di kɔngrigeshɔn na Jerusɛlɛm, sɛl dɛn land. Nɔbɔdi nɔ tɛl dɛn fɔ sɛl am. Na dɛn disayd fɔ du am. Bɔt wetin dɛn du nɔto bikɔs dɛn lɛk Jizɔs in nyu disaypul dɛn. Ananayas ɛn Safayra want mek pipul dɛn tink  se dɛn bɛtɛ pas aw dɛn rili de. So dɛn ɔl tu disayd se dɛn go tɛl di apɔsul dɛn se na ɔl di mɔni dɛn go gi fɔ ɛp ɔda pipul dɛn. Bɔt dɛn go gi af pan di mɔni ɛn tɔk se na ɔl dɛn gi. Wetin yu tink bɔt dat?—

Ananayas kam to di apɔsul dɛn. I gi di mɔni to dɛn. Bɔt Gɔd bin no se nɔto ɔl di mɔni dɛn gi. So Gɔd bin mek di apɔsul Pita no se Ananayas nɔ bin tɔk tru.

Us lay we Ananayas de lay to Pita?

Pita bin se: ‘Ananayas, wetin mek yu gri lɛ Setan mek yu du dis? Na yu bin gɛt di land. Yu nɔ bin nid fɔ sɛl am. Ɛn ivin we yu dɔn sɛl di land, na yu bin gɛt fɔ disayd wetin yu go du wit di mɔni. Bɔt wetin mek yu de mek lɛk se yu gi ɔl di mɔni we na af yu gi? Nɔto wi nɔmɔ yu lay pan o, yu lay pan Gɔd sɛf.’

Dis na sɔntin we siriɔs. Ananayas de lay! I nɔ bin du wetin i bin se i go du. I bin mek lɛk se i de du am. Di Baybul tɛl wi wetin bin apin leta. I se: ‘We Ananayas yɛri wetin Pita tɔk,  i fɔdɔm ɛn day.’ Na Gɔd kil am. Dɔn dɛn pul in bɔdi na do ɛn bɛr am.

Wetin apin to Ananayas we i lay?

We i dɔn pas lɛk tri awa so, Safayra kam. I nɔ bin no wetin dɔn apin to in man. So Pita aks am se: ‘Na ɔl di mɔni dis we dɛn pe una fɔ di land we una sɛl?’

Safayra ansa se: ‘Yɛs, na ɔl di mɔni dat.’ Bɔt dis na bin lay. Dɛn bin kip sɔm pan di mɔni we dɛn sɛl. So Gɔd bin mek Safayra insɛf day.—Di Apɔsul Dɛn Wok [Akt] 5:1-11.

Wetin wi lan frɔm wetin apin to Ananayas ɛn Safayra?— Dat de tich wi se Gɔd nɔ lɛk lay. I want lɛ wi tɔk tru ɔltɛm. Bɔt bɔku pipul dɛn se i nɔ bad fɔ lay. Yu tink se na tru dɛn de tɔk?— Yu no se na lay mek sik, pen, ɛn day kam na dis wɔl?—

Udat Jizɔs bin se lay di fɔs lay?

Mɛmba se na Setan lay to di fɔs uman we na Iv. I tɛl am se i nɔ go day if i nɔ obe Gɔd ɛn it di frut we Gɔd bin dɔn tɛl am nɔ fɔ it. Iv bin biliv wetin Setan bin tɔk ɛn it di frut. I bin mek Adam sɛf it di frut. We dɛn it am, dɛn bigin sin, ɛn ɔl di pikin dɛn we dɛn bɔn dɛnsɛf go de sin. Ɛn bikɔs Adam in pikin dɛn ɔl de sin, dɛn de sɔfa ɛn day. Aw ɔl dis trɔbul bigin?— I bigin wit lay.

No wɔnda we Jizɔs bin se Setan “na layman, ɛn na in na di papa fɔ di wan dɛn we de lay”! Na in na di fɔs pɔsin we lay. We sɔmbɔdi nɔ tɔk tru, i de du wetin Setan  bin du. Wi fɔ de tink bɔt dat ɛnitɛm we wi want fɔ lay.—Jɔn 8:44, NW.

Ustɛm yu kin want fɔ lay?— Na we yu du bad tin, nɔto so?— Ivin we yu nɔ min am, yu kin brok sɔntin. If dɛn aks yu, yu go se na yu brɔda ɔ sista du am? Ɔ yu go mek lɛk se yu nɔ no natin bɔt wetin apin?—

Ustɛm yu kin want fɔ lay?

Lɛ wi se yu fɔ du yu omwɔk, bɔt yu jɔs du smɔl pat pan am, yu fɔ se yu du am ɔl, we nɔto ɔl yu du?— Wi fɔ mɛmba Ananayas ɛn Safayra. Dɛn nɔ bin tɔk tru; dɛn nɔ bin tɔk ɔltin. Ɛn Gɔd sho se na bad tin dɛn du bay we i mek dɛn day.

So no mata wetin wi go du, if wi lay, wi go jɔs mek tin wɔs, ɛn wi nɔ fɔ tɔk af tru ɛn miks am wit lay. Di Baybul se: “Tɔk tru.” I tɔk bak se: “Una nɔ fɔ lay to una kɔmpin.” Jiova de tɔk tru ɔltɛm, so i want mek wi falamakata am.—Lɛta Fɔ Ɛfisɔs 4:25; Lɛta Fɔ Kɔlɔse 3:9.

Wi fɔ de tɔk tru ɔltɛm. Na dis dɛn skripchɔ ya de tɔk bɔt: Ɛksodɔs 20:16; Prɔvabs 6:16-19; 12:19; 14:5; 16:6; ɛn Di Ibru Pipul Dɛn 4:13.