Eehamba eenhivali 20:1-21
20 Pefimbo olo, Hiskia okwa li ta ehama nokwa li e li pokufya.+ Omuprofeti Jesaja, omonamati waAmos, okwe uya, ndele ta ti kuye, “Jehova ota ti ngaha: ‘Yandja omalombwelo koukwaneumbo woye, molwaashi oto ka fya; ito ka veluka.’”+
2 Opo nee Hiskia okwa taalela mekuma, ndele ta hovele okwiilikana kuJehova ta ti:
3 “Akutu, Jehova, ohandi ku indile, alikana, dimbuluka nghee nde ku longela noudiinini, nomutima aushe nanghee nda longa osho shiwa momesho oye.”+ Na Hiskia okwa hovela okulila neenghono.
4 Jesaja ina hangwa a fika natango pokati komukala, eshi ondjovo yaJehova ye uya kuye tai ti:+
5 “Shuna, ndele to lombwele Hiskia, omuwiliki woshiwana shange, kutya, ‘Eshi osho Jehova, Kalunga kaDavid, xokulululwa, ta ti: “Onda uda eindilo loye. Onda mona omahodi oye.+ Paife ohandi ku velula.+ Mefiku etitatu, oto ka ya keumbo laJehova.+
6 Ohandi ku wedele ko eedula 15 kokukalamwenyo* kwoye, nohandi ku xupifa nosho yo oshilando eshi momake ohamba yaAssiria,+ ohandi ka lwila oshilando eshi omolwedina lange nomolwomupiya wange, David.”’”+
7 Opo nee Jesaja okwa tya: “Etelei nge oshikuki sheenghwiyu da kukutikwa.” Onghee ove shi eta, ndele tave shi vaeke poshitumba, nomokweendela ko kwefimbo, okwa ka veluka.+
8 Hiskia okwa pula Jesaja a ti: “Edidiliko lilipi+ tali ka ulika kutya Jehova ota ka velula nge, nonokutya mefiku etitatu ohandi ka ya keumbo laJehova?”
9 Jesaja okwa nyamukula a ti: “Eli olo edidiliko la dja kuJehova, olo tali ku ulikile kutya Jehova ota ka wanifa po ondjovo oyo a popya: Owa hala omudidimbe, oo u li keetalapa,* u ende wa yuka komesho omanha omulongo, ile ou shune monima omanha omulongo?”+
10 Hiskia okwa tya: “Oshipu komudidimbe okuyuka komesho omanha omulongo, ndele itau dulu okushuna monima omanha omulongo.”
11 Onghee omuprofeti Jesaja okwa pula ekwafo kuJehova, oo a ningifa omudidimbe, oo u li keetalapa daAhas, u shune monima omanha omulongo, konima eshi wa hangwa nale wa pitilila po pomanha oo.+
12 Pefimbo olo, ohamba yaBabilon, Berodak-baladan, omonamati waBaladan, oya tumina Hiskia eenhumwafo nosho yo oshali, molwaashi oya uda kutya Hiskia okwa li ta ehama.+
13 Hiskia okwe va tambula ko,* ndele te va ulikile eemhungulilo adishe domeumbo laye,+ oshisilveri, oshingoli, omaadi o-balsam nomaadi akwao ondilo, ponhele opo hapa kala oilwifo yaye, nakeshe shimwe osho shi li meemhungulilo daye. Kape na nande oshinima shimwe osho Hiskia ine va ulikila meumbo* laye nosho yo mouhamba waye aushe.
14 Konima yaasho, omuprofeti Jesaja okwe uya kohamba Hiskia, ndele te i pula ta ti: “Ovalumenhu ava ova popya shike, nova dja peni?” Opo nee Hiskia okwa ti: “Ova dja kedu lokokule, kuBabilon.”+
15 Okwa pula vali a ti: “Ova mona mo shike meumbo* loye?” Hiskia okwa nyamukula a ti: “Ova mona oinima aishe oyo i li meumbo* lange. Kape na nande oshinima shimwe inandi va ulikila meemhungulilo dange.”
16 Opo nee Jesaja okwa lombwela Hiskia ta ti: “Uda ondjovo yaJehova.+
17 ‘Tala! Omafiku otae uya, noinima aishe oyo i li meumbo* loye nosho yo oinima aishe oyo ooxokulululwa va tuvikila fiyo okunena, otai ka twalwa kuBabilon.+ Kape na nande oshimwe tashi ka fiwa po,’ Jehova osho ta ti.
18 ‘Navamwe vomovanamati voye, ovo to ka dala, otava ka kufwa po,+ notava ka ninga omalenga omombala, mombala yohamba yaBabilon.’”+
19 Opo nee Hiskia okwa lombwela Jesaja a ti: “Ondjovo yaJehova oyo a popya oiwa.”+ Okwa weda ko a ti: “Oshiwa ngeenge otapa ka kala ombili nonghalonawa* pefimbo* lokukalamwenyo kwange.”+
20 Ondjokonona aishe yaHiskia, eenghono daye adishe, nghee a xupa etale+ nosho yo omukangha nanghee a eta omeva moshilando,+ mbela inai shangwa membo londjokonona yopefimbo leehamba daJuda?
21 Opo nee Hiskia okwa nangekwa pooxekulululwa;+ nomonamati waye, Manasse,+ okwa ninga ohamba ponhele yaye.+
