Onhumwafo kuTitus 1:1-16
1 Ame Paulus, omupiya waKalunga nomuyapostoli waJesus Kristus metwokumwe neitavelo lovahoololwa vaKalunga nosho yo neshiivo lomoule loshili i na sha nokulongela Kalunga netilofimaneko
2 nola kanghamena keteelelo lomwenyo waalushe,+ oo wa udanekwa nalenale kuKalunga oo iha fufya;+
3 ndele peufwafimbo laye, okwa shiivifa eendjovo daye odo nde lineekelelwa+ metwokumwe nelombwelo laKalunga, Omuxupifi wetu;
4 ohandi shangele Titus, omumwange omuholike, oo tu li meitavelo limwe:
Efilonghenda nombili yaKalunga Tate noyOmuxupifi wetu, Kristus Jesus, nai kale pamwe naave.
5 Onde ku fiya muKreta, opo u yukife oinima oyo ihe li melandulafano* nou nangeke po ovakulunhuongalo moilando i lili noku lili ngaashi nde ku lombwela:
6 ovalumenhu ovo hava popilwa mouwa, omushamane e na omukulukadi umwe noku na ovana ovaitaveli, ve na elihumbato liwa* novehe fi ovanashibofa.+
7 Osheshi ngaashi elenga laKalunga, omupashukili oku na okukala ha popilwa mouwa, ehe fi hamutwemukukutu,+ iha handuka diva,+ ehe fi ongholwe, ehe fi omukwanyanya,* iha kongo ouwa waye mwene,
8 ha yakula ovaenda,+ e hole ouwa, omunaendunge,*+ omuyuki, omudiinini,+ e na elipangelo,+
9 ha diinine ondjovo yoshili* i na sha nonghedi yaye yokuhonga,+ opo a dule okuladipika* okupitila mehongo olo liwa*+ nokupukulula+ ovo ve li omhinge nalo.
10 Osheshi ope na ovalumenhu vahapu ovanashibofa, ovo hava popi oinima yongaho, nosho yo ovapukifi, unene tuu ovo va kanyatela kepitotanda.+
11 Oshi li xwepo ovanhu ovo va pate omakanya avo, molwaashi ovalumenhu ovo tuu ovo otava nyono po eitavelo lomaukwaneumbo aeshe, mokuhonga oinima oyo vehe na okuhonga, opo va likole moukengeleledi.
12 Umwe womuvo, omuprofeti wavo, okwa ti: “Ovakreta ohava popi alushe oipupulu, oilyani ya nyika oshiponga, novafukenhu.”
13 Eendjovo odo odoshili. Omolwetomheno olo, twikila oku va pukulula wa mana mo, opo va kale ve na eitavelo la kola
14 novaha yandje elitulemo komahokololo oipupulu Ovajuda nokoipango yovanhu ovo va efa po oshili.
15 Kovakoshoki, oinima aishe oya koshoka,+ ndele kwaavo inava koshoka novehe na eitavelo, oinima aishe inai koshoka, molwaashi omadiladilo neliudo lavo inali koshoka.+
16 Ohava hepaulula moipafi kutya ove shii Kalunga, ndele oilonga yavo ohai ulike kutya kave mu shii,+ molwaashi oilonga yavo oitondifa, ihava dulika noinava talika ko va wana okulonga oilonga keshe iwa.
