Hesekiel 6:1-14
6 Ondjovo yaJehova oye uya vali kwaame tai ti:
2 “Omona womunhu, taalelifa oshipala shoye keemhunda daIsrael, ndele to xunganeke shi na sha navo.
3 Ou na okutya, ‘Nye eemhunda daIsrael, udeni ondjovo yOmwene Omunamapangelo aeshe, Jehova, tai ti: Eshi osho Omwene Omunamapangelo aeshe, Jehova, ta ti keemhunda, koikulundudu, komakungulukilo nokomalufilu: “Taleni! Ohandi ke mu etela eongamukonda li mu lwife, nohandi ka hanauna po eenhele deni dokoikulundudu.
4 Eealtari deni otadi ka hanaunwa po, eealtari deni dokutwimina otadi ka ngumaunwa po,+ nohandi ka ekelashi oonakudipawa veni moipafi yoikalunga yeni itondifa.*+
5 Ohandi ka ekelashi oimhu yOvaisrael moipafi yoikalunga yavo itondifa, nohandi ka halakanifila omakipa eni meealtari deni.+
6 Meenhele adishe, omo hamu kala, oilando otai ka ngumaunwa po,+ neenhele dokoikulundudu otadi ka ngumaunwa po nokuhanaunwa po.+ Eealtari deni otadi ka ngumaunwa po nokuteyaulwa po, oikalunga yeni itondifa otai ka xulifwa po, neealtari deni dokutwimina otadi ka tetaulwa po, noilonga yeni otai ka xulifwa po.
7 Naavo tava ka dipawa otava ka napakana mokati keni,+ nomu na oku ka shiiva kutya aame Jehova.+
8 “‘“Ashike ohandi ka efa pa kale ooluxupe, osheshi vamwe vomunye otamu ka ya onhapo eongamukonda mokati koiwana, eshi tamu ke lihanena moilando aishe.+
9 Naavo tava ka ya onhapo otava ka dimbuluka nge mokati koiwana, oko tava ka twalwa moukwatwa.+ Otava ka mona kutya omutima wange owa li wa teyauka omolwomitima davo dihe fi didiinini,* odo da pilamena nge,+ nomolwomesho avo oo taa shikula nokahalu* oikalunga yavo itondifa.+ Otava ka fya ohoni nokunyanyala owii aushe nosho yo oinima aishe itondifa oyo va ninga.+
10 Ove na oku ka shiiva kutya aame Jehova nosho yo kutya omalondwelo ange oku va etela oudjuu ou kaa li ongaho.”’+
11 “Eshi osho Omwene Omunamapangelo aeshe, Jehova, ta ti: ‘Pandula omake oye nokudenga omhadi yoye pedu nokunyika oluhodi omolwowii aushe nosho yo oinima itondifa, oyo ya longwa keumbo laIsrael, osheshi otava ka fya keongamukonda, kondjala nokoudu wolutapo.+
12 Oo e li kokule ota ka fya koudu wolutapo, naao e li popepi ota ka fya keongamukonda, nakeshe oo a ya onhapo oinima oyo nokwa xupa ota ka fya kondjala; nohandi ke va fululukila nehandu lange.+
13 Nou na oku ka shiiva kutya aame Jehova,+ eshi oimhu oyo tai ka nangala mokati koikalunga yavo itondifa, ya dingilila eealtari davo,+ i li koshikulundudu keshe shile, keexulo deemhunda adishe, koshi yomuti keshe wa kula nosho yo koshi yoitai yomiti dinene, oko hava yambele oitwimino,* va hafife oikalunga yavo aishe itondifa.+
14 Ohandi ka yelula eke lange ndi va lwife nokuninga edu ombuwa, neenhele davo adishe dokukala otadi ka ninga ombuwa, di dulife ombuwa oyo i li popepi naDibla. Nove na oku ka shiiva kutya aame Jehova.’”
