Malakia 1:1-14
1 Eshiivifo:
Ondjovo yaJehova okupitila muMalakia* ya nuninwa Israel:
2 “Ovanhu nye, onde mu ulikila ohole,”+ Jehova osho ta ti.
Ashike nye ohamu ti: “Owe tu ulikila ngahelipi ohole?”
“Hamba Esau ka li omumwaina waJakob?”+ Jehova osho ta ti. “Ashike onda li ndi hole Jakob,
3 ndele onda li ndi tonde Esau;+ nonda mbuwapaleka eemhunda daye,+ nefyuululo laye onde li fiila ookavandje vomombuwa.”+
4 “Nonande Edom ota ti, ‘Otwa hanaunwa po, ashike ohatu ka aluka nokutungulula oikulukuma,’ eshi osho Jehova womatangakwaita ta ti, ‘Otava ka tunga, ashike ame ohandi ka teyaula, notava ka ifanwa “oshitukulwa shoukolokoshi” nosho yo “ovanhu ovo Jehova a tokola fiyo alushe.”+
5 Omesho eni otae ke shi mona, notamu ka tya: “Jehova na hambelelwe moshitukulwa shaIsrael.”’”
6 “‘Omonamati oha fimaneke xe,+ nomupiya omwene waye. Onghee ngeenge ame oxe,+ efimano olo ndi na okupewa oli li peni?+ Nongeenge ame omwene,* oumbada* wokutila nge ou li peni?’ Jehova womatangakwaita osho te mu lombwele, nye ovapristeri, ovo mwa dina edina lange.+
“‘Ashike ohamu ti: “Edina loye otwe li dina ngahelipi?”’
7 “‘Omokuyamba oikulya* ya nyata koaltari yange.’
“‘Nohamu ti: “Otwe ku nyateka ngahelipi?”’
“‘Omokupopya kutya: “Oshitaafula shaJehova+ oshinima shidinifa.”
8 Nongeenge tamu yandje oshinamwenyo shipofi, shi li eyambo, ohamu ti: “Kashi fi oshinima shii.” Nongeenge tamu yandje oshinamwenyo sha lemana, ile tashi vele: “Kashi fi oshinima shii.”’”+
“Kendabaleni oku i yandja, alikana, kungoloneya weni. Mbela ote ke mu hokwa, ile e mu tambule ko nehafo?” Jehova womatangakwaita osho ta ti.
9 “Ndele paife, alikana, indileni* kuKalunga, pamwe te tu file onghenda. Mbela ota ka tambula ko umwe womunye nehafo, mu na omayambo a tya ngaho momake eni?” Jehova womatangakwaita osho ta ti.
10 “Nolyelye mokati keni ta ka idila omivelo* nehalo liwa?+ Osheshi nye ihamu tema nokuli oaltari yange, nopehe na ofuto.+ Inandi mu hokwa,” Jehova womatangakwaita osho ta ti, “noinandi hokwa eyambo keshe tali di momake eni.”+
11 “Okudja oko haku piti etango fiyo okoko hali ningine,* edina lange otali ka kala linene mokati koiwana.+ Omayambo otaa ka twiminwa monhele keshe, nomayambo otaa ka yambelwa edina lange, e li eyambo la koshoka; molwaashi edina lange otali ka kala linene mokati koiwana,”+ Jehova womatangakwaita osho ta ti.
12 “Ashike nye otamu li nyateke,*+ eshi hamu ti, ‘Oshitaafula shaJehova osha nyata, noshiimati shasho, oikulya yasho, oi li oinima itondifa.’+
13 Ohamu ti yo, ‘Tala! Kashi lolola tuu!’ nohamu shi nyika nodino,” Jehova womatangakwaita osho ta ti. “Nohamu eta oinamwenyo ya vakwa, ya lemana notai vele. Heeno, ohamu eta oinima ya tya ngaho i li eyambo! Mbela nandi i tambule ngoo momake eni?”+ Jehova osho ta ti.
14 “Omukengeleledi na fingwe, ou e na oshinamwenyo shoshindume moufita waye, ashike oha ane nokuyamba osho shi na oshipo* kuJehova. Osheshi aame Ohamba inene,”+ Jehova womatangakwaita osho ta ti, “nedina lange otali ka kala likumwifi mokati koiwana.”+
