Omafimbo omativali 2:1-18
-
Omalongekido e na sha nokutunga otembeli (1-18)
2 Salomo okwa li a yandja elombwelo li na sha nokutungila eumbo lokufimanekifila edina laJehova+ nosho yo eumbo* louhamba waye.+
2 Salomo okwa kuta ovanailonga voilonga yokomake* ovalumenhu 70 000, ovateti vomamanya ovalumenhu 80 000, ovo va li keemhunda+ nosho yo ovo tave va pashukile 3 600.+
3 Natango, Salomo okwa tumina Hiram,+ ohamba yaTirus, etumwalaka a ti: “Ningile nge ngaashi wa ningila tate, David, eshi we mu tumina omiti domisederi, a tunge eumbo* a kale mo.+
4 Paife ohandi tungu eumbo lokufimanekela edina laJehova, Kalunga kange, ndi li mu yapulile, ndi xwikile mo oitwiminifo yedimba liwa+ koshipala shaye, nomu kale yo alushe omingome dokutalika+ nomaxwikiloyambo ongula nokonguloshi,+ mOmashabata,+ peemwedi dipe+ nopoivilo iyapuki+ yaJehova, Kalunga ketu. Eshi oshinakuwanifwa shOvaisrael tashi kalelele.
5 Eumbo, olo handi ka tunga, otali ka kala linene, molwaashi Kalunga ketu omunene e dule ookalunga aveshe.
6 Olyelye ta dulu oku mu tungila eumbo? Ngeenge eulu, olo li li pombadambada, itali mu wanene,+ aame lyelye, opo ndi dule oku mu tungila eumbo? Ohandi dulu ashike okutunga onhele yokuxwikila omayambo koshipala shaye.
7 Paife tumine nge omuhambwidi, oo e na owino mokulonga noshingoli, oshisilveri, ongopolo,+ oshivela shilaula, olududi leedi lipeepela, eengodi ditilyana nodimbulau, naao e shii okuteta omamanya okufeweka. Ota ka longela muJuda nomuJerusalem, pamwe novahambwidi vange, ovo ve na owino, ovo tate, David, a yandja.+
8 Tumine nge omiti domisederi, domidjenipa+ nodomi-algum,+ da dja kuLibanon, molwaashi ondi shi shii nawa kutya, ovapiya voye ove na owino mokuteta omiti dokuLibanon.+ Ovapiya vange otava ka longa pamwe novapiya voye,+
9 opo va longekidile nge omiti dihapu, molwaashi eumbo, olo handi ka tunga, otali ka kala linenenene noliwa neenghono.
10 Tala! Ohandi ka yandja oikulya kovapiya voye,+ kovateti voiti, ovo tava tete omiti: eekori* doilya yo-wheat 20 000, eekori doilya yo-barley 20 000, eebata* domaviinyu 20 000 neebata domaadi 20 000.”
11 Opo nee Hiram, ohamba yaTirus, oya tumina Salomo etumwalaka la shangwa tali ti: “Molwaashi Jehova oku hole oshiwana shaye, okwe ku ninga ohamba yasho.”
12 Hiram okwa ti: “Jehova, Kalunga kaIsrael, na tangwe, oo a shita eulu nedu, molwaashi okwa pa ohamba David omonamati omunaendunge,+ e mu pa eendunge neudeko,+ oo ta ka tunga eumbo laJehova neumbo louhamba waye.
13 Paife ohandi tumu omuhambwidi e na owino, e na eudeko, Hiram-abi,+
14 omonamati womukainhu Omudan, ndele xe okwa li omulumenhu womuTirus; oku na owino wokulonga noshingoli, oshisilveri, ongopolo, oshivela shilaula, omamanya, oiti, olududi leedi lipeepela, eengodi dimbulau, oliina iwa neengodi ditilyana.+ Oha dulu okuteta nokufeweka omamanya noitenda yoludi keshe, nokuninga omutungilo keshe ta pewa.+ Ota ka longa pamwe novahambwidi voye, ovo ve na owino, nosho yo ovahambwidi vaxo, David, omwene wange, ovo ve na owino.
15 Paife, omwene wange na tume oilya yo-wheat, yo-barley, omaadi nomaviinyu, oyo a udanekela ovapiya vaye.+
16 Ohatu ka teta omiti dihapu kuLibanon,+ di fike pwaado wa pumbwa nohatu ke di mangela kumwe di kaame mefuta fiyo okuJoppa,+ opo nee oto ke di twala kuJerusalem.”+
17 Opo nee Salomo okwa valula ovalumenhu aveshe, ovo va li ovanailongo medu lOvaisrael,+ ngaashi ashike xe, David, a li a ninga,+ nopa li ovalumenhu 153 600.
18 Onghee Salomo okwa kuta ovanailonga voilonga yokomake* 70 000, ovateti vomamanya 80 000,+ ovo va li keemhunda, nosho yo ovapashukili 3 600, ovo tava pashukile ovanailonga.+
Omashangelo opedu
^ Ile “ombala.”
^ Ile “ovahumbati vomitengi.”
^ Ile “ombala.”
^ Okori imwe oi fike peelita 220. Tala Oshiw. B14.
^ Obata imwe oi fike peelita 22. Tala Oshiw. B14.
^ Ile “ovahumbati vomitengi.”
