NADISENIO KADI?
Ti Payak ti Kulibangbang nga Agagsep iti Lawag
TAPNO maksayan ti panagdepende ti tao kadagiti fossil fuel (hydrocarbons, nangruna ti karbon, natural gas, a timmaud manipud kadagiti tedda dagiti natay a mulmula ken animal), magagaran dagiti sientista a pasayaaten ti kinaepektibo dagiti instrumento a mangagsep iti enerhia nga aggapu iti init. Kuna ti maysa kadakuada, “Ti solusion iti daytoy a problema ket mabalin nga . . . agtaytayab la gayam iti sanguanantayo.”
Usigem: Tapno mapagtalinaed dagiti kulibangbang a nabara ti bagida iti tiempo ti lam-ek, iyukradda dagiti payakda iti kainaran wenno kainitan. Dagiti payak ti dadduma a kita ti swallowtail ket nakaal-alisto nga agsagap ken agagsep iti lawag ti init. Saan laeng a ti nangisit a kolor dagitoy nga insekto ti sekreto, no di ket ti estruktura ti nagbabassit ken agrurutap a siksik a nakakalupkop kadagiti payakda. Naglaon met dagiti siksik kadagiti aglilinia nga abut a kasla rara iti balay ti uyokan. Nasinasina dagita babaen kadagiti balinsuek a sukog-V a pingir a mangiturong iti lawag kadagiti abut. Daytoy nagsayaat nga estruktura ti agsagap iti lawag ti init isu a dagiti payak ket nakangisngisit ken nakaal-alisto a mangpabara iti kulibangbang.
“Dagiti payak ti kulibangbang ket mabalin a karaman kadagiti kararasian nga estruktura iti nakaparsuaan,” kuna ti Science Daily, “ngem nagsayaat nga inspirasion dayta dagiti managsirarak tapno makaaramidda iti baro a teknolohia a mangdoble iti produksion ti hydrogen gas
Ania ti makunam? Babaen kadi iti ebolusion a timmaud ti estruktura ti payak ti kulibangbang a mangagsep iti lawag? Wenno nadisenio dayta?