Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 48

Wetin Go Mek Yu De na Gɔd in Nyu Wɔl Usay Pis Go De?

Wetin Go Mek Yu De na Gɔd in Nyu Wɔl Usay Pis Go De?

GƆD put Adam ɛn Iv na di gadin we bin de na Idɛn. Pan ɔl we dɛn nɔ bin obe Gɔd ɛn dɛn day, Gɔd mek we fɔ wi we na dɛn pikin dɛn, fɔ mek wi de sote go na Paradays. Di Baybul prɔmis wi se: “Udat dɛn de du wetin rayt go gɛt di land, ɛn dɛn go de de sote go.”—Sam 37:29.

Di Baybul tɛl wi bɔt “di nyu ɛvin ɛn di nyu wɔl.” (Pita In Sɛkɛn Lɛta 3:13) Di “ɛvin” we de naw min mɔtalman gɔvmɛnt dɛn tide, bɔt Jizɔs Krays ɛn di wan dɛn we de rul wit am na ɛvin na dɛn go mekɔp di “nyu ɛvin.” I go rili wɔndaful fɔ si aw di nyu ɛvin we na Gɔd in gɔvmɛnt, go mek pis de na di wan ol wɔl!

Wetin na di “nyu wɔl”?— Di nyu wɔl min gud pipul dɛn we lɛk Jiova. We di Baybul de tɔk bɔt “di wɔl,” sɔntɛnde i kin min di pipul dɛn we de na di wɔl, nɔto di grɔn. (Jɛnɛsis 11:1; Sam 66:4; 96:1) So di pipul dɛn we mekɔp di nyu wɔl go de na dis wɔl sote go.

Di wikɛd pipul dɛn we de naw nɔ go de igen. Mɛmba se di Ebi Ebi Ren we bin kam insay Noa in tɛm bin pul ɔl di wikɛd pipul dɛn kɔmɔt na di wɔl. As wi bin dɔn lan, Gɔd go dɔnawe wit dis wikɛd wɔl insay wan wɔ we dɛn kɔl Amagɛdɔn. Lɛ wi si naw aw layf go tan lɛk afta Amagɛdɔn.

 Yu go want fɔ de sote go insay Gɔd in nyu wɔl usay pis go de, nɔto so?— No dɔktɔ nɔ ebul mek yu de sote go. Ɛn no mɛrɛsin nɔ de we go mek yu nɔ day. Di wangren tin we go mek wi de sote go na we wi kam nia Gɔd. Ɛn di Gret Ticha tɛl wi aw wi go du so.

Mek wi tek wi Baybul dɛn ɛn tɔn to Jɔn chapta 17, vas 3. Insay dis vas, di Gret Ticha se: “Fɔ gɛt da layf de, we go de sote go, dɛn fɔ no yu, we na di wangren tru Gɔd, ɛn dɛn fɔ no Jizɔs Krays, we yu sɛn kam to dɛn.”

So, wetin Jizɔs se wi nid fɔ du fɔ de sote go?— Fɔs, wi gɛt fɔ lan bɔt wi Papa, Jiova we de na ɛvin, ɛn in Pikin, we gi in layf fɔ wi. Dis min se wi nid fɔ stɔdi di Baybul. Dis buk, Lan Frɔm di Gret Ticha, de ɛp wi fɔ du dat.

We wi lan bɔt Jiova, aw dat go ɛp wi fɔ de sote go?— Wɛl, jɔs lɛk aw wi nid fɔ it fud ɛvride, na so wi nid fɔ lan bɔt Jiova ɛvride. Di Baybul se: “Nɔto di it we pɔsin de it de gi am tru layf, na Gɔd in wɔd de gi pɔsin tru layf.”—Matyu 4:4.

Wi nid bak fɔ lan bɔt Jizɔs Krays bikɔs Gɔd sɛn am fɔ pul wi sin dɛn pan wi. Di Baybul se: ‘Nɔbɔdi nɔ de na di wɔl we ebul sev pɔsin, na Jizɔs nɔmɔ ebul sev pɔsin.’ Ɛn di Baybul tɔk bak se: “Ɛnibɔdi we biliv pan Gɔd in Pikin go gɛt layf we go de sote go.” (Di Apɔsul Dɛn Wok [Akt] 4:12; Jɔn 3:36) So di kwɛstyɔn naw we wi fɔ aks wisɛf na if wi rili biliv Jizɔs ɛn biliv se apat frɔm am wi nɔ go ebul fɔ de sote go?— If na so i bi, wi fɔ kɔntinyu fɔ lan frɔm di Gret Ticha ɛvride ɛn du wetin i se.

Wan fayn we fɔ lan frɔm di Gret Ticha na fɔ rid dis buk ɔltɛm, luk am gud gud wan, ɛn tink bɔt di pikchɔ dɛn we de de.  Tray fɔ si if yu ebul fɔ ansa di kwɛstyɔn dɛn we de na di pikchɔ. Dɔn rid di buk wit yu mama ɔ papa. If yu mama ɛn papa nɔ de wit yu, rid am wit yu big wan dɛn ɔ ɔda pikin dɛn. Yu nɔ tink se i go fayn if yu ɛp ɔda pipul dɛn fɔ no wetin dɛn nid fɔ du fɔ de sote go na Gɔd in nyu wɔl?—

Di Baybul tɛl wi se: ‘Di wɔl ɛn ɔltin we de de we pipul dɛn want bad bad go dɔn wande.’ Bɔt di Baybul ɛksplen bak aw wi go de sote go na Gɔd in nyu wɔl. I se: “Di pɔsin we du wetin Gɔd want go de sote go.” (Jɔn In Fɔs Lɛta 2:17) So, wetin go mek wi de sote go na Gɔd in nyu wɔl?— Na bay we wi lan bɔt Jiova ɛn in Pikin, Jizɔs, we i lɛk pasmak. Dɔn wi gɛt fɔ du wetin wi dɔn lan. Lɛ di stɔdi we yu dɔn stɔdi dis buk, ɛp yu fɔ du ɔl wetin yu dɔn lan.