Eehamba eenhivali 22:1-20
22 Josia+ okwa ninga ohamba, eshi a li e na eedula hetatu, nokwa pangela muJerusalem oule weedula 31.+ Edina laina oJedida, omonakadona waAdaja, a dja kuBoskat.+
2 Okwa longa osho sha yuka momesho aJehova nokwa enda meendjila adishe daxekulululwa, David,+ noina yapuka mo a ye kolulyo, ile kolumosho.
3 Momudo omuti-18 wepangelo lohamba Josia, ohamba Josia oya tuma hamushanga Safan, omonamati waAsalia, omonamati waMesullam, keumbo laJehova+ tai ti:
4 “Inda kuHilkia,+ omupristeri munene, noku mu lombwela a ongele oimaliwa aishe, oyo ya etwa keumbo laJehova,+ oyo ovapashukili vopoivelo va ongela okudja kovanhu.+
5 Nave i yandje kwaavo va nangekwa po va pashukile oilonga yomeumbo laJehova, ovo tave ke i yandja kovalongi vomeumbo laJehova, ovo ve na okuwapekulula eumbo opo pa nyonauka,*+
6 sha hala okutya, kovahambwidi, kovatungi nokwaavo ve na ounghulungu mokuteta; ove na oku i longifa okulanda oiti nosho yo omamanya a hongwa, opo va wapekulule eumbo.+
7 Ashike itava ka pulwa vali shi na sha noimaliwa oyo va pewa, molwaashi ove li ovalineekelwa.”+
8 Lwanima, Hilkia, omupristeri munene, okwa lombwela hamushanga Safan+ a ti: “Onda hanga embo lOmhango+ meumbo laJehova.” Onghee Hilkia okwa yandja embo olo kuSafan, oo a hovela oku li lesha.+
9 Opo nee hamushanga Safan okwa ya kohamba, ndele te i lombwele ta ti: “Ovapiya voye ova kufa mo oimaliwa, oyo va hanga meumbo, nove i yandja kwaavo va nangekwa po va pashukile oilonga meumbo laJehova.”+
10 Hamushanga Safan okwa lombwela yo ohamba a ti: “Ope na embo+ olo nda pewa komupristeri Hilkia.” Opo nee Safan okwa hovela oku li leshela ohamba.
11 Diva eshi ohamba ya uda eendjovo domembo lOmhango, oya pombaula oikutu yayo.+
12 Opo nee ohamba oya yandja elombwelo komupristeri Hilkia, kuAhikam,+ omonamati waSafan, kuAkbor, omonamati waMikaia, kuhamushanga Safan nokuAsaia, omupiya wohamba, ya ti:
13 “Indeni, ka puleni kuJehova ponhele yange, ponhele yovanhu noponhele yaJuda ashishe shi na sha neendjovo odo di li membo olo la monika; molwaashi ehandu laJehova olo le tu xwamena olinene,+ osheshi ootatekulululwa inava dulika keendjovo, odo di li membo olo mokudiinina oinima aishe oyo ya shangwa i na sha nafye.”
14 Onghee omupristeri Hilkia, Ahikam, Akbor, Safan naAsaia ova ya kuHulda, omuprofeti omukainhu.+ Hulda okwa li omukulukadi waSallum, omonamati waTikva, omonamati waHarhas, omupashukili woikutu, nokwa li ha di moshitukulwa oshitivali shaJerusalem; oko va popila naye oko.+
15 Omuprofeti Hulda okwe va lombwela a ti: “Jehova, Kalunga kaIsrael, ota ti ngaha, ‘Lombweleni omulumenhu oo e mu tuma kwaame tamu ti:
16 “Eshi osho Jehova ta ti, ‘Ohandi ka etela onhele ei nokovakalimo vamo oudjuu, eendjovo adishe odo di li membo olo ohamba yaJuda ya lesha.+
17 Molwaashi ova efa nge po notava twimine ookalunga+ vamwe omatwiminoyambo, opo va handukife nge noilonga aishe yomake avo,+ ehandu lange otali ka xwamena onhele ei noitali ka lotekwa.’”+
18 Ndele ohamba yaJuda, oyo ye mu tuma mu pule kuJehova, omu na oku i lombwela ngaha, “Eshi osho Jehova, Kalunga kaIsrael ta ti: ‘Shi na sha neendjovo odo wa uda,
19 molwaashi owa pupaleka omutima woye, we lininipika+ koshipala shaJehova, eshi wa uda osho nda popya shi na sha nonhele ei nosho yo ovakalimo vamo, kutya otava ka kala va tilifa nova fingwa, nowa pombaula oikutu yoye+ nokulila koshipala shange, naame onde ku uda yo, Jehova osho ta ti.
20 Nomolwaasho ohandi ke ku paka pooxokulululwa,* noto ka nangekwa mombila yoye nombili, nomesho oye itaa ka mona oudjuu aushe, oo tau ka hanga onhele ei.’”’” Opo nee ova twala enyamukulo kohamba.
