Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 7

Bad Tin Nɔ Go Apin to Yu we Yu Obe

Bad Tin Nɔ Go Apin to Yu we Yu Obe

YU LƐK fɔ de du ɛnitin we yu want? Yu tink se nɔbɔdi nɔ fɔ tɛl yu wetin fɔ du? Tɔk tru ɛn tɛl mi wetin yu tink.—

Wetin mek yu fɔ lisin to di wan dɛn we big pas yu?

Uswan go bɛtɛ fɔ yu? Yu tink se i mek sɛns fɔ lɛ yu du ɛnitin we yu want? Ɔ tin kin kɔmɔt fayn we yu lisin to yu mama ɛn papa?— Gɔd se yu fɔ obe yu mama ɛn papa, so gud rizin go de fɔ dat. Lɛ wi si if wi go ebul fɔ ɔndastand di rizin.

Ɔmɔs ia yu ol?— Yu no ɔmɔs ia yu papa ol?— Ɔmɔs ia yu mama, yu grani, ɔ granpa ol?— Dɛn dɔn liv na di wɔl fɔ lɔng tɛm pas yu. Ɛn pɔsin we dɔn liv fɔ lɔng tɛm, dɔn lan bɔku bɔku tin dɛn. I dɔn yɛri bɔku tin dɛn, si bɔku tin dɛn, ɛn du bɔku tin dɛn ɛvri ia. So yɔŋ wan dɛn kin lan frɔm di wan dɛn we big pas dɛn.

Yu sabi pɔsin we yu big pas?— Yu ɛn in, udat sabi bɔku tin pas in kɔmpin?— Wetin mek yu sabi bɔku tin dɛn pas am?— Na bikɔs yu big pas am. Yu bin gɛt bɔku tɛm fɔ lan plɛnti tin pas di wan we yu big pas.

 Udat dɔn liv fɔ lɔng tɛm pas yu ɛn mi ɔ ɛni ɔda pɔsin?— Na Jiova Gɔd. I sabi ɔltin pas yu ɛn mi. We i tɛl wi fɔ du ɛnitin, wi shɔ se na di rayt tin dat, pan ɔl we i nɔ kin izi fɔ du. Yu no se wan tɛm i nɔ bin izi fɔ di Gret Ticha fɔ obe Jiova?—

Wan tɛm Gɔd bin tɛl Jizɔs fɔ du sɔntin we rili at. Jizɔs bin pre bɔt dis, as wi de si na di pikchɔ. I bin pre se: “Papa, if yu gri, duya, nɔ mek a sɔfa dis sɔfa we a fɔ sɔfa.” Dis pre we Jizɔs bin pre sho se i nɔ kin izi ɔltɛm fɔ du wetin Gɔd want. Bɔt aw Jizɔs bin ɛnd in prea? Yu no?—

Wetin wi go lan frɔm Jizɔs in prea?

Jizɔs bin ɛnd in prea bay we i se: “Nɔ du wetin a want, du wetin yu want.” (Lyuk 22:41, 42) So i bin want mek wetin Gɔd want bi, nɔto wetin in want. Ɛn i kɔntinyu fɔ du wetin Gɔd want, nɔto wetin in fil se na di bɛst.

Wetin wi lan frɔm dis?— Wi lan se i fayn ɔltɛm fɔ du wetin Gɔd se pan ɔl we i nɔ kin izi fɔ du am. Bɔt wi lan ɔda tin bak. Yu no wetin wi lan?— Wi lan se Gɔd ɛn Jizɔs nɔto di sem pɔsin, lɛk aw bɔku pipul dɛn de tɔk. Jiova Gɔd big pas in Pikin, Jizɔs, ɛn i no bɔku tin pas am.

We wi obe Gɔd, wi de sho se wi lɛk am. Di Baybul se: “We wi lɛk Gɔd wi de du ɔl wetin i tɛl wi fɔ du.” (Jɔn In Fɔs Lɛta 5:3) So yu si, wi ɔl nid fɔ obe Gɔd. Yu want fɔ obe Gɔd, nɔto so?—

Lɛ wi opin wi Baybul ɛn si wetin Gɔd tɛl pikin dɛn fɔ du. Wi go rid wetin di Baybul se na Lɛta Fɔ Ɛfisɔs chapta 6, vas 1, 2,  ɛn 3. I se: “Una we na pikin, una fɔ de du wetin di wan dɛn we bɔn una tɛl una fɔ du; na di rayt tin dat we Kristiɛn fɔ du. Pan ɔl di lɔ we Gɔd gi Mozis, di fɔs wan we gɛt prɔmis, se: ‘Yu fɔ rɛspɛkt yu papa ɛn mama, so dat ɔltin go fayn fɔ yu ɛn yu go gɛt lɔŋ layf.’”

So yu si, na Jiova Gɔd insɛf sɛf de tɛl yu fɔ obe yu mama ɛn papa ɛn fɔ rɛspɛkt dɛn. Ɛn Gɔd prɔmis se if yu obe yu mama ɛn papa “ɔltin go fayn fɔ yu.”

Mek a tɛl yu wan stori bɔt sɔm pipul dɛn we bin sev bikɔs dɛn bin obe. Dɛn pipul dɛn ya bin dɔn liv trade trade na wan big tɔŋ we dɛn kɔl Jerusɛlɛm. Bɔku pipul dɛn na da tɔŋ de nɔ bin de lisin to Gɔd, so Jizɔs bin wɔn dɛn se Gɔd go mek dɛn pwɛl da tɔŋ de. Jizɔs bin tɛl dɛn bak aw dɛn go sev if dɛn lɛk wetin rayt. I bin se: ‘Di tɛm we una go si sojaman dɛn gɛda rawnd Jerusɛlɛm, una fɔ no se di tɛm we da tɔŋ de go pwɛl dɔn de rich. Da tɛm de, mek di pipul dɛn na Jerusɛlɛm rɔnawe go na dɛn il dɛn.’—Lyuk 21:20-22.

Aw dɛn pipul dɛn ya bɛnifit we dɛn du wetin Jizɔs bin tɛl dɛn?

Wɛl, jɔs lɛk aw Jizɔs bin tɔk, sojaman dɛn bin kam atak Jerusɛlɛm. Di Roman sojaman dɛn bin gɛda rawnd Jerusɛlɛm. Dɔn di sojaman dɛn bin jɔs tɔn bak lɛk dat. Bɔku pipul dɛn bin de tink se bad tin nɔ go apin to Jerusɛlɛm igen. So dɛn kɔntinyu fɔ de na di tɔŋ. Bɔt wetin Jizɔs bin tɛl dɛn fɔ du?— Wetin yu bin fɔ dɔn du if yu bin de na Jerusɛlɛm?— Di wan dɛn we bin rili biliv Jizɔs lɛf dɛn os ɛn rɔnawe go na di il dɛn we de fa frɔm Jerusɛlɛm.

Wan ia pas, natin nɔ apin na Jerusɛlɛm. Tu ia pas, natin nɔ apin na Jerusɛlɛm. Ɛn tri ia sɛf pas, natin nɔ apin. Sɔm pipul dɛn go de tink se di wan dɛn we dɔn rɔnawe rili  ful. Bɔt insay di ia we mek 4, di Roman sojaman dɛn kam bak. Dɛn gɛda rawnd Jerusɛlɛm bak. Naw i dɔn let fɔ mek ɛnibɔdi rɔnawe. Dis tɛm di sojaman dɛn pwɛl di tɔŋ. Bɔku pipul dɛn we bin de insay di tɔŋ day ɛn dɛn kɛr sɔm dɛn go as jelman dɛn.

Bɔt wetin apin to di wan dɛn we bin obe Jizɔs?— Dɛn bin sev. Dɛn bin de fa frɔm Jerusɛlɛm. So natin nɔ bin du dɛn. Bad tin nɔ bin apin to dɛn bikɔs dɛn bin obe.

Yu tink se bad tin go apin to yu if yu obe?— Yu mama ɛn papa go tɛl yu mek yu nɔ ple na strit. Wetin mek dɛn tɛl yu dat?— Na bikɔs sɔntɛm motoka go bang yu. Bɔt sɔntɛm, wan de yu go de tink se: ‘Motoka nɔ de pas rayt naw. Bad tin nɔ go apin to mi. Ɔda pikin dɛn kin ple na strit ɛn a nɔ wande si usay motoka bang dɛn.’

Wetin mek yu fɔ obe pan ɔl we yu nɔ fil se bad tin go apin?

 Na so bɔku pipul dɛn na Jerusɛlɛm bin de fil. Afta we di Roman sojaman dɛn bin dɔn go, i bin tan lɛk se no bad tin nɔ go apin. Ɔda pipul dɛn bin de na di tɔŋ. So dɛn bak lɛf na di tɔŋ. Dɛn bin dɔn wɔn dɛn, bɔt dɛn nɔ bin lisin. So dɛn ɔl bin day.

Lɛ wi si ɔda ɛgzampul. Yu dɔn wande ple wit machis?— I kin fayn fɔ si we faya de kech we yu krach machis. Bɔt i rili bad fɔ ple wit machis. Wan ol os kin bɔn, ɛn yu kin ivin day!

Mɛmba se nɔto wan wan tɛm nɔmɔ yu fɔ de obe. Bɔt if yu de obe ɔltɛm, dat go mek bad tin nɔ apin to yu. Ɛn na udat tɛl yu se, “Una we na pikin, una fɔ de du wetin di wan dɛn we bɔn una tɛl una fɔ du”?— Na Gɔd. Ɛn mɛmba se Gɔd se dat bikɔs i lɛk yu.

Naw rid dɛn skripchɔ dɛn ya we de sho se i impɔtant fɔ obe: Prɔvabs 23:22; Ɛkliziastis 12:13; Ayzaya 48:17, 18; ɛn Lɛta Fɔ Kɔlɔse 3:20.