Levitikus 5:1-19
5 “‘Ngeenge umwe* oku na oumbangi kombinga yomunyonena,+ e u mona, ile e u uda, ndele eshi a uda taku pulwa moipafi* eendombwedi ina tya sha, kungaho okwa nyona nota ka handukilwa omolwenyono olo.
2 “‘Ile ngeenge omunhu* okwa kumu sha inashi koshoka, kutya nee oshifitukuti sha fya inashi koshoka, ile oshinamwenyo shopovanhu inashi koshoka, ile oipuka aishe inai koshoka,+ ota kala ina koshoka nota kala e na etimba nokuli nonande ka li e shi shii.
3 Ile ngeenge umwe okwa kumu sha sha nyata ine shi didilika,+ osho tashi mu ningifa a kale ina koshoka, ndele te ke shi didilika mo, ota kala e na etimba.
4 “‘Ile ngeenge umwe* okwa ane meendelelo okuninga sha, kutya nee oshiwa, ile oshii, kashi na nee mbudi kutya oshike, ashike ka li e shi shii, ndele te ke shi didilika kutya okwa ninga eano meendelelo, ota kala e na etimba.*+
5 “‘Ngeenge okwa kala e na ondjo mokunyona shimwe shomoinima oyo, oku na okuhepaulula+ enyono laye.
6 Oku na yo okweeta elivelombediyambo laye kuJehova omolwenyono olo a nyona,+ oshimuna oshikadi shomoufita waye, kutya nee odjona yonghadi, ile oshikombo shoshindema shetimbayambo. Opo nee omupristeri ote ke mu kwatakanifa omolwenyono laye.
7 “‘Ashike ngeenge ita dulu okuyandja odi, oku na okuyandja kuJehova eenghuti mbali domatende, ile eenghutyona mbali dopovanhu+ di li elivelombediyambo omolwenyono laye, imwe oyetimbayambo, naikwao oyexwikiloyambo.+
8 Ote ke di yandja komupristeri, oo ta ka yandja oyo yotete i li etimbayambo, note ke i toshola pomunino, nopehe na okukufa ko omutwe.
9 Ota ka shamina ohonde imwe yetimbayambo kombinga yoaltari, ashike ohonde oyo ya xupa po ote ke i shishifila koshitako shoaltari.+ Oi li etimbayambo.
10 Ota ka ungaunga naikwao i li exwikiloyambo ngaashi hashi ningwa,+ nomupristeri ote ke mu kwatakanifa omolwenyono olo a nyona, note ke li diminwa po.+
11 “‘Ngeenge ita dulu okuyandja eenghuti mbali domatende, ile eenghutyona mbali dopovanhu, oku na okweeta eyambo lenyono laye loshitimulongo shoefa*+ youfila wa nakwa nawa wetimbayambo. Ke na okuweda mo omaadi, ile okutula mo eka ledimba liwa, molwaashi oli li etimbayambo.
12 Ote ke u twala komupristeri, nomupristeri ota ka kufa mo eshambekela li lile po eyambo alishe,* note ke u xwikila koaltari kombada yomayambo aJehova, oo a yambwa okupitila momundilo. Oli li etimbayambo.
13 Omupristeri ote ke mu kwatakanifa omolwenyono olo a nyona, enyono keshe lomomanyono oo, note ke li diminwa po.+ Eyambo olo la xupa po otali ningi lomupristeri,+ ngaashi ashike eendjayambo.’”+
14 Jehova okwa twikila okupopya naMoses ta ti:
15 “Ngeenge umwe* okwa kala ehe fi omudiinini mokunyona oinima iyapuki yaJehova shihe fi oshiningilewina,+ oku na okweeta kuJehova odi yondume ya koshoka ya dja moimuna yaye, i li elivelombediyambo.+ Ongushu yayo meesekeli* doshisilveri oi na okuyelekwa she likolelela koshiyelekifo shosekeli shomonhele iyapuki.*+
16 Oku na okufuta omolwenyono olo a nyona monhele iyapuki, nota ka weda ko yo oshititano kongushu yayo.+ Ote ke i yandja komupristeri, opo omupristeri a dule oku mu kwatakanifa+ nodi yondume yeyambo lelivelombediyambo, note ke li diminwa po.+
17 “Ngeenge umwe* okwa nyono mokuninga keshe osho Jehova a popya shiha ningwe, nokuli nonande ke shi shii, natango oku na etimba, nota ka mona oilanduliko yenyono laye.+
18 Oku na okutwala komupristeri odi yondume ya koshoka yomoimuna yaye, she likolelela kongushu oyo ya tengenekwa yelivelombediyambo.+ Opo nee omupristeri ote ke mu kwatakanifa omolwenyono lihe fi loshiningilewina olo a nyona nopehe na oku shi shiiva, note ke li diminwa po.
19 Oli li elivelombediyambo. Oku na filufilu etimba eshi a nyona kuJehova.”
Omashangelo opedu
^ Eln., “ewi lefingo.” Tashi dulika eshiivifo li na sha nenyono nosho yo efingo lanakunyona, ile ombangi oyo ya dopa okuyandja oumbangi.
^ Ile “omwenyo.”
^ Ile “omwenyo.”
^ Ile “omwenyo.”
^ Osha fa shi li ngaha kutya ina wanifa po eano laye.
^ Oshitimulongo shoefa imwe oshi fike peelita 2,2. Tala Oshiw. B14.
^ Ile “oshitukulwa sheyambo osho shi li edimbulukifo.”
^ Ile “omwenyo.”
^ Ile “kosekeli iyapuki.”
^ Osekeli imwe oi fike peegrama 11,4. Tala Oshiw. B14.
^ Ile “omwenyo.”
