1. Omaupyakadi elipi tashi dulika ovapiya vaJehova va shakeneke?

MBELA oto kondjo neyeleko la kwata moiti? Otashi dulika vamwe meongalo ve ku udife nai. (Jak. 3:2) Ile tashi dulika ovanailonga ile ovanafikola vakweni ve ku sheke eshi to longele Jehova. (1 Pet. 4:3, 4) Ile tashi dulika oilyo youkwaneumbo weni tai kendabala oku ku kelela uha ye kokwoongala ile uha popye navamwe kombinga yeitavelo loye. (Mat. 10:35, 36) Ngeenge eyeleko ola kwata moiti otashi dulika li ku shololife uha longele Jehova. Ashike oto dulu okukala nelineekelo kutya kashi na nee mbudi kutya owa taalela eshongo lilipi, Jehova ote ke ku pa ounongo nosho yo eenghono opo u dule okuungaunga nalo nou dule oku li lididimikila.

2. Metwokumwe nOvaroma 15:4, Eendjovo daKalunga otadi ke tu kuma ngahelipi ngeenge otwa kala hatu di lesha?

² Jehova okwa shangifa oihopaenenwa yoohandimwe mEendjovo daye, oyo tai ulike kutya ovanhu inava wanenena otava dulu okulididimikila omayeleko. Omolwashike mbela? Opo tu lihonge kuyo. Nomolwaasho Jehova a nwefwa mo omuyapostoli Paulus a shange kombinga yaasho. (Lesha Ovaroma 15:4.) Omahokololo oo otae ke tu hekeleka noku tu pa eteelelo ngeenge otwa kala hatu a lesha. Ndele opo tu mone mo ouwa otwa pumbwa okuninga shihapu shihe fi ashike okulesha Ombiibeli. Otwa pumbwa okweefa Omishangwa di vyule omadiladilo etu nokuhanga omitima detu. Oshike tu na okuninga po ngeenge hatu kongo ewiliko olo tali dulu oku tu kwafela tu ungaunge neshongo lonhumba lokondadalunde? Ohatu dulu okuninga oinima ine tai landula: (1) Ilikana, (2) Faneka momadiladilo, (3) Dilonga nosho yo (4) Tula moilonga. Paife natu ka kundafaneni osho sha kwatelwa mo moshinima keshe. * Opo nee ohatu ka kundafana oinima oyo eshi hatu ka konakona oiningwanima yomonghalamwenyo yohamba David noyomuyapostoli Paulus.

3. Fimbo ino hovela okulesha Ombiibeli, oshike wa pumbwa okuninga, nomolwashike?

 ³ (1) Ilikana. Fimbo ino hovela okulesha Ombiibeli, pula ekwafo kuJehova e ku kwafele opo u dule okumona ouwa mwaasho to lesha. Pashihopaenenwa, ngeenge oto kongo omayele oo taa dulu oku ku kwafela moupyakadi wonhumba, pula Jehova e ku kwafele opo u mone omafinamhango mEendjovo daye, oo tae ku wilike. — Fil. 4:6, 7; Jak. 1:5.

4. Oshike tashi dulu oku ku kwafela opo ehokololo lopaMbiibeli li kale tali ti sha neenghono kwoove?

⁴ (2) Faneka momadiladilo. Jehova okwe tu shita hatu dulu okufaneka oinima momadiladilo etu. Opo ehokololo lopaMbiibeli li kale tali ti sha kwoove, kendabala okufaneka oinima momadiladilo nokulitula pondodo yaao to lesha kombinga yaye. Kendabala okukala u wete oinima oyo ya li i wetike komunhu oo to lesha kombinga yaye nokuulika omaliudo a fa aye.

5. Okudilonga oshike, nongahelipi to dulu oku shi ninga?

⁵ (3) Dilonga. Okudilonga osha hala kutya okudiladila noukeka kombinga yaasho to lesha noku shi tula moilonga. Ohaku ku kwafele u kwatakanife omadiladilo nou mone eudeko lomoule li na sha noshikundafanwa osho. Ngeenge oto lesha Ombiibeli, ndele ito dilonga, osha fa ashike omunhu wonhumba ta tale outukulwa vonhumba ovo va pumbwa okutulwa kumwe opo va ete po efano lonhumba, ashike ite va tula kumwe. Okudilonga osha fa to tula kumwe outukulwa ovo opo u mone efano le lixwa po. Opo u dule okudilonga, oto dulu okulipula nokunyamukula omapulo taa shikula: ‘Oshike osho omunhu oo a popiwa mehokololo eli a ninga po opo a kandule po oupyakadi? Jehova okwe mu kwafela ngahelipi? Ongahelipi handi dulu okulongifa oilihongomwa oyo nde lihonga opo ndi lididimikile omayeleko?’

6. Omolwashike tu na okutula moilonga osho twe lihonga?

⁶ (4) Tula moilonga. Jesus okwa popya kutya ngeenge ihatu tula moilonga osho twe lihonga otwa fa ashike omulumenhu oo a tungila eumbo laye mehenge. Okwa longa noudiinini, ndele okwa hepifa eenghono daye. Omolwashike mbela? Omolwaashi ngeenge okwa di oshikungulu ile efundja, eumbo laye otali ka teka po. (Mat. 7:24-27) Sha faafana, ngeenge otwa kala hatu ilikana, hatu faneke oinima momadiladilo nokudilonga, ndele ihatu tula moilonga osho twe lihonga, ohatu ka hepifa eenghendabala detu. Ngeenge otwa hangwa komaudjuu ile komahepeko, eitavelo letu otali ka nghundipala. Mepingafano naasho, ngeenge otwa konakona nokutula moilonga osho twe lihonga, ohatu ka ninga omatokolo e li mondjila, hatu ka kala tu na ombili, neitavelo letu otali ka kala la kola. (Jes. 48:17, 18) Tu na momadiladilo eenghedi odo dopane, natu ka taleni osho hatu lihongo moshiningwanima shomonghalamwenyo yohamba David.

7. Ehokololo lopaMbiibeli lilipi hatu ka kundafana paife?

⁷ Mbela owa li wa kengelelwa kukaume koye ile komupambele oo we lineekela? Ngeenge osho, oto ka mona ouwa eshi hatu ka kundafana ehokololo lomonamati wohamba David, Absalom, oo a li a kengelela xe nokwa li ta kendabala oku mu nyeka ouhamba. — 2 Sam. 15:5-14, 31; 18:6-14.

8. Oshike wa pumbwa okuninga opo Jehova e ku kwafele?

⁸ (1) Ilikana. U na ehokololo olo momadiladilo, lombwela Jehova nghee u udite eshi wa ungaungiwa naave nai. (Eps. 6:6-9) Popya kondadalunde. Opo nee pula Jehova e ku kwafele u mone omafinamhango oo tae ku wilike eshi to kendabala okuungaunga neshongo olo lidjuu.

9. Ongahelipi to dulu okungonga oiningwanima oyo ya ningwa kuDavid naAbsalom?

⁹ (2) Faneka momadiladilo. Diladila kombinga yoiningwanima oyo i li mehokololo olo, ndele to diladila nghee ya li ya kuma ohamba David.  Absalom, omonamati waDavid, okwa li a longa noudiinini omido dihapu opo a ningife ovanhu va kale ve mu hole. (2 Sam. 15:7) Eshi Absalom a mona kutya paife efimbo liwa, okwa li a tuma eendadi muIsrael ashishe, opo ndi longekide ovanhu ve mu tambule ko e li omupangeli. Okwa li yo a tomha ookaume kaDavid kopofingo nosho yo ovayandjimayele vaye, ngaashi Ahitofel, ve mu waimine mounashibofa waye. Absalom okwe lininga ohamba ye mwene. Okwa li yo a kendabala a kwate po David noku mu dipaa, oo tashi dulika a li ta vele neenghono pefimbo opo. (Eps. 41:1-9) David okwa li a didilika omhangela oyo nokwa li a ya onhapo, a dja mo muJerusalem. Mokweendela ko kwefimbo, etangakwaita laAbsalom ola li la lwifa etangakwaita laDavid. Etangakwaita enashibofa ola li la findwa, nomonamati waDavid, Absalom, okwa dipawa.

10. Mbela ohamba David oya li ye linyenga ngahelipi?

¹⁰ Diladila nghee David a li e udite eshi a ningilwa oinima aishe oyo. Okwa li e hole Absalom nokwa li e lineekela Ahitofel. Ashike ookaume kaye vopofingo ova li ve mu kengelela. Ova li ve mu udifa nai neenghono, nova li va kendabala oku mu dipaa. David okwa li ta dulu okukala ine lineekela ookaume kaye vakwao, ta diladila kutya navo ova waimina Absalom. Okwa li ta dulu okukala a wililwa po komadiladilo, ndele ta fiye po oshilongo oye aeke. Ile okwa li ta dulu okuteka omukumo. Ashike David ka li a ninga nandenande ngaho. Ponhele yaasho, okwa li a finda eshongo olo la li lidjuu. Omolwashike a li a dula okuninga ngaho?

11. David okwa li e linyenga ngahelipi konghalo oyo ya li idjuu?

¹¹ (3) Dilonga. Omafinamhango elipi to dulu okulihonga kehokololo olo? Nyamukula epulo eli, “Oshike David a li a ninga po opo e likwafele ye mwene?” David ka li a mbadapala noina ninga omatokolo omeendelelo ile ehe li pandunge. Ka li a ongaonga. Ponhele yaasho, okwa li a konga ekwafo kuJehova okupitila meilikano. Okwa li a pula ookaume kaye ve mu kwafele. Okwa li yo a tula diva moilonga omatokolo oo a ninga. Nonande okwa li a uda nai neenghono, ka li a efa po okulineekela vamwe noka li a tetwa ko kehandu. Okwa li a twikila okulineekela muJehova nosho yo mookaume kaye.

12. Jehova okwa li a ninga po shike opo a kwafele David?

¹² Oshike Jehova a li a ninga po opo a kwafele David? Ngeenge owa ningi omapekapeko, oto ka mona kutya Jehova okwa li a pa David eenghono odo a li a pumbwa opo e lididimikile eyeleko olo. (Eps. 3:1-8) Jehova okwa li a nangeka noupuna omatokolo aDavid. Okwa li yo a yambidida ookaume kaDavid ovadiinini eshi va kala noku mu amena e li ohamba yavo.

13. Ongahelipi to dulu okuhopaenena David ngeenge omunhu wonhumba okwe ku udifa nai monghedi yonhumba ile yongadi? (Mateus 18:15-17)

¹³ (4) Tula moilonga. Lipula kutya, ‘Ongahelipi handi dulu okuhopaenena David?’ Owa pumbwa okukatuka meendelelo opo u kandule po oupyakadi. Oto dulu okutula moilonga omayele aJesus oo taa hangwa muMateus etukulwa 18, tashi dulika odikilila ile efinamhango she likolele keenghalo. (Lesha Mateus 18:15-17.) Ashike, henuka okuninga omatokolo meendelelo to linyengifwa komaliudo. Ilikana kuJehova e ku pe omutima wa ngungumana noku ku pa ounongo opo u dule okuungaunga nonghalo oyo. Twikila okulineekela ookaume koye. Kala wa halelela okutambula ko ekwafo olo tave ku pe. (Omayel. 17:17) Osho sha fimanenena, tambula ko omayele aJehova, oo taa hangwa mEendjovo daye. — Omayel. 3:5, 6.

14. Eenghalo dilipi tashi dulika di ku ningife u yandje elitulemo ku 2 Timoteus 1:12-16; 4:6-11, 17-22?

¹⁴ Mbela oto ungaunga nomafininiko okudja kovapambele? Ile ou li moshilongo omo ovapiya vaJehova va tulilwa po eendjidikila da kwata moiti ile omo oilonga yetu ya shilikwa? Ngeenge osho, oto dulu okumona etwomukumo  mokulesha 2 Timoteus 1:12-16 nosho yo 4:6-11, 17-22. * Paulus okwa shanga eevelishe odo eshi a li modolongo.

15. Oshike to dulu okupula Jehova?

¹⁵ (1) Ilikana. Fimbo ino lesha eevelishe donhumba, lombwela Jehova kombinga youpyakadi woye, nanghee u udite. Popya kondadalunde. Opo nee pula Jehova e ku kwafele u mone omafinamhango oo e li mehokololo li na sha naPaulus, opo e ku kwafele u mone nghee u na okuungaunga neshongo olo wa taalela.

16. Ongahelipi to dulu okungonga onghalo yaPaulus?

¹⁶ (2) Faneka momadiladilo. Lifaneka nee ngeno u li monghalo yaPaulus. Okwa li e li momalyenge modolongo muRoma. Nonande modolongo okwa endele mo nale, oshikando osho okwa li e shii kutya ota ka dipawa. Vamwe ovo va li hava endafana naye ova li ve mu fiya po nokwa li a loloka palutu. — 2 Tim. 1:15.

17. Paulus okwa li e linyenga ngahelipi?

¹⁷ Paulus okwa li ta dulu okudiladila konakudiwa, ta tomhafana kutya ngeno okwa ningile omatokolo e lili, ngeno otashi dulika ina mangwa po. Okwa li ta dulu okukala a handukila ovalumenhu vomoshitukulwa shaAsia, ovo va li ve mu fiya po. Okwa li ta dulu yo okukala ine lineekela ookaume kaye vakwao. Ashike Paulus ka li a ninga ngaho. Omolwashike a li e na elineekelo kutya ookaume kaye ovadiinini, nonokutya Jehova ote ke mu pa ondjabi?

18. Paulus okwa li e linyenga ngahelipi keshongo olo a li a taalela?

¹⁸ (3) Dilonga. Nyamukula epulo eli, “Paulus okwa li e likwafela ngahelipi ye mwene?” Nonande Paulus okwa li a tila okudipawa, ka li a efa po oshinima sha fimanenena, okutumbalekifa Jehova. Okwa li a twikila okudiladila nghee ta dulu okutwa omukumo vamwe. Okwa li e lineekela muJehova mokukala ha ilikana pandjikilile. (2 Tim. 1:3) Ponhele yokukala ta diladila unene kwaavo ve mu fiya po, okwa li a ulika olupandu linene omolwekwafo olo a li a ulikilwa kookaume kaye ovadiinini meenghedi tadi longo. Kakele kaasho, Paulus okwa li a twikila okukonakona Eendjovo daKalunga. (2 Tim. 3:16, 17; 4:13) Naasho sha fimanenena, okwa li a tomhwa kutya Jehova naJesus ove mu hole. Kava li ve mu fiya po nokwa li tave ke mu pa ondjabi omolwoilonga yaye youdiinini.

19. Jehova okwa li a kwafela ngahelipi Paulus?

¹⁹ Jehova okwa li a lombwela Paulus kutya oku na okulididimikila omayeleko molwaashi e li Omukriste. (Oil. 21:11-13) Jehova okwa li a kwafela ngahelipi Paulus? Okwa li a nyamukula omailikano aPaulus eshi e mu pa eenghono. (2 Tim. 4:17) Osho osha li sha shilipaleka Paulus kutya ota ka pewa ondjabi oyo e lilongela. Jehova okwa li yo e linyengifa ookaume kaPaulus ovadiinini opo ve mu pe ekwafo tali longo.

20. Tu na momadiladilo Ovaroma 8:38, 39, ongahelipi hatu dulu okuhopaenena Paulus?

²⁰ (4) Tula moilonga. Lipula kutya, ‘Ongahelipi handi dulu okuhopaenena Paulus?’ Ngaashi Paulus, nafye otwa teelela tu ka hepekwe omolweitavelo letu. (Mark. 10:29, 30) Opo tu kale ovadiinini ngeenge hatu yelekwa, otwa pumbwa okukala hatu ilikana kuJehova nokukala tu na onghedindjikilile yokukonakona. Otu na okudimbuluka kutya oshinima shimwe osho sha fimanenena hatu dulu okuninga okufimanekifa Jehova. Ohatu dulu okukala noushili kutya Jehova ke na efiku e tu fiye po nokape na oshinima shonhumba ile omunhu ta dulu okwiimba Jehova aha kale e tu hole. — Lesha Ovaroma 8:38, 39; Heb. 13:5, 6.

21. Oshike sha kwafela Aya naHector va finde omashongo oo va li va taalela?

²¹ Oihopaenenwa yopaMbiibeli otai dulu oku tu kwafela tu mone eenghono odo twa pumbwa opo tu dule okulididimikila onghalo keshe. Pashihopaenenwa,  Aya, omukokolindjila wokoJapan, okwa popya kutya ehokololo laJona ole mu kwafela a finde oumbada wokuudifila meenhele daaveshe. Hector, omunyasha wokoIndonesia, oo ovadali vaye ihava longele Jehova, okwe linyengifwa koshihopaenenwa shaRut e lihonge kombinga yaJehova noku mu longela.

22. Ongahelipi to dulu okumona ouwa moinyandwa yopaMbiibeli ile moitukulwa ya pambafana i na oshipalanyole “Natu hopaeneneni eitavelo lavo”?

²² Openi hatu dulu okuhanga oihopaenenwa yopaMbiibeli oyo tai dulu oku tu pameka? Ouvidio vetu, oinyandwa yokupwilikinwa nosho yo oitukulwa ya pambafana “Natu hopaeneneni eitavelo lavo” oya mwenyopaleka omahokololo opaMbiibeli. * Ofimbo ino tala, ino pwilikina ile ino lesha ehokololo lonhumba, pula Jehova e ku kwafele u mone oitwa yokondadalunde oyo to dulu okutula moilonga. Litula pondodo yaao ta dana onghandangala mehokololo olo. Dilonga kwaasho sha ningwa kovapiya vaJehova ovadiinini, nanghee e va kwafela va finde omaudjuu. Opo nee to tula moilonga oilihongomwa oyo monghalo omo u li. Pandula Jehova omolwekwafo olo e ku pa nale. Ulika kutya owa pandula mokukonga eemhito u twe vamwe omukumo noku va yambidida.

23. Metwokumwe naJesaja 41:10, 13, Jehova okwa udaneka oku tu ningila shike?

²³ Onghalamwenyo mounyuni ou tau pangelwa kuSatana otai dulu okukala ya djuupala neenghono, nomafimbo amwe ohatu kala twa wililwa po. (2 Tim. 3:1) Ashike inatu pumbwa okukala tu na oshisho ile twa tila. Jehova oku shii eenghalo odo hatu piti mudo. Ngeenge twa pumbwa ekwafo, okwe tu udanekela kutya ote ke tu kwata neke laye lokolulyo enaenghono. (Lesha Jesaja 41:10, 13.) Tu na elineekelo kutya ote ke tu yambidida, ohatu dulu okumona eenghono okudja mOmishangwa nohatu ka finda eshongo keshe.