Eehamba eenhivali 24:1-20
24 Pefimbo laJehoiakim, Nebukadnesar,+ ohamba yaBabilon, okwe uya oku mu lwifa, na Jehoiakim okwa ninga omupiya waye oule weedula nhatu. Ashike okwe mu pilukila po noku mu tukululila oshibofa.
2 Opo nee Jehova okwa hovela oku mu tumina ongudu yovakwaita Ovakaldea,+ Ovaassiria, Ovamoab nOvaammoni. Okwa twikila oku va tuma va lwife Juda nove shi hanaune po, she likolelela kondjovo yaJehova+ oyo a popya okupitila movapiya vaye ovaprofeti.
3 Oshoshili kutya Jehova oye a yandja elombwelo, opo osho shi ningilwe Juda, e va hanaune po koshipala shaye+ omolwomanyono aeshe oo Manasse a ninga.+
4 Okwa dipaa yo ovanhu vehe na etimba,+ nokwa tilashi ohonde ihapu muJerusalem, na Jehova ka li a hala okudimina po Juda.+
5 Ondjokonona aishe yaJehoiakim, ashishe osho a ninga, mbela inai shangwa membo londjokonona yopefimbo leehamba daJuda?+
6 Opo nee Jehoiakim okwa nangekwa pooxekulululwa;+ omonamati waye, Jehoiakin, okwa ninga ohamba ponhele yaye.
7 Okudja opo, ohamba yaEgipiti inai tuma vali ovakwaita vayo va dje mo moshilongo, molwaashi ohamba yaBabilon oya kufa po oinima aishe yohamba yaEgipiti,+ okudja kEfilu* laEgipiti+ fiyo okOmulonga waEufrat.+
8 Jehoiakin+ okwa ninga ohamba, eshi a li e na eedula 18, nokwa pangela muJerusalem oule weemwedi nhatu.+ Edina laina oNehusta, omonakadona waElnatan, wokuJerusalem.
9 Okwa twikila okulonga osho shii momesho aJehova, metwokumwe naashishe osho xe a li a ninga.
10 Pefimbo opo, ovapiya vaNebukadnesar, ohamba yaBabilon, ova li ve uya okulwifa Jerusalem, noshilando osha li sha kondekwa.+
11 Nebukadnesar, ohamba yaBabilon, oye uya koshilando, ofimbo ovapiya vaye va li ve shi kondeka.
12 Jehoiakin, ohamba yaJuda, okwa ka shakeneka ohamba yaBabilon,+ e li pamwe naina, ovapiya vaye, omalenga aye nomalenga aye omombala.+ Ohamba yaBabilon oye mu twala moukwatwa momudo omutihetatu wepangelo laye.+
13 Opo nee okwa kufa mo omamona aeshe meumbo laJehova nomamona omeumbo* lohamba.+ Okwa teta moipambu oikwatelwa aishe yoshingoli oyo Salomo, ohamba yaIsrael, a ninga motembeli yaJehova.+ Osho osha ningwa, ngaashi ashike Jehova a li a xunganeka.
14 Okwa twala moukwatwa ovanhu vomuJerusalem aveshe, omalenga aeshe,+ ovakwaita ovanaenghono aveshe, ovahambwidi novahambuli voivela* aveshe.+ Okwa twala moukwatwa ovanhu 10 000. Ina fiya po nande oumwe, kakele ashike kaavo va hepa neenghono moshilongo.+
15 Onghee okwa twala Jehoiakin+ moukwatwa kuBabilon;+ okwa kufa po yo ina yohamba, omukulukadi wohamba nomalenga aye omombala nosho yo ovanenenhu vomoshilongo, e va kufa muJerusalem, ndele te va twala moukwatwa muBabilon.
16 Ohamba yaBabilon oya twala yo moukwatwa ovakwaita aveshe 7 000, ovahambwidi novahambuli voivela* 1 000, ovalumenhu ovanaenghono aveshe nova deulilwa oita.
17 Ohamba yaBabilon oya ninga Mattania, omumwaina waxe yaJehoiakin,+ ohamba ponhele yaye, ndele te mu lukulula a ninge Sedekia.+
18 Sedekia okwa ninga ohamba, eshi a li e na eedula 21, nokwa pangela muJerusalem oule weedula 11. Edina laina oHamutal,+ omonakadona waJeremia, a dja kuLibna.
19 Okwa twikila okulonga osho shii momesho aJehova, she likolelela kwaashishe osho Jehoiakim a ninga.+
20 Omolwehandu laJehova, eshi oinima oyo ya ningwa muJerusalem nomuJuda, fiyo osheshi e i hanauna po koshipala shaye.+ Na Sedekia okwa tukululila ohamba yaBabilon oshibofa.+
Omashangelo opedu
^ Tala Omafatululo oitya.
^ Ile “omombala.”
^ Ile tashi dulika, “ovatungi vekuma leameno.”
^ Ile tashi dulika, “ovatungi vekuma leameno.”
