Omafimbo omativali 5:1-14
5 Onghee Salomo okwa li a manifa oilonga aishe, oyo a li e na okulonga omolweumbo laJehova.+ Opo nee Salomo okwa twala mo oinima, oyo xe, David, a yapula,+ ndele ta twala oshisilveri, oshingoli noinima aishe meemhungulilo deumbo laKalunga kashili.+
2 Pefimbo opo, Salomo okwa li a ongela ovakulunhu vaIsrael, omitwe adishe domapata nomalenga omaukwaneumbo omapata aIsrael. Ova li va ya kuJerusalem, va ka tale oshikefa shehangano laJehova kOshilando shaDavid,+ sha hala okutya, kuSion.+
3 Ovalumenhu aveshe Ovaisrael ova li va ongala koshipala shohamba poshivilo,* osho sha li hashi ningwa momwedi omutiheyali.+
4 Onghee ovakulunhu aveshe vaIsrael ove uya, nOvalevi ova tumba po Oshikefa.+
5 Ova twala Oshikefa, etwali lokwoongalela+ noilongifo aishe iyapuki, oyo ya li metwali. Ovapristeri nOvalevi* ova twala oinima oyo.
6 Ohamba Salomo nosho yo ongudu aishe yOvaisrael, ovo va li va tumwa ve ke mu shakeneke, ova li komesho yOshikefa osho. Onghee opa li pa yambwa eedi neengobe dihapu neenghono,+ itadi dulu nokuli okuvalulwa.
7 Opo nee ovapristeri ova twala oshikefa shehangano laJehova monhele yasho, medimo lomeni elela leumbo, mOuyapuki elela, sha uvikwa komavava ovakerubi.+
8 Omavava ovakerubi okwa li a xwaanana kombada yOshikefa, onghee ovakerubi ova li va uvika Oshikefa nosho yo eepala dasho,+ okudja pombada.
9 Eepala odo oda li dile, neexulo dado oda li tadi dulu okumonika komunhu e li mOuyapuki, popepi nedimo lomeni elela, ashike kada li tadi dulu okumonika komunhu e li pondje. Omo di li omo fiyo okunena eli.
10 MOshikefa omo kamwa li sha, kakele koipelende ivali, oyo Moses a tula mo puHoreb,+ eshi Jehova a li a ninga ehangano+ noshiwana shOvaisrael pefimbo opo sha li tashi di muEgipiti.+
11 Eshi ovapristeri va dja mo monhele iyapuki (molwaashi ovapristeri aveshe ovo va li po, ova li ve liyapula,+ kashi na nee mbudi kutya ova dja mongudu ilipi),+
12 ovaimbi aveshe Ovalevi,+ ovo va li tava wilikwa kuAsaf,+ kuHeman,+ kuJedutun,+ kovanamati nokovamwaina, ova li va djala oikutu yoliina iwa, ve kwete omayaxa, oishikomwa yeengodi nouxumbafeta; ova li va fikama koushilo woaltari, pamwe novapristeri 120, ovo va li tava shiki omanghuma.+
13 Pefimbo opo, eshi ovashiki vomanghuma novaimbi va li tava tange nokupandula Jehova ve li moukumwe, naashi omawi a li taa di momanghuma, momayaxa nomoishikomwa ikwao, eshi va li tava tange Jehova tava ti, “osheshi ye omuwa, ohole yaye i na oudiinini otai kala po fiyo alushe,”+ opo nee eumbo, eumbo laJehova, ola li la uvikwa koshilemo.+
14 Ovapristeri kava li tava dulu okufikama va yakule omolwoshilemo osho, molwaashi eumbo laKalunga kashili ola li la yadifwa oshinge shaJehova.+
