Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 9

Nɔ Gri fɔ Du Bad we Pɔsin Tɛmt Yu

Nɔ Gri fɔ Du Bad we Pɔsin Tɛmt Yu

ƐNIBƆDI dɔn ɛva tɛl yu fɔ du sɔntin we bad?— I chalenj yu se yu nɔ go ebul du am? Ɔ i tɛl yu se yu go ɛnjɔy fɔ du am ɛn nɔto sɔntin we rili bad?— We pɔsin se dis to wi, na tɛmt i de tray fɔ tɛmt wi.

Wetin wi fɔ du we pɔsin tray fɔ tɛmt wi? Yu tink se wi fɔ gri ɛn du wetin bad?— Dat nɔ go mek Jiova Gɔd gladi. Bɔt yu no udat go gladi?— Yɛs, na Setan go gladi.

Setan na Gɔd in ɛnimi, ɛn Setan na wi ɛnimi bak. Wi nɔ de si am bikɔs in na spirit. Bɔt in de si wi. Wan de, Setan bin tɔk wit Jizɔs, di Gret Ticha, ɛn i bin tray fɔ tɛmt am. Lɛ wi si wetin Jizɔs bin du. Dɔn wi go no di rayt tin we wi fɔ du we pɔsin tɛmt wi.

Wetin Jizɔs bin bigin fɔ mɛmba di tɛm we i bin baptayz?

Jizɔs want fɔ du wetin Gɔd want ɔltɛm. I bin sho dis klia wan bay we i bin baptayz na di Riva Jɔdan. Na frɔm da tɛm de Setan bigin fɔ tray fɔ tɛmt Jizɔs. Di Baybul se ɛvin opin to Jizɔs. (Matyu 3:16, NW) Dis min se sɔntɛm Jizɔs bin bigin fɔ mɛmba ɔl wetin i bin de du we i bin de na ɛvin wit Gɔd.

 Afta Jizɔs bin dɔn baptayz, i go na di ɛmti land usay pɔsin nɔ go ebul fɔ liv, fɔ tink bɔt di tin dɛn we i bin dɔn bigin fɔ mɛmba. I de de fɔ 40 dez ɛn 40 nɛt. Ɔl dɛn tɛm ya, Jizɔs nɔ bin it natin, so i bin rili angri. Na dis tɛm Setan tray fɔ tɛmt Jizɔs.

Aw Setan bin yuz ston dɛn fɔ tɛmt Jizɔs?

Setan bin se: “If yu na Gɔd in Pikin, tɛl dɛn ston ya fɔ tɔn to bred.” Dɛn bred dɛn ya so bin fɔ dɔn gɛt fayn test. Bɔt fɔ se Jizɔs bin ebul fɔ tɔn dɛn ston dɛn de to bred?— Yɛs, i bin fɔ ebul. Wetin mek? Na bikɔs Jizɔs, we na Gɔd in Pikin, gɛt spɛshal pawa.

Yu bin fɔ dɔn tɔn ston to bred if Setan bin tɛl yu fɔ du so?— Jizɔs bin rili angri. So yu tink se i nɔ bad fɔ lɛ Jizɔs du am wan tɛm nɔmɔ?— Jizɔs bin no se i bad fɔ yuz in pawa da we de. Jiova gi Jizɔs pawa fɔ lɛ i mek pipul dɛn kam to Am, nɔto fɔ bɛnifit insɛf.

So Jizɔs tɛl Setan wetin rayt na di Baybul. I se: ‘Nɔto di it we pɔsin de it de gi am tru layf, na Gɔd in wɔd de gi pɔsin tru layf.’ Jizɔs bin no se fɔ du wetin go mek Jiova gladi impɔtant pas tin fɔ it.

 Bɔt Setan bin tray bak. I kɛr Jizɔs go na Jerusɛlɛm ɛn mek i tinap ɔp wan ay ples na di tɛmpul. Dɔn Setan bin se: ‘If yu na Gɔd in Pikin, ib yusɛf dɔŋ, bikɔs dɛn rayt na Gɔd in Buk se, Gɔd in enjɛl dɛn go mek natin nɔ apin to yu.’

Wetin mek Setan bin tɔk dis?— I bin tɔk am fɔ tɛmt Jizɔs fɔ du sɔntin we nɔ mek sɛns. Bɔt Jizɔs nɔ bin lisin to Setan. I tɛl Setan se: ‘Dɛn rayt na Gɔd in Buk se, “Pɔsin nɔ fɔ tray fɔ mek Jiova we na yu masta du wetin yu want.”’ Jizɔs bin no se i nɔ fayn fɔ tɛst Jiova bay we yu de put yu layf pan denja.

Bɔt Setan nɔ bin giv ɔp. Dis tɛm i kɛr Jizɔs go ɔp wan ay mawnten. Dɔn i sho am ɔl di kiŋdɔm dɛn, ɔ gɔvmɛnt dɛn, na di wɔl wit dɛn pawa ɛn jɛntri. Dɔn Setan tɛl Jizɔs se: “A go gi yu ɔl dɛn tin ya, if yu nil dɔŋ ɛn se mi na yu masta.”

Tink bɔt dis tin we Setin bin se i de gi Jizɔs. Yu tink se na Setan gɛt ɔl dɛn kiŋdɔm ɔ mɔtalman gɔvmɛnt dɛn ya?— Wɛl, Jizɔs nɔ bin tɔk se nɔto Setan gɛt dɛn. I bin fɔ dɔn tɔk dat if nɔto Setan bin rili gɛt dɛn. So na Setan de rili rul ɔl di neshɔn dɛn na di wɔl. Di Baybul ivin kɔl am “di wan we de rul dis wɔl.”—Jɔn 12:31.

Wetin mek Setan bin se i go gi Jizɔs ɔl dɛn kiŋdɔm ya?

Wetin yu go du if Setan prɔmis yu se i go gi yu sɔntin if yu wɔship am?— Jizɔs bin no se i bad fɔ wɔship Setan ilɛk i gi yu ɛnitin. So Jizɔs bin se: ‘Kɔmɔt biɛn mi, Setan! Di Baybul se na Jiova we na yu Gɔd nɔmɔ wi fɔ wɔship.’—Matyu 4:1-10; Lyuk 4:1-13.

Wetin yu go du if pɔsin tɛmt yu fɔ du bad?

Bɔku tin dɛn de we kin tɛmt wisɛf. Yu no sɔm tin dɛn we kin tɛmt wi?— Lɛ wi si dis ɛgzampul. Yu mama dɔn mek wan fayn it we yu lɛk. Ɛn i go tɛl yu se yu nɔ fɔ it am te di tɛm rich we una ɔl fɔ it. Bɔt yu rili angri, ɛn yu go want fɔ it di tin we yu mama  dɔn mek. Yu go obe yu mama?— Setan want mek yu nɔ obe yu mama.

Mɛmba Jizɔs. Insɛf bin rili angri. Bɔt i bin no se fɔ mek Gɔd gladi impɔtant pas tin fɔ it. Yu go sho se yu de falamakata Jizɔs we yu du wetin yu mama se.

Sɔntɛm sɔmbɔdi go tɛl yu fɔ smok jamba ɔ ɛni ɔda tin we nɔ fayn. I go tɛl yu se yu go fil  fayn if yu smok am. Bɔt dɛn tin ya na drɔgs. Dɛn kin mek yu sik bad bad wan ɛn dɛn kin ivin kil yu. Ɔ sɔmbɔdi go gi yu sigrɛt, we insɛf gɛt drɔgs, ɛn tɛmt yu fɔ mek yu smok am. Wetin yu go du?—

Mɛmba Jizɔs. Setan tɛmt Jizɔs fɔ put in layf pan denja bay we i tɛl Jizɔs fɔ jomp kɔmɔt ɔp di tɛmpul. Bɔt Jizɔs nɔ bin du am. Wetin yu go du if pɔsin tɛmt yu fɔ du sɔntin we go put yu layf pan denja?— Jizɔs nɔ bin lisin to Setan. So yusɛf nɔ fɔ lisin to ɛnibɔdi we go tɛmt yu fɔ du ɛnitin we bad.

Wetin mek i nɔ fayn fɔ yuz aydɔl we wi de wɔship?

Sɔntɛm dɛn go tɛl yu fɔ butu bifo aydɔl ɛn wɔship am, ɛn dis na sɔntin we di Baybul se wi nɔ fɔ du. (Ɛksodɔs 20:4, 5) Sɔntɛm na sɔntin we dɛn kin du na skul. Dɛn go tɛl yu se dɛn go drɛb yu na skul if yu nɔ gri fɔ du am. Wetin yu go du?—

I izi fɔ du di rayt tin if ɔlman de du am. Bɔt i nɔ kin izi fɔ du di rayt tin we ɔda pipul dɛn want wi fɔ du sɔntin we bad. Dɛn kin se wetin dɛn de du nɔ rili bad. Bɔt di big kwɛstyɔn naw na, Wetin Gɔd se bɔt am? Gɔd no wetin na di bɛst tin fɔ wi.

So i nɔ mata wetin ɔda pipul dɛn se, wi nɔ fɔ ɛva du sɔntin we Gɔd se i bad. If wi du dat, wi go mek Gɔd gladi ɔltɛm, ɛn wi nɔ go ɛva mek Setan gladi.

Fɔ no mɔ bɔt wetin wi fɔ du we pɔsin tɛmt wi, rid Sam 1:1, 2; Prɔvabs 1:10, 11; Matyu 26:41; ɛn Sɛkɛn Lɛta To Timoti 2:22.