Onhumwafo kuTitus 3:1-15
3 Twikila oku va dimbulukifa ve liyandje nokudulika komapangelo nokwaavo ve na eenghonopangelo,+ va kale ve lilongekida okulonga oshilonga keshe shiwa,
2 vaha popile vamwe mowii, vaha kale ve hole okutanguna, ndele nava kale ve na ondjele,+ tava ulike omwenyo muwa eshi tava ungaunga novanhu aveshe.+
3 Osheshi nafye katwa li tu na eendunge, katwa li hatu dulika, otwa li twa twalwatwalwa, otwa li ovapika vomahalo e lili noku lili nosho yo vomalihafifo, twa li hatu longo owii, tu na efupandubo, hatu longo oilonga itondifa notwa li tu tondafane.
4 Ndele eshi Kalunga, Omuxupifi wetu,+ a ulikila ovanhu onghenda nohole yaye
5 (hamolwaashi ngeno twa longa oilonga youyuki,+ ndele omolwonghenda yaye),+ okwe tu xupifa, eshi e tu yelifa, opo tu kale nomwenyo+ nokwe tu shitulula okupitila momhepo iyapuki.+
6 Okwe tu tilila omhepo iyapuki pauyadi* okupitila muJesus Kristus, Omuxupifi wetu,+
7 opo ngeenge otwa talika ko tu li ovayuki okupitila mefilonghenda laao,+ tu dule okuninga ovafyuululi+ vomwenyo waalushe oo twa teelela.+
8 Eendjovo odo odi shii okulineekelwa, nonda hala u kale to divilike oinima oyo, opo ovo va itavela muKalunga va kale tava yandje elitulemo kokulonga oilonga iwa. Oinima oyo oiwa notai etele ovanhu ouwa.
9 Henuka omatomhafano a nyika oulai, eendjokonona di na sha nomapata nosho yo eemhata di na sha nOmhango, osheshi oinima oyo oyongaho nokai na ekwafo lasha.+
10 Omunhu oo ta xumifa komesho omahongo oipupulu+ mu kumaida* oshikando shotete noshitivali, ndele ngeenge ita pwilikine kwoove,+ henuka okweendafana naye,+
11 molwaashi ou shi shii kutya okwa kanduka mo mondjila ya yuka, a nyona nokwe litokola ye mwene.
12 Ngeenge onda tumu Artemas, ile Tikikus+ kwoove, kendabala u uye kwaame kuNikopolis, osheshi oko nda diladila oku ka kala pefimbo lokufu.
13 Yambidida Senas, oo e shii nawa Omhango, nosho yo Apollos, opo vaha kale va pumbwa sha molweendo lavo.+
14 Ashike ovanhu vetu navo nave lihonge okulonga oilonga iwa, opo va dule okukwafela, ngeenge opa holoka omhumbwe ya endelela,+ nokungaho otava imike oiimati.+
15 Aveshe ovo ndi li navo otave ku kundile po. Kundila po ovo ve tu hole nove na eitavelo.
Efilonghenda laKalunga nali kale pamwe nanye amushe.
