Malakia 2:1-17
2 “Ndele paife, ovapristeri nye, oshipango eshi osheni.+
2 Ashike ngeenge omwa anye okupwilikina, noinamu shi dimina momutima mu fimanekife edina lange,” Jehova womatangakwaita osho ta ti, “ohandi ke mu tumina efingo,+ nohandi ka lundululila omanangeko noupuna eni mefingo.+ Heeno, ohandi ka lundululila omanangeko noupuna mefingo, molwaashi inamu shi dimina momutima.”
3 “Taleni! Ohandi ka nyonauna* ombuto yeni oyo mwa kuna omolweni,+ nohandi ke mu nipila oshandja moipala yeni, oshandja shoivilo yeni; notamu ka twalwa kuyo.*
4 Opo nee otamu ka shiiva kutya onde mu pa oshipango eshi, opo ehangano lange naLevi li kale la pama,”+ Jehova womatangakwaita osho ta ti.
5 “Ehangano lange naye ola li lomwenyo nolombili, olo nde mu pa a kale e na etilo.* Okwa li ha tila nge, heeno, okwa kala ha kakama omolwedina lange.
6 Omhango* yoshili oya kala mokanya kaye,+ nouhenouyuki inau monika komilungu daye. Okwa enda pamwe naame nombili nosho yo mouyuki,+ nokwa kwafela vahapu va efe po osho shii.
7 Osheshi omilungu domupristeri odi na okutuvikila eshiivo, novanhu ove na okukonga omhango* mokanya kaye,+ molwaashi oye omutumwa waJehova womatangakwaita.
8 “Ashike nye vene omwa yapuka mo mondjila. Omwa ningifa vahapu va punduke shi na sha nomhango.*+ Omwa nyona ehangano laLevi,”+ Jehova womatangakwaita osho ta ti.
9 “Ashike ohandi ke mu ningifa mu tondike noku mu ninipika moipafi yovanhu aveshe, molwaashi inamu diinina eendjila dange, ndele omwa ulika onhondo, ngeenge tashi uya pokutula moilonga omhango.”+
10 “Mbela atushe katu na xe umwe?+ Mbela inatu shitwa kuKalunga umwe? Omolwashike tu na okukengelelafana,+ okunyateka ehangano lootatekulululwa?
11 Juda okwa kengelela, noshinima shitondifa osha kala tashi ningwa muIsrael nomuJerusalem; osheshi Juda okwa nyateka ouyapuki* waJehova,+ oo E hole, nokwa kufa omufuko, omonakadona wakalunga wokoilongo.+
12 Jehova ota ka xulifa po keshe oo ha ningi ngaho momatwali aJakob, kashi na nee mbudi kutya olyelye,* nonande oha yambele Jehova womatangakwaita eyambo.”+
13 “Nope na vali oshinima shikwao* osho hamu ningi, osho sha ningifa oaltari yaJehova i uvikwe nomahodi nokulila nokutwa omadima, onghee iha yandje vali elitulemo komayambo eni, ile a hokwe sha vali tashi di momake eni.+
14 Nomwa ti, ‘Onetomheno lashike?’ OmolwaJehova oo a li ondombwedi pokati koye nomukulukadi womounyasha woye, oo wa kengelela, nonande oku li kaume koye nomukulukadi woye pahangano.*+
15 Ashike ope na oo ina ninga ngaho, osheshi oku na oshixupe shomhepo. Nokwa li ta kongo shike? Oludalo* laKalunga. Onghee lipashukileni nye vene shi na sha nomhepo yeni, noinamu kengelela ovakulukadi veni vomounyasha.
16 Osheshi ondi tonde* eteyohombo,”+ Jehova Kalunga kaIsrael osho ta ti, “naao ta uvike oshikutu shaye nelongifo leenghono,”* Jehova womatangakwaita osho ta ti. “Ndele lipashukileni nye vene shi na sha nomhepo yeni, noinamu kengelela.+
17 “Omwa lolola Jehova neendjovo deni.+ Ashike nye omwa ti: ‘Otwe mu lolola ngahelipi?’ Omokutya ‘Keshe oo ta longo osho shii omuwa momesho aJehova, nokwe mu hokwa,’+ ile omokutya, ‘Kalunga kouyuki oku li peni?’”
Omashangelo opedu
^ Eln., “hanyena.”
^ Sha hala okutya, konhele oko kwa li haku ekelwa oshandja shomayambo.
^ Ile “efimaneko; efimaneko linene.”
^ Ile “Elombwelo.”
^ Ile “elombwelo.”
^ Ile tashi dulika, “omolwelombwelo leni.”
^ Ile tashi dulika, “onhele iyapuki.”
^ Eln., “oo e li oupafi nosho yo oo ha nyamukula.”
^ Eln., “oshitivali.”
^ Ile “nomukulukadi woye wopaveta.”
^ Eln., “Ombuto.”
^ Eln., “oku tonde.”
^ Ile “ta kufa ombinga melongifo leenghono.”
