Levitikus 21:1-24
21 Jehova okwa twikila okupopya naMoses ta ti: “Popya novapristeri, ovanamati vaAron, u tye kuvo, ‘Kape na omunhu e na okulinyateka ye mwene omolwoshimhu shomunhu* oo a fya moshiwana shavo.+
2 Ashike ota dulu oku shi ninga omolwomupambele wopopepi elela, ina, xe, omonamati, omonakadona nosho yo omumwainamati.
3 Ota dulu yo okulinyateka omolwomumwaina okakadona, ngeenge okakadona elela, oo e li omupambele waye wopopepi elela noina hombolwa natango.
4 Ita dulu okulinyateka ye mwene, ndele ta kala ehe fi omuyapuki omolwomukainhu oo e na omushamane womoshiwana shavo.
5 Kave na okulikulula eengwala,+ ile okuteta ko eexulo deendjedi davo, ile okulitetaula komalutu avo.+
6 Ove na okukala vayapuki kuKalunga kavo,+ nokave na okunyateka edina laKalunga kavo,+ osheshi otava yandje omayambo aJehova, oo a yambwa okupitila momundilo, omungome* waKalunga kavo, nove na okukala ovayapuki.+
7 Kave na okuhombola ombwada,+ omukainhu oo a nyatekwa, ile omukulukadi oo a hengwa po komushamane waye,+ molwaashi omupristeri omuyapuki kuKalunga kaye.
8 Ou na oku mu yapula,+ molwaashi oye ta ka yandja omungome waKalunga keni. Oku na okukala omuyapuki kwoove, molwaashi Ame Jehova, ou handi mu yapula, ondimuyapuki.+
9 “‘Ngeenge omonakadona womupristeri ote linyateke mokulininga ombwada, ota shekifa xe. Oku na okuxwikwa po momundilo.+
10 “‘Omupristeri munene mokati kovamwaxe, oo a li a tilwa omaadi okuvaeka momutwe+ nokwa nangekwa po* a djale oikutu youpristeri,+ ke na okweefa eexwiki daye di kale inadi kamulwa, ile a pombole oikutu yaye.+
11 Ke na okuya pomunhu keshe a fya;*+ ita dulu okulinyateka ye mwene, nokuli nomolwaxe, ile ina.
12 Ke na okudja mo monhele iyapuki noke na okunyateka onhele iyapuki yaKalunga kaye,+ molwaashi edidiliko li na sha nokunangekwa po, omaadi okuvaeka aKalunga,+ oi li kombada yaye. Aame Jehova.
13 “‘Oku na okulikongela okakadona elela+ ka ninge omukulukadi waye.
14 Ke na okuhombola omufiyekadi, omukulukadi oo a hengwa, omukainhu oo a nyatekwa, ile ombwada, ashike oku na okukonga moshiwana shavo okakadona elela ka ninge omukulukadi waye.
15 Ke na okunyateka oludalo laye olo li li moshiwana shavo,+ osheshi aame Jehova, oo handi mu yapula.’”
16 Jehova okwa twikila okupopya naMoses ta ti:
17 “Lombwela Aron kutya, ‘Kape na umwe womoludalo loye fiyo okomapupi alo aeshe oo e na oupyakadi washa, ta dulu okuyandja omungome waKalunga kaye.
18 Ngeenge ope na omunhu oo e na oupyakadi washa kolutu, ita dulu okweehena popepi: omunhu omupofi, ile oshingudu, ile e na oshipala shi na epuko lasha,* ile okaulu, ile okwooko kale unene,
19 omunhu oo e na omhadi, ile onyala ya teka,
20 onhunda, ile omunhu oo e li eungwa,* ile omunhu oo e na eisho li na oupyakadi, ile omavala taa nyuwa, ile ehenghadi, ile omatondo a lemana.+
21 Kape na omunhu womoludalo lomupristeri Aron, oo e na oupyakadi washa kolutu, ta dulu okweehena popepi a yandje omayambo aJehova, oo taa yambwa okupitila momundilo. Molwaashi oku na oupyakadi wonhumba, ita dulu okweehena popepi a yandje omungome waKalunga kaye.
22 Ota dulu okulya omungome waKalunga kaye oo wa dja moinima iyapuki elela+ nosho yo moinima iyapuki.+
23 Ashike ita dulu okweehena popepi netukulifolapi,+ noita dulu okweehena popepi noaltari,+ molwaashi muye omu na oupyakadi. Ke na okunyateka onhele yange iyapuki,+ osheshi aame Jehova, oo handi va yapula.’”+
24 Onghee Moses okwa popya naAron, ovanamati vaye nosho yo Ovaisrael aveshe.
Omashangelo opedu
^ Ile “shomwenyo.”
^ Ile “oikulya,” tai ulike komayambo.
^ Eln., “oo omake aye a li a yadifwa.”
^ Ile “omwenyo keshe wa fya.” Oshitya shOshiheberi nephesh pomhito ei otashi yukifwa koshitya shOshiheberi osho tashi ti “okufya.”
^ Eln., “ile eyulu la poyoka.”
^ Ile tashi dulika, “e na olutu la ngona.”
