Inda koshikalimo

Ombiibeli otai ti ngahelipi kombinga yokuyandja?

Ombiibeli otai ti ngahelipi kombinga yokuyandja?

Enyamukulo lopaMbiibeli

Ombiibeli otai tu ladipike tu kale hatu yandje kuvamwe tashi di komutima, hatu shi ningi nelinyengotomheno liwa. Okuyandja kwa tya ngaho, ihaku etele ashike ouwa omunhu oo ta pewa, ndele nafye ava hatu yandje ohatu mono mo yo ouwa. (Omayeletumbulo 11:25; Lukas 6:38) Jesus okwa ti: “Okuyandja ohaku eta ehafo shi dulife okupewa.” — Oilonga 20:35.

 Okuyandja kulipi haku hafifa Kalunga?

Kalunga oha kala a hafa, ngeenge hatu yandje nehalo liwa. Ombiibeli oya ti: “Keshe umwe na yandje ngaashi a tokola momutima waye, hanomunyengutima ile kefininiko, osheshi Kalunga oku hole ovo hava yandje nehafo.” — 2 Ovakorinto 9:7.

Okuyandja tashi di komutima oku li oshitukulwa ‘shelongelokalunga,’ olo la hokiwa kuKalunga. (Jakob 1:27) Omunhu, oo ha yandje nehalo liwa kwaavo ve li momhumbwe, oha hafifa Kalunga. Kalunga oha tale ko okuyandja kwa tya ngaho a fa oye a pewa omukuli. (Omayeletumbulo 19:17) Ombiibeli oya popya kutya Kalunga oye mwene ha alulile nakuyandja. — Lukas 14:12-14.

 Okuyandja kulipi ihaku hafifa Kalunga?

Ngeenge to yandje nomalinyengotomheno okulihola mwene. Oihopaenenwa yaasho oya kwatela mo:

  • Opo u limonikife kovanhu. — Mateus 6:2.

  • Opo u ka alulilwe sha. — Lukas 14:12-14.

  • Okukendabala u yandje opo u ka xupifwe. — Epsalme 49:6, 7.

Ngeenge okuyandja otaku yambidida oilonga, ile oikala, oyo ya tokolwa kuKalunga. Pashihopaenenwa, otashi ka kala sha puka okupa umwe oimaliwa a ka ndobole, a longife oingangamifi, ile a longife nai oikolwifa. (1 Ovakorinto 6:9, 10; 2 Ovakorinto 7:1) Sha faafana, kashi li mondjila okuyandja kuumwe, oo ta dulu ngeno okulifila oshisho ye mwene, ashike ina hala okulonga. — 2 Ovatessaloniki 3:10.

Ngeenge otaku i moshipala oshinakuwanifwa osho omunhu a pewa kuKalunga. Ombiibeli oya popya kutya omitwe doukwaneumbo odi na okufila oshisho eemhumbwe domaukwaneumbo ado. (1 Timoteus 5:8) Itashi ka kala shi li mondjila ngeenge omutwe woukwaneumbo otau yandje shihapu kuvamwe, ofimbo oukwaneumbo wao tau mono oixuna. Sha faafana, Jesus okwa li a tokola ovo hava anye okufila oshisho ovadali vavo ovanamido tave lipopile kutya ashishe osho ve na, “oshali ya yapulilwa Kalunga.”— Markus 7:9-13.