Go dayrɛkt to di men tin

Go dayrɛkt to di say we di difrɛn difrɛn atikul dɛn de

 CHAPTA 19

Yu Tink se I Fayn fɔ Fɛt?

Yu Tink se I Fayn fɔ Fɛt?

YU SABI ɛni bɔbɔ ɔ ɛni titi we de mek lɛk se i gɛt trɛnk ɛn pawa pas in kɔmpin dɛn?— Yu go lɛk fɔ de wit am? Ɔ yu go lɛk fɔ de wit pɔsin we gud ɛn we nɔ de mek plaba?— Di Gret Ticha bin se: ‘Di wan dɛn we lɛk fɔ mek pis go gladi, bikɔs dɛn go kɔl dɛn Gɔd in pikin dɛn.’—Matyu 5:9.

Bɔt sɔntɛnde ɔda pipul dɛn go du wi tin we go mek wi vɛks. Dat na tru, nɔto so?— Dis kin mek wi want fɔ tɔn-am-gi dɛn. Wan tɛm dis bin apin to Jizɔs in disaypul dɛn we dɛn bin de travul wit Jizɔs fɔ go Jerusɛlɛm. Mek a tɛl yu wetin apin.

We dɛn dɔn go fa smɔl, Jizɔs bin sɛn sɔm pan dɛn fɔ go na wan Samɛritan vilej fɔ fɛn ples usay dɛn go blo. Bɔt di pipul dɛn we bin de na di vilej nɔ bin want dɛn fɔ de de, bikɔs di Samɛritan dɛn gɛt difrɛn rilijɔn. Ɛn dɛn nɔ lɛk ɛnibɔdi we de go na Jerusɛlɛm fɔ go wɔship.

Wetin Jems ɛn Jɔn bin want fɔ du fɔ tɔn-am-gi di Samɛritan dɛn?

 If dat bin apin to yu, wetin yu bin fɔ du? Yu go vɛks? Yu go want fɔ tɔn-am-gi dɛn?— Na dat Jems ɛn Jɔn bin want fɔ du. Dɛn aks Jizɔs se: ‘Yu want fɔ lɛ wi mek Gɔd sɛn faya kɔmɔt na ɛvin ɛn kam bɔn dɛn pipul ya?’ No wɔnda we mek Jizɔs kɔl dɛn Tɛnda Pikin dɛn! Bɔt Jizɔs bin tɛl dɛn se i nɔ fayn fɔ trit pipul dɛn da we de.—Lyuk 9:51-56; Mak 3:17.

Na tru se, sɔntɛnde pipul dɛn go trit wi bad. Ɔda pikin dɛn nɔ go want lɛ wi ple gem wit dɛn. Dɛn kin ivin se: “Wi nɔ want yu fɔ padi.” We sɔntin lɛk dis apin, i kin mek wi fil bad, nɔto so? I go mek wi want fɔ du sɔntin fɔ tɔn-am-gi dɛn. Bɔt yu tink se wi fɔ du dat?—

Tek yu Baybul, lɛ wi tɔn to Prɔvabs chapta 24, vas 29. I se: “Nɔ se yu de tɔn dɛt gi yu kɔmpin ɛn dil wit am fɔ wetin i du.”

Wetin yu tink se dis vas ya min?— I min se wi nɔ fɔ tɔn dɛt. Wi nɔ fɔ du bad to pɔsin jɔs bikɔs i bin dɔn du bad tin to wi. Bɔt wetin yu go du we pɔsin want mek yu ɛn in fɛt? I go tray fɔ mek yu vɛks bay we i de kɔl yu ɔlkayn nem. I go ivin laf yu ɛn tɛl yu se yu de fred. If i tɛl yu se yu de fred, wetin yu fɔ du? Yu tink se dat fɔ mek yu fɛt?—

Lɛ wi si wetin di Baybul se. Tɔn to Matyu chapta 5, vas 39. Jizɔs bin se: ‘Una nɔ fɔ du bad to pɔsin we du una bad. If ɛnibɔdi slap yu rayt jɔ, yu fɔ tɔn di lɛft wan gi am mek i slap insɛf.’ Yu no wetin Jizɔs bin min we i tɔk dis? Yu tink se i bin de tray fɔ se we pɔsin bɔks wan say na yu fes, yu fɔ mek i bɔks di ɔda say bak?—

Nɔ-o, nɔto dat Jizɔs min. Slap nɔ tan lɛk we dɛn bɔks yu. Na lɛk we dɛn push yu. Sɔmbɔdi kin slap yu fɔ mek una fɛt. I want  mek yu vɛks. Ɛn if yu vɛks ɛn push am bak, wetin yu tink se go apin?— Sɔntɛnde dat kin mek una fɛt.

Bɔt Jizɔs nɔ bin want mek in disaypul dɛn fɛt. So na dat mek i se if ɛnibɔdi slap wi, wi nɔ fɔ slap am bak. Wi nɔ fɔ vɛks ɛn bigin fɔ fɛt. If wi du dat, dat min se wi ɛn di pɔsin we bigin di fɛt na di sem.

We prɔblɛm bigin, wetin yu tink se na di bɛst tin fɔ du?— Na fɔ kɔmɔt de. I kin bi se di ɔda pɔsin go push push yu. Bɔt sɔntɛm na dat nɔmɔ i go du to yu. We yu kɔmɔt de, i nɔ min se yu nɔ gɛt trɛnk. I min se yu ebul tinap tranga wan fɔ du wetin rayt.

Wetin wi fɔ du if pɔsin tray fɔ mek wi fɛt?

 Bɔt wetin yu tink se go apin if yu fɛt, dɔn yu win?— Di wan we yu bit go go kɔl in padi dɛn ɛn kam mit yu bak. Dɛn go ivin wap yu wit stik ɔ chuk yu wit nɛf. So yu dɔn no wetin mek Jizɔs se wi nɔ fɔ fɛt?—

Wetin wi fɔ du if wi si ɔda pipul dɛn de fɛt? Wi fɔ sɔpɔt wan pan dɛn?— Di Baybul ɛp wi fɔ no wetin na di rayt tin fɔ du. Tɔn to Prɔvabs chapta 26, vas 17. I se: ‘Ɛni bizabɔdi we go gbara kes pan pipul tɔk tan lɛk we pɔsin go ol dɔg in yes.’

We wi sɔpɔt wan pɔsin fɔ fɛt in kɔmpin, aw dat tan lɛk we yu de ol dɔg in yes? Bad tin go apin to yu, so nɔ du am!

Wetin go apin if yu ol dɔg in yes? Di dɔg in at go wam, ɛn i go bigin bak pan yu, nɔto so? Di mɔ we di dɔg go de fɛt-fɛt, na di mɔ yu go gɛt fɔ ol di dɔg in yes tranga wan, ɛn di dɔg go de vɛks mɔ ɛn mɔ. If yu lɛf am, i go mɔs bɛt yu. Bɔt yu tink se yu go tinap de ɛn ol in yes sote go?—

Wɛl, na da kayn trɔbul de wi go gɛt if wi miks usay pipul dɛn de fɛt. Wi nɔ go no udat bigin di fɛt ɔ wetin mek dɛn de fɛt. Sɔntɛm dɛn kin bit sɔmbɔdi, ɛn i kin bi se na sɔntin i tif frɔm di ɔda pɔsin. If wi ɛp am, wi go de ɛp tifman. Dat nɔ go bi fayn tin fɔ du, nɔto so?

 So, wetin yu fɔ du if yu si pipul dɛn de fɛt?— If na skul i apin, yu kin rɔn go tɛl wan ticha. Bɔt if nɔto skul i apin, yu kin kɔl yu mama ɔ yu papa ɔ wan polisman. Pan ɔl we ɔda pipul dɛn go want fɔ fɛt, wi fɔ de mek pis ɔltɛm.

Wetin yu fɔ du we yu si ɔda pipul dɛn de fɛt?

Jizɔs in tru tru disaypul dɛn kin du ɔl wetin dɛn ebul fɔ du fɔ mek dɛn nɔ fɛt. Na dis kayn we wi de sho se wi de tinap tranga wan fɔ wetin rayt. Di Baybul se Jizɔs in disaypul dɛn ‘nɔ fɔ fɛt.’—Sɛkɛn Lɛta To Timoti 2:24.

Naw lɛ wi luk ɔda fayn fayn advays dɛn we go ɛp wi fɔ mek wi nɔ fɛt: Lɛta Fɔ Rom 12:17-21 ɛn Pita In Fɔs Lɛta 3:10, 11.