Joel 2:1-32
2 “Shikeni enghuma muSion!+
Ingideni eingido loita komhunda yange iyapuki.
Ovakalimo aveshe vomoshilongo* nava kakame,Osheshi efiku laJehova otali uya!+ Oli li popepi!
2 Lo efiku lomilaulu nolomidimbi,+Efiku loilemo nolomilaulu fokofoko,+Ngaashi ouyelele weluwa tau lihanene keemhunda.
Ope na ovanhu vahapu novanaenghono;+Inaku kala nale ovanhu vahapu ngaho,Noitava ka kala ko vali nandenandeMomukokomoko weedula domapupi aeshe.
3 Komesho yavo oku na omundilo tau lefeke,Nokonima yavo omalaka omundilo taa lungwinifa.+
Edu olo li li komesho yasho, ola fa oshikunino shaEden,+Ashike konima yavo ombuwa yongaho,Nokape na osho tashi dulu okuya onhapo.
4 Eholokepo lavo ola fa eholokepo leenghambe,Nohava tondoka ngaashi eenghambe domoita.+
5 Omalinyengo okwa fa oo omatemba, eshi tava nhukauka keexulo deemhunda,+Ngaashi omundilo tau topa, oo tau lungwinifa oshihati.
Ova fa ovanhu ovanaenghono ve lilongekidila olwoodi.+
6 Ovanhu aveshe otava ka kema omolwavo.
Oshipala keshe otashi ka kwatwa koumbada.
7 Ohava lotoka ngaashi ovakwaita ovaladi,Ohava londo ekuma ngaashi ovakwaita,Keshe umwe oha kala mondjila yaye,Ihava kanduka mo momalila avo.
8 Ihava undulafana;Omunhu keshe oha pula komesho mondjila yaye.
Ngeenge oilwifo* oya ufa po vamwe,Vakwao ihava shuna monima.
9 Ohava endelele va finda moshilando; ohava tondoka kombada yekuma.
Ohava londo kombada yomaumbo, ohava pitile momakende ngaashi ombudi.
10 Edu otali kakama, neulu otali dekweta moipafi yavo.
Etango nomwedi oya laula,+Neenyofi oda fiilila.
11 Jehova ota yelula ondaka yaye moipafi komesho yetangakwaita laye,+ osheshi onhanda yaye oya kula neenghono.+
Osheshi ou ta wanifa po ondjovo yaYe omunaenghono;Osheshi efiku laJehova olinene nolikumwifi unene.+
Olyelye ta dulu oku li lididimikila?”+
12 “Nokuli nopaife,” Jehova osho ta ti, “alukileni kwaame nomitima deni adishe,+Tamu lidilike+ notamu lili nokulilaana.
13 Pombauleni omitima deni,+ ndele haikutu yeni,+Nokwaalukila kuJehova, Kalunga keni,Osheshi ye omunalukeno* nomunanghenda, iha handuka diva+ noku na filufilu ohole i na oudiinini,+Nota ka talulula* oupyakadi.
14 Olyelye e shi shii ngeenge ote lialuluka nokutalulula*+Nokufiya po enangeko noupuna,Eendjayambo noikunwayambo yaJehova, Kalunga keni?
15 Shikeni enghuma muSion!
Shiivifeni* efiku lokulidilika; naku ningwe oshoongalele shiyapuki.+
16 Ongeleni ovanhu; yapuleni eongalo.+
Ongeleni ovalumenhu ovanamido;* ongeleni ounona nouhanana.+
Omuhomboli na dje mo monduda yaye yomeni, nomuhombolwa omonduda yaye yomufuko.
17 Pokati kokanduda kokufikila noaltari,+Ovapristeri, ovayakuli vaJehova, nava lile tava ti:
‘Akutu, Jehova, fila onghenda oshiwana shoye;Ino ninga efyuululo loye oshinima shokudinika,Mokweefa oiwana i va pangele.
Omolwashike ovanhu ve na okutya, “Kalunga kavo oku li peni?”’+
18 Opo nee Jehova ota ka kondjela oshilongo shaye nouladiNokukenukila oshiwana shaye.+
19 Jehova ota ka nyamukula oshiwana shaye ta ti:
‘Paife ohandi mu pe oilya, omaviinyu mape nomaadi,Notamu ka kuta filufilu;+Itandi ke mu ninga vali oshinima shokudinika mokati koiwana.+
20 Ohandi ka taataela omunhu wokolundume kokule nanye;Ohandi ke mu lihanifila kedu likukutu nokombuwa yongaho,Netangakwaita laye lokomesho* okefuta lokoushilo,*Netangakwaita laye lokonima okefuta lokouninginino.*
Edimba laye lii otali ka nyika,Edimba laye litondifa otali ka kala nokunyika;+Osheshi Ye ota ka longa oilonga inene.’
21 Ino kala wa tila, ove edu.
Kala wa hafa nokunyakukwa, osheshi Jehova ota ka longa oinima inene.
22 Inamu kala mwa tila, nye oinamwenyo yomoixwa,Osheshi omaulifilo omombuwa otaa ka kala e yadi omwiidi,+Nomiti otadi ka ima oiimati;+Omukwiyu nomundjebele otadi ka ima nawanawa.+
23 Nye ovanamati vaSion, hafeni nokunyakukwa omolwaJehova, Kalunga keni;+Osheshi ote ke mu lokifila odula yopokufu ya wana,Note ke mu lokifila omata odula,Odula yopokulombo noyopoitemadula ngaashi shito.+
24 Oipale otai ka kala i yadi oilya iwa,Noikolelo otai ka kunguluka omaviinyu mape nomaadi.+
25 Nohandi ke mu shunifila oinima oyo mwa kanifa moule weedula,Oyo ya lika po koshipaxu hashi ende meengudu, koshipaxu shihe na omavava, koshipaxu sha nyika oshiponga nokoshipaxu hashi hanauna,Etangakwaita lange linene olo nda tumine mokati keni.+
26 Otamu ka lya shili, fiyo mwa kuta,+Notamu ka hambelela edina laJehova, Kalunga keni,+Oo a longa oinenelonga ponhele yeni;Oshiwana shange itashi ka fifwa vali ohoni.+
27 Notamu ka shiiva kutya ondi li mokati kOvaisrael+Nonokutya aame Jehova, Kalunga keni,+ kape na vali umwe!
Oshiwana shange itashi ka fifwa vali ohoni.
28 Konima yaasho, ohandi ka tilila omhepo yange+ kombelela aishe,Novanamati veni novanakadona veni otava ka xunganeka,Ovalumenhu veni ovanamido otava ka twa eendjodi,Novalumenhu veni ovanyasha otava ka mona omamoniko.+
29 Nokuli novapiya vange ovalumenhu novapiya ovakainhuOhandi ke va tilila omhepo yange pomafiku oo.
30 Nohandi ka holola oinenelonga* keulu nokombada yedu,Ohonde nomundilo nomwifi tau lundumuka.+
31 Etango otali ka laula, nomwedi otau ka shituka ohonde,+Ofimbo efiku laJehova linene nolikumwifi inali uya.+
32 Nakeshe ou ta ifana edina Jehova ota ka xupifwa;+Osheshi kOmhunda yaSion nomuJerusalem otamu ka kala ovo va ya onhapo,+ ngaashi ashike Jehova a ti,Ooluxupe ovo Jehova ta ifana.”
