Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 35

Wi Go Gɛt Layf Bak!

Wi Go Gɛt Layf Bak!

IF WI day, yu tink se Gɔd go want fɔ gi wi layf bak?— Job we na bin gud man bin biliv se Gɔd want fɔ gi am layf bak. So we Job bin fil se i de kam day, i tɛl Gɔd se: “Yu go kɔl mi, ɛn a go ansa yu.” Job tɔk se Jiova Gɔd go rili want fɔ gi am layf bak.—Job 14:14, 15.

Jizɔs jɔs tan lɛk in Papa, Jiova Gɔd. Jizɔs want fɔ ɛp wi. Wan man we bin gɛt lɛprɔsi bin tɛl am se, ‘If yu want fɔ mɛn mi, yu ebul mɛn mi ɛn mek a klin.’ Jizɔs tɛl am se: ‘A want fɔ mɛn yu.’ So i mek di man wɛl.—Mak 1:40-42.

Aw Jiova bin sho se i lɛk smɔl pikin dɛn?

Jizɔs in Papa bin dɔn tich am fɔ lɛk pikin dɛn. Trade trade, Jiova bin yuz in savant dɛn tu tɛm fɔ gi layf bak to smɔl pikin dɛn. Ilayja bin beg Jiova fɔ gi layf bak to wan uman in bɔy pikin. Dis uman bin gud to am. Ɛn Jiova du am fɔ am. Jiova bin yuz wan in ɔda savant  we nem Ilaysha fɔ gi layf bak to wan smɔl bɔbɔ.—Fɔs Kiŋ 17:17-24; Sɛkɛn Kiŋ 4:32-37.

Yu nɔ tink se i fayn we wi no se Jiova lɛk wi pasmak?— Jiova nɔ de tink bɔt wi nɔmɔ we wi gɛt layf. Bɔt i ivin de mɛmba wi if wi day. Jizɔs bin tɔk se in Papa de ivin tek di wan dɛn we i lɛk, we dɔn day, lɛk se dɛn stil gɛt layf! (Lyuk 20:38) Di Baybul tɛl wi se ‘day ɔ layf, dis tɛm ya ɔ di tɛm we de kam, nɔ go ebul mek di lɛk we Gɔd lɛk wi nɔ rich wi.’—Lɛta Fɔ Rom 8:38, 39.

Di tɛm we Jizɔs bin de na dis wɔl, i sho se Jiova lɛk smɔl pikin dɛn. Yu go mɛmba se Jizɔs bin de tek in tɛm fɔ tɛl pikin dɛn bɔt Gɔd. Yu no se Gɔd bin gi Jizɔs pawa fɔ gi smɔl pikin dɛn layf bak, nɔto so?— Lɛ wi tɔk bɔt di tɛm we Jizɔs bin gi layf bak to wan pikin we bin ol 12 ia. Dis pikin in papa nem Jayrɔs.

Jayrɔs bin de wit in wɛf ɛn dɛn wangren pikin nia di Si na Galili. Wan de di pikin bin rili sik, ɛn Jayrɔs bin no se di pikin go day. So i bigin fɔ tink bɔt Jizɔs, we na da wɔndaful man, we i bin dɔn yɛri se de mɛn pipul dɛn. So Jayrɔs go luk fɔ Jizɔs. I fɛn Jizɔs nia di Si na Galili de tich bɔku pipul dɛn.

Jayrɔs pas midul di krawd ɛn go nil dɔŋ na Jizɔs in fut. I tɛl Jizɔs se: ‘Mi gyal pikin sik bad bad wan. Duya kam ɛp am. A de beg yu fɔ kam.’ Wantɛm wantɛm, Jizɔs go wit Jayrɔs. Di krawd we bin kam fɔ si Jizɔs, dɛnsɛf fala dɛn. Bɔt afta we dɛn dɔn go fa, sɔm man dɛn kam tɛl Jayrɔs se “mek i nɔ wɔri di Masta igen bikɔs in pikin dɔn day.”

Jizɔs yɛri wetin di man dɛn tɔk. I no aw i go dɔn tan lɛk fɔ Jayrɔs fɔ mek in wangren pikin day. So Jizɔs tɛl Jayrɔs se:  ‘Nɔ fred. Yu jɔs biliv Gɔd nɔmɔ, yu pikin go grap bak.’ Dɛn kɔntinyu fɔ go te dɛn rich na Jayrɔs in os. We dɛn rich na di os, pipul dɛn bin de kray. Dɛn at bin pwɛl bikɔs dis smɔl pikin dɔn day. Bɔt Jizɔs tɛl dɛn se: ‘Una lɛf fɔ kray. Di pikin nɔ day, i jɔs de slip.’

Afta we Jizɔs tɔk dis, di pipul dɛn bigin fɔ laf am, bikɔs dɛn no se di pikin dɔn day. Wetin mek yu tink se Jizɔs tɔk se di pikin de slip?— Us lɛsin yu tink se i want fɔ tich di pipul dɛn?— I want mek dɛn no se we pɔsin day, i jɔs tan lɛk we i de pan dip slip. I want fɔ tich dɛn bak se i kin yuz di pawa we Gɔd gi am fɔ gi pɔsin layf bak izi wan, jɔs lɛk aw dɛn kin wek pɔsin pan slip.

Wetin wi go lan frɔm di layf we Jizɔs bin gi Jayrɔs in pikin?

Jizɔs bin tɛl ɔlman fɔ kɔmɔt na do; na Pita, Jems, ɛn Jɔn, wit di pikin in mama ɛn papa nɔmɔ bin lɛf insay di os. Dɔn i go usay di pikin de. I ol in an ɛn tɛl am se: “Mi pikin, grap!” Wantɛm wantɛm di pikin grap ɛn bigin fɔ waka! In mama ɛn papa bin gladi pasmak.—Mak 5:21-24, 35-43; Lyuk 8:40-42, 49-56.

 Naw tink bɔt dis. If Jizɔs bin gi da pikin layf bak, yu nɔ tink se i go gi layf bak to ɔda pipul dɛn?— Yu tink se i go rili du am?— Yɛs, i go du am. Jizɔs insɛf sɛf tɔk se: “Di tɛm de kam we ɔl dɛn pipul we dɔn day go yɛri wetin [a] de tɔk, ɛn dɛn go rayz frɔm dɛn grev.”—Jɔn 5:28, 29.

Yu tink se Jizɔs want fɔ gi layf bak to pipul dɛn?— Wi go ansa dis kwɛstyɔn wit wan ɔda ɛgzampul we de insay di Baybul. Lɛ wi tɔk bɔt wetin bin apin nia wan tɔŋ we dɛn kɔl Nen. Dis go sho wi aw Jizɔs kin fil we i de si pipul dɛn de kray we pɔsin day.

Bɔku pipul dɛn bin de go wit wan uman we de go bɛr in pikin. Bifo dis tɛm, in man bin dɔn day, ɛn naw in wangren pikin sɛf dɔn day. In at bin rili pwɛl! Bɔku pipul dɛn na Nen bin de fala am as dɛn bin de lɛf di tɔŋ fɔ go bɛr in pikin. Di uman bin de kray, ɛn di pipul dɛn nɔ bin ebul fɔ du ɛnitin fɔ kɔrej am.

Da sem de de, Jizɔs ɛn in disaypul dɛn bin de kam nia dis tɔŋ ya. We dɛn rich nia di get na di tɔŋ, dɛn mit di pipul dɛn de go bɛr di uman in pikin. We Jizɔs si di uman de kray, i sɔri fɔ am. I bin fil am bad we di uman in at pwɛl. I want fɔ ɛp am.

So i tɔk to di uman sɔri wan, bɔt i bin siriɔs we i de tɔk to am so dat i go lisin. I tɛl am se: ‘Lɛf fɔ kray.’ Di we aw Jizɔs tɔk to di uman ɛn di tin we i du go dɔn mek ɔlman de wach am. As Jizɔs de go nia di bɔdi, ɔlman go dɔn de wɔnda wetin i de go du. Jizɔs tɔk klia wan se: “Bɔbɔ, grap!” Wantɛm wantɛm, i grap! Ɛn i bigin fɔ tɔk.—Lyuk 7:11-17.

Imajin aw di uman go dɔn fil! Aw yu go fil fɔ si pɔsin we yu lɛk gɛt layf bak?— Yu nɔ tink se dis de sho se Jizɔs rili lɛk pipul  dɛn, ɛn i want fɔ ɛp dɛn?— Jɔs tink bɔt aw i go fayn fɔ mek wi si pipul dɛn we go gɛt layf bak insay Gɔd in nyu wɔl!—Pita In Sɛkɛn Lɛta 3:13; Rɛvɛleshɔn 21:3, 4.

Wetin di layf we dis uman in wangren pikin gɛt bak de sho?

Da tɛm de, di wan dɛn we go gɛt layf bak go bi pipul dɛn we wi bin sabi ɛn ivin pikin dɛn. Wi go no dɛn jɔs lɛk aw Jayrɔs bin no in pikin we Jizɔs gi am layf bak. Ɔda pipul dɛn we bin dɔn day lɔng lɔng tɛm go gɛt layf bak. Gɔd nɔ go fɔgɛt dɛn jɔs bikɔs i dɔn te we dɛn dɔn day.

Yu nɔ tink se i fayn we wi no se Jiova Gɔd wit in Pikin, Jizɔs, lɛk wi pasmak?— Dɛn want fɔ mek wi liv sote go, nɔto fɔ jɔs smɔl tɛm nɔmɔ!

Fɔ no mɔ bɔt wetin go apin to di wan dɛn we dɔn day, duya rid Ayzaya 25:8; Di Apɔsul Dɛn Wok [Akt] 24:15; ɛn Fɔs Lɛta Fɔ Kɔrint 15:20-22.