Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 24

Nɔ Ɛva Bi Tifman!

Nɔ Ɛva Bi Tifman!

SƆMBƆDI dɔn ɛva tif sɔntin na yu an?— Aw yu bin fil?— Di wan we tek am na tifman, ɛn nɔbɔdi nɔ lɛk tifman. Aw yu tink se pɔsin kin bi tifman? Yu tink se dɛn bɔn am as tifman?—

Wi dɔn lan se na sin dɛn de bɔn pɔsin wit. So wi ɔl kin sin. Bɔt dɛn nɔ de bɔn ɛnibɔdi as tifman. Tifman kin kɔmɔt frɔm gud famili. In mama ɛn papa, ɛn in brɔda ɛn sista dɛn kin ɔnɛs. Bɔt na wetin di pɔsin want, lɛk mɔni ɛn wetin mɔni kin bay kin mek i bi tifman.

Udat yu go se na di fɔs tifman?— Lɛ wi tink bɔt dis. Di Gret Ticha bin sabi da pɔsin de we i de na ɛvin. Da tifman de na bin enjɛl. Bɔt Gɔd mek ɔl di enjɛl dɛn pafɛkt, so aw da enjɛl de kam fɔ bi tifman?— Wɛl, as wi bin dɔn lan na Chapta 8 na dis buk, i bin want sɔntin we nɔto in yon. Yu mɛmba wetin na da tin de?—

Afta Gɔd bin dɔn mek di fɔs man ɛn uman, da enjɛl bin want mek dɛn wɔship am. I nɔ bin gɛt wan rayt fɔ mek dɛn wɔship am. Na Gɔd nɔmɔ dɛn fɔ wɔship. Bɔt i tif da wɔship de! Aw i du dat? Na bay we i mek Adam ɛn Iv wɔship am, ɛn dis mek i kam fɔ bi tifman. I kam fɔ bi Setan ɛn Dɛbul.

Wetin kin mek pɔsin bi tifman?— Na we i want sɔntin we nɔto in yon. Di pɔsin kin rili want dis tin ɛn dat kin mek ivin gud pɔsin du bad tin. Sɔntɛnde di wan dɛn we kin bi tifman  nɔ kin lɛf fɔ tif igen. Wan pan dɛn na Jizɔs in apɔsul. In nem na Judas Iskariɔt.

Judas bin no se i bad fɔ tif, bikɔs dɛn bin dɔn tich am Gɔd in lɔ frɔm di tɛm we i smɔl. I no se wan tɛm Gɔd bin dɔn ivin tɔk frɔm ɛvin to in pipul dɛn se: “Una nɔ fɔ tif.” (Ɛksodɔs 20:15) We Judas big, i mit di Gret Ticha ɛn bi wan pan in disaypul dɛn. Afta sɔntɛm, Jizɔs ivin pik am fɔ bi wan pan in 12 apɔsul dɛn.

Jizɔs ɛn in apɔsul dɛn bin de travul togɛda. Dɛn bin de it togɛda. Dɛn bin de kip ɔl di mɔni we dɛn bin gɛt na wan bɔks. Jizɔs gi Judas di bɔks fɔ kip. Nɔto Judas bin gɛt di mɔni we bin de na di bɔks. Yu no wetin Judas bin de du?—

Wetin mek Judas bin de tif?

Judas bigin tek di mɔni na di bɔks, we i nɔ gɛt rayt fɔ tek am. I bin de tek am we di ɔda wan dɛn nɔ de luk, ɛn i bin de tray fɔ fɛn ɔda we dɛn bak fɔ gɛt mɔ mɔni. I bigin tink bɔt mɔni ɔltɛm. Lɛ wi si wetin dis bad tin we i bin de tink bɔt bin mek i du jɔs bifo dɛn kil di Gret Ticha.

Jizɔs bin gɛt wan padi we na Lazarɔs. Lazarɔs in sista we nem Meri bin tek wan ɔyl we gɛt fayn sɛnt ɛn tɔn am na Jizɔs in fut. Bɔt Judas bigin grɔmbul. Yu no wetin mek?— I se dɛn fɔ dɔn sɛl di ɔyl ɛn gi di mɔni to pipul dɛn we nɔ gɛt. Bɔt i bin rili want fɔ gɛt mɔ mɔni na di bɔks so dat i go de tif am.—Jɔn 12:1-6.

Jizɔs tɛl am mek i nɔ ambɔg Meri bikɔs na gud tin Meri dɔn du. Judas nɔ bin lɛk wetin Jizɔs tɛl am, so i go to di bigman dɛn fɔ di prist dɛn we na Jizɔs in ɛnimi dɛn. Dɛn bin  want fɔ arɛst Jizɔs, bɔt dɛn bin want fɔ du am na nɛt we pipul dɛn nɔ go si dɛn.

Judas tɛl di prist dɛn se: ‘A go tɛl una aw fɔ kech Jizɔs if una gi mi mɔni. Ɔmɔs una go gi mi?’

Di prist dɛn ansa se: ‘Wi go gi yu tati silva mɔni.’—Matyu 26:14-16.

Judas tek di mɔni. I bin jɔs tan lɛk se i de sɛl di Gret Ticha to dɛn man dɛn de! Yu ebul imajin se sɔmbɔdi go du dis kayn bad tin?— Wɛl, dis kayn tin kin apin we pɔsin de tif mɔni ɛn ɔda tin dɛn. Di pɔsin kin lɛk mɔni pas aw i lɛk ɔda pipul dɛn ɔ ivin pas aw i lɛk Gɔd.

Sɔntɛm yu go se, ‘A nɔ go ɛva lɛk ɛnitin pas di we aw a lɛk Jiova Gɔd.’ I fayn fɔ fil da we de. We Jizɔs bin pik Judas as in apɔsul, sɔntɛm na so Judas bin de fil. Ɔda pipul dɛn we dɔn bin tifman dɛnsɛf bin dɔn de fil da we de. Lɛ wi tɔk bɔt sɔm pan dɛn.

Us bad tin Ekan ɛn Devid de tink bɔt?

Wan pan dɛn na Gɔd in savant we nem Ekan, we bin dɔn liv  lɔng tɛm bifo dɛn bɔn di Gret Ticha. Ekan bin si wan fayn klos, gold, ɛn sɔm silva mɔni. Nɔto in gɛt dɛn. Di Baybul tɛl wi se na Jiova gɛt dɛn bikɔs dɛn tek am frɔm Gɔd in ɛnimi dɛn. Bɔt bikɔs Ekan bin rili want dɛn, dat bin mek i tif dɛn.—Jɔshwa 6:19; 7:11, 20-22.

Luk ɔda ɛgzampul. Trade trade, Jiova bin pik Devid fɔ bi kiŋ oba in pipul dɛn na Izrɛl. Wan de, i bigin fɔ luk wan fayn uman we nem Bathshiba. I bin luk Bathshiba te i want fɔ tek am go na in os fɔ de wit am. Bɔt Bathshiba na Yuraya in wɛf. Wetin Devid fɔ dɔn du?—

 Devid fɔ dɔn lɛf fɔ tink bɔt Bathshiba. Bɔt i nɔ bin du dat. Devid kam wit Bathshiba na in os. Ɛn i mek dɛn kil Yuraya. Wetin mek Devid bin du dis kayn bad tin?— Na bikɔs i bin want uman we nɔto in yon.—Sɛkɛn Samiɛl 11:2-27.

Aw Absalɔm bi tifman?

Bikɔs Devid bin fil sɔri fɔ wetin i du, Jiova nɔ kil am. Bɔt Devid bigin gɛt bɔku prɔblɛm. In pikin Absalɔm bin want fɔ bi kiŋ. So we pipul dɛn de kam fɔ si Devid, Absalɔm bin de put in an rawnd dɛn ɛn kis dɛn. Di Baybul se Absalɔm bin mek di pipul dɛn lɛk am ɛn kɔmɔt biɛn in papa. I mek di pipul dɛn want mek in bi kiŋ.—Sɛkɛn Samiɛl 15:1-12.

Yu dɔn ɛva want sɔntin bad bad wan lɛk Ekan, Devid, ɛn Absalɔm?— If na ɔda pɔsin gɛt di tin, dɔn yu tek am, yu nɔ aks am, dat na tif. Yu mɛmba wetin di fɔs tifman, we na Setan, bin want?— I bin want mek pipul dɛn wɔship am ɛn nɔ wɔship Gɔd. Setan bin tif bay we i mek Adam ɛn Iv nɔ lisin to Gɔd.

We sɔmbɔdi gɛt sɔntin, na in gɛt di rayt fɔ sho udat go yuz am. Fɔ ɛgzampul, we yu go ple wit ɔda pikin dɛn na dɛn os, yu tink se i fayn fɔ tek sɔntin de ɛn briŋ am kam na yu os?— Pas in mama ɔ in papa tɛl yu fɔ tek am. If yu tek sɔntin de we yu nɔ aks dɛn, na tif yu dɔn tif.

Wetin go mek yu fil fɔ tif?— Na we yu want sɔntin we nɔto yu yon. Ilɛksɛf pɔsin nɔ si yu, udat de si yu?— Na Jiova Gɔd. Wi fɔ mɛmba se Gɔd nɔ lɛk we pɔsin de tif. So di lɛk we wi lɛk Gɔd ɛn wi neba fɔ mek wi nɔ ɛva bi tifman.

Di Baybul tɛl wi klia wan se i bad fɔ tif. Duya rid Mak 10:17-19; Lɛta Fɔ Rom 13:9; ɛn Lɛta Fɔ Ɛfisɔs 4:28.