Levitikus 12:1-8
-
Okukosholwa konima yokudala okaana (1-8)
12 Jehova okwa twikila okulombwela Moses, ta ti:
2 “Lombwela Ovaisrael kutya, ‘Ngeenge omukainhu okwa ningi oufimba, ndele ta dala okaana okamati ota kala ina koshoka oule womafiku aheyali, ngaashi ashike ha kala ina koshoka momafiku oo e li komafimbo.
3 Mefiku etihetatu, oke na okutetwa oshipa shokoxulo youlumenhu wako.
4 Omukainhu oo ota ka twikila okuliyelifa oule womafiku 33 a shikula ko omolwohonde oyo a kanifa. Ke na okukuma oshinima shiyapuki, noke na okuya monhele iyapuki, fiyo osheshi a mana ko omafiku aye okuliyelifa.
5 “‘Ngeenge okwa dala okaana okakadona, ota kala ina koshoka oule womafiku 14, ngaashi ashike ha kala ngeenge e li komafimbo. Omukainhu oo ota ka twikila okuliyelifa oule womafiku a shikula ko 66 omolwohonde oyo a kanifa.
6 Ngeenge okwa mane ko omafiku aye okuliyelifa omolwokamonamati, ile okamonakadona, ota ka eta odjona yondume i na omudo umwe yexwikiloyambo nosho yo onghutyona yopovanhu, ile onghuti yetende yetimbayambo komupristeri poshivelo shetwali lokwoongalela.
7 Omupristeri ote ke di yandja koshipala shaJehova noku mu koshola, nota ka kala a koshoka ketiko laye lohonde. Ei omhango i na sha nomukainhu oo a dala okaana, kutya nee okamati, ile okakadona.
8 Ashike ngeenge ita dulu okuyandja odi, na yandje eenghuti mbali domatende, ile eenghutyona mbali dopovanhu, imwe oyexwikiloyambo naikwao oyetimbayambo, nomupristeri ote ke mu koshola, nota kala a koshoka.’”
