Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 8

Gɔd Pas Ɔlman

Gɔd Pas Ɔlman

A SHƆ se yu go gri wit mi se sɔmbɔdi de we pas ɔlman. Udat de we pas ɔlman?— Na Jiova Gɔd. We in Pikin di Gret Ticha, yu tink se i pas wi?— Yɛs, i pas wi.

Jizɔs bin de wit Gɔd na ɛvin. In na bin spirit ɔ enjɛl. Yu tink se Gɔd bin mek ɔda enjɛl dɛn?— Yɛs, i bin mek bɔku bɔku ɔda enjɛl dɛn. Dɛn enjɛl dɛn ya gɛt pawa pas wi.—Di Ibru Pipul Dɛn 1:14; Rɛvɛleshɔn 5:11.

Yu mɛmba di enjɛl we bin tɔk to Meri?— Na bin Gebrɛl. I bin tɛl Meri se di pikin we i go bɔn go bi Gɔd in Pikin. Gɔd bin put Jizɔs in layf insay Meri in bɛlɛ so dat i go bɔn am na dis wɔl.—Lyuk 1:26, 27.

Wetin Meri ɛn Josɛf go mɔs dɔn tɛl Jizɔs?

Yu biliv se dis bin apin? Yu biliv se Jizɔs bin de wit Gɔd na ɛvin?— Jizɔs bin se i bin de wit Gɔd na ɛvin. Aw Jizɔs bin no bɔt wetin apin? Wɛl, we Jizɔs bin smɔl, sɔntɛm in mama go dɔn tɛl am wetin enjɛl Gebrɛl bin se. Dɔn sɔntɛm Josɛf insɛf go dɔn tɛl Jizɔs se na Gɔd na in rial Papa.

We Jizɔs bin baptayz, Gɔd bin tɔk frɔm ɛvin, se: “Dis na mi Pikin.” (Matyu 3:17) Ɛn di nɛt bifo Jizɔs day, i bin pre se: ‘Papa, ɔnɔ mi naw na di ples we yu de, wit da sem ɔnɔ we a bin gɛt bifo di wɔl mek!’ (Jɔn 17:5) So Jizɔs bin  aks fɔ mek i gɛt layf bak ɛn go de na ɛvin wit Gɔd. Aw Jizɔs go ebul liv na ɛvin?— Jizɔs go ebul liv na ɛvin if Jiova Gɔd mek i bi spirit pɔsin ɔ enjɛl bak.

Naw a want fɔ aks yu wan impɔtant kwɛstyɔn. Na ɔl di enjɛl dɛn gud? Wetin yu tink?— Wɛl, fɔs di enjɛl dɛn ɔl bin gud. Dis na bikɔs na Jiova mek dɛn, ɛn ɔl wetin Jiova mek gud. Bɔt leta wan pan di enjɛl dɛn kam fɔ bi bad pɔsin. Aw dat apin?

Fɔ mek wi no di ansa, lɛ wi tink bɔt di tɛm we Gɔd bin mek di fɔs man ɛn uman, Adam ɛn Iv. Sɔm pipul dɛn se di stori bɔt Adam ɛn Iv na lay lay stori. Bɔt di Gret Ticha bin no se na tru tru stori.

We Gɔd bin mek Adam ɛn Iv, i bin put dɛn na wan fayn gadin, na wan ples we dɛn kɔl Idɛn. Na bin Paradays. Dɛn bin fɔ dɔn bɔn bɔku pikin dɛn, gɛt big famili, ɛn de na Paradays sote go. Bɔt wan impɔtant lɛsin de we dɛn bin nid fɔ lan. Na lɛsin we wi bin dɔn tɔk bɔt. Lɛ wi si if wi go ebul fɔ mɛmba am.

Wetin bin fɔ mek Adam ɛn Iv de na Paradays sote go?

 Jiova bin tɛl Adam ɛn Iv se dɛn fɔ it ɔl di frut we dɛn want pan ɔl di stik dɛn na di gadin. Bɔt wan stik bin de na di gadin we dɛn nɔ fɔ it in frut. Gɔd bin tɛl dɛn wetin go apin if dɛn it am. I bin se: ‘Una go day.’ (Jɛnɛsis 2:17; 3:3) So, wetin na di lɛsin we Adam ɛn Iv bin nid fɔ lan?—

Dɛn bin nid fɔ lan fɔ obe. Wi go gɛt layf if wi obe Jiova Gɔd! Nɔto fɔ mek Adam ɛn Iv tɔk nɔmɔ se dɛn go obe Jiova. Dɛn bin nid fɔ sho dat bay di tin dɛn we dɛn de du. If dɛn bin obe Gɔd, dɛn bin fɔ dɔn sho se dɛn lɛk am ɛn want mek i rul dɛn. Dɔn dɛn bin fɔ de na Paradays sote go. Bɔt if dɛn it di frut, wetin dat go sho?—

I go sho se dɛn nɔ rili gladi fɔ wetin Gɔd dɔn gi dɛn. Yu bin fɔ dɔn obe Jiova if yu bin de de?— Fɔs, Adam ɛn Iv bin obe Gɔd. Bɔt wan pɔsin we pas dɛn bin ful Iv. I mek Iv nɔ obe Jiova. Udat na da pɔsin de?—

Udat bin de mek di snek tɔk to Iv?

 Di Baybul se na wan snek bin tɔk to Iv. Bɔt yu no se snek nɔ de tɔk. So aw i bin ebul fɔ tɔk?— Wan enjɛl bin mek i tan lɛk se na di snek bin de tɔk. Bɔt na di enjɛl bin de tɔk. Di enjɛl bin bigin fɔ tink bɔt bad tin dɛn. I bin want mek Adam ɛn Iv wɔship am. I bin want dɛn fɔ du wetin i de tɛl dɛn. I bin want fɔ tek Gɔd in ples.

So da bad enjɛl de bin mek Iv bigin fɔ tink bɔt bad tin. I bin yuz di snek fɔ tɔk to Iv se: ‘Gɔd nɔ bin tɛl yu di tru. Yu nɔ go day if yu it di frut. Yu go gɛt sɛns lɛk Gɔd.’ If na bin yu, yu bin fɔ dɔn biliv wetin di vɔys se?—

Iv bigin fɔ want sɔntin we Gɔd nɔ gi am. I it di frut we Gɔd bin se dɛn nɔ fɔ it. Dɔn i gi sɔm to Adam. Adam nɔ bin biliv wetin di snek tɔk. Bɔt i bin lɛk in wɛf pas aw i lɛk Gɔd. So insɛf it di frut.—Jɛnɛsis 3:1-6; Fɔs Lɛta To Timoti 2:14.

Wetin bin apin leta?— Dis bin mek Adam ɛn Iv nɔ pafɛkt igen, dɛn ol, ɛn dɛn day. Ɛn bikɔs  dɛn nɔ bin pafɛkt igen, ɔl di pikin dɛn we dɛn bɔn, dɛnsɛf nɔ pafɛkt ɛn as tɛm de go, dɛn de ol ɛn day. Gɔd nɔ bin lay! Wi go gɛt layf if wi de obe am. (Lɛta Fɔ Rom 5:12) Di Baybul tɛl wi se di enjɛl we bin lay to Iv in nem na Setan, ɛn di ɔda enjɛl dɛn bak we bin jɔyn Setan, dɛn kɔl dɛn dɛbul.—Jems 2:19; Rɛvɛleshɔn 12:9.

Wetin bin apin to Adam ɛn Iv we dɛn nɔ bin obe Gɔd?

Naw yu go ebul fɔ ɔndastand wetin mek dis gud enjɛl tɔn to bad enjɛl?— Na bikɔs i bigin fɔ tink bɔt bad tin. I bin want fɔ de bifo pan ɔltin. I bin no se Gɔd bin dɔn tɛl Adam ɛn Iv fɔ bɔn pikin dɛn, ɛn i bin want mek ɔl dɛn pikin dɛn wɔship am. Setan nɔ want mek ɛnibɔdi obe Jiova. So i tray fɔ mek dɛn bigin tink bɔt bad tin.—Jems 1:13-15.

Setan se nɔbɔdi nɔ rili lɛk Jiova. I se yu ɛn mi nɔ lɛk Gɔd ɛn wi nɔ rili want fɔ du wetin Gɔd se. I se wi jɔs de obe Jiova we tin fayn fɔ wi. Na tru Setan bin tɔk? Na so wi de?

Di Gret Ticha bin se Setan na layman! Jizɔs bin sho se i rili lɛk Jiova bay we i de obe Am. Ɛn Jizɔs nɔ bin jɔs de obe Gɔd di tɛm we tin bin izi fɔ am. I bin de obe Gɔd ɔltɛm, ivin we ɔda pipul dɛn bin de mek tin nɔ izi fɔ am. I nɔ bin kɔmɔt biɛn Jiova te i day. Na dat mek Gɔd gi am layf bak fɔ mek i go liv sote go.

So udat yu go se na wi big big ɛnimi?— Yɛs, na Setan. Yu ebul fɔ si am?— Nɔ, yu nɔ ebul fɔ si am! Bɔt wi no se i de ɛn i gɛt pawa pas wi. Bɔt udat gɛt pawa pas Setan?— Na Jiova Gɔd. So wi no se Gɔd ebul fɔ ɛp wi.