Hesekiel 4:1-17
4 “Ndele ove, omona womunhu, kufa odopi, ndele to i tula komesho yoye. Takela ko oshilando Jerusalem.
2 Shi nangela,+ tunga ekuma le shi dingilila,+ ninga ekondeka le shi dingilila,+ onga eenhanda de shi dingilila noku shi dingilila noilongifo yoku shi ngumaunifa po.+
3 Kufa oshipana sha longwa moshivela shilaula, ndele to shi tula pokati koye noshilando onga ekuma la longwa moshivela shilaula. Opo nee taalelifa oshipala shoye kusho, notashi ka kondekwa; oove to ke shi kwata ko. Eshi oshi li edidiliko keumbo laIsrael.+
4 “Opo nee ou na okunangela kombinga yoye yokolumosho, nokutula etimba leumbo laIsrael kwoove.*+ Oto ka humbata omatimba avo oule womafiku, oo to ka nangela kolupati loye.
5 Nohandi ke ku pa omafiku 390, e fike peedula domatimba avo,+ noto ka humbata omatimba eumbo laIsrael.
6 Nou na oku a wanifa po.
“Opo nee oto ka nangela oshikando oshitivali kolulyo loye, noto ka humbata omatimba eumbo laJuda+ oule womafiku 40. Efiku limwe odula, efiku limwe odula, olo nde ku pa.
7 Noto ka taalelifa oshipala shoye kuJerusalem osho sha kondekwa+ nokwooko ku li kombada,* nou na oku shi xunganekela owii.
8 “Tala! Ohandi ku mange neengodi, opo uha dule okutanaukila kombinga yoye imwe nokuikwao, fiyo osheshi wa manifa omafiku oku shi dingilila.
9 “Nou na okukufa oilya yo-wheat, yo-barley, epoke, okakunde, oilya yomaludi amwe nokalya koludi limwe,* noku i tula moshikwatelwa shimwe nokuliningila omungome. Osheshi oto ke u lya omafiku oo to nangele kolupati loye, omafiku 390.+
10 Oto ke u yeleka noto ka lya oikulya yeesekeli 20* efiku keshe. Oto ke u lya pomafimbo oo a tulwa po.
11 “Noto ka nwa omeva pashiyelekifo, oshitihamano sho-hin.* Oto ke a nwa pomafimbo oo a tulwa po.
12 “Oto ke u lya ngaashi to li omungome wongonga woilya yo-barley; oto ke u teleka moipafi yavo to longifa omatudi omunhu a kukuta e li onga oikuni.”
13 Jehova okwa weda ko ta ti: “Ovaisrael osho tava ka lya omungome wavo ngaha, inau koshoka, mokati koiwana, omo handi ke ve lihanifila.”+
14 Opo nee onda tya: “Hasho ngaho, Omwene Omunamapangelo aeshe, Jehova! Okudja kounyasha wange fiyo opaife, inandi* linyateka mokulya ombelela yoshinamwenyo, osho sha hangika she lifila, ile oshinamwenyo sha lika,+ nokape na ombelela inai koshoka* ya enda mokanya kange.”+
15 Onghee okwa tya kwaame: “Eewa, ohandi ku efa u longife omapumba eengobe ponhele yomatudi omunhu, noto ka teleka omungome woye kombada yao.”
16 Opo nee okwa tya kwaame: “Omona womunhu, ohandi xulifa po eedjo doikulya* muJerusalem,+ notava ka lya omungome wavo tava yeleke ve na oshisho sha pitilila,+ notava ka nwa omeva avo tava yeleke.+
17 Eshi otashi ka ningwa, opo omungome nomeva i kale ya pumba, va ka talafane nonghumwe nokuxula po omolwepuko lavo.
Omashangelo opedu
^ Eln., “kulo,” sha hala okutya, kombinga yokolumosho laHesekiel.
^ Ile “nokwooko kuhe li moshikutu.”
^ Ile “okalya ko-spelt.”
^ Eegrama 230 lwaapo. Tala Oshiw. B14.
^ Eelita 0,6 lwaapo. Tala Oshiw. B14.
^ Ile “omwenyo wange inau.”
^ Ile “itondifa.”
^ Eln., “hanauna po oiti yomungome.” Tashi dulika tashi ulike koiti oko kwa li haku tulikwa omingome.
