Manipud Kadagiti Agbasbasa
Manipud Kadagiti Agbasbasa
Dagiti Naandur a Mikrobio Kaay-ayok a basaen ti magasinyo. Ti serye a “Dagiti Naandur a Mikrobio—Sangalubongan a Peggad” ti nangruna a nagustuak. (Oktubre 22, 2003) Kayatko unay ti maaddaan manen iti magasinyo ken makipagadal iti Biblia kadagiti Saksi ni Jehova.
Y. G., Russia
Kinalatak Dagiti Nagannak Agyamanak unay iti artikulo nga “Agimtuod Dagiti Agtutubo . . . Kasano a Maliklikak ti Kinalatak ti Dadakkelko Tapno Makaaramidak iti Bukodko a Pakabigbigan?” (Oktubre 22, 2003) Ni tatangko ket maysa a panglakayen iti kongregasion dagiti Saksi ni Jehova, ken kanayon idi a maibilangak a mapagwadan. Pampanunotek idi ti agrebelde tapno makaaramidak iti bukodko a pakabigbigan. Gapu iti daytoy nga artikulo, naammuak a pagbabawyakto met laeng no aramidek dayta. Maamirisko itan a nasken nga agaramidak iti bukodko a pakabigbigak iti kongregasion ken agtignayak a gagangay.
L. D., Francia
Maawatak ti rikna dagiti agtutubo a nadakamat iti artikulo. Madanaganak unay idi agsipud ta nagdakkel ti namnamaen kaniak dagiti kakongregasionko. Ngamin, nalatak ni tatangko ken ti ulitegko. Ti apeliedomi ket kayarigan ti etiketa ti maysa a produkto a kakuykuyogko latta iti sadinoman a papanak. Kas man la napaayak no diak matungpal dagiti namnamaenda. Ngem ita, ammokon a ti panangmatmat kadatayo ni Jehova ti kapatgan.
S. S., Japan
Nagan ti Dios Idi tawen 1983, inggatangak dagiti annakko iti libro maipapan iti Hawaii. Sigun iti dayta, idi agarup 1800, ti asawa ti pangulo inkasabana ti maipapan iti Diosna a ni Jehova. Ditoy Slovakia, a sosialista idi a pagilian, manmano a mabasa ti nagan ti Dios iti naipablaak a literatura. Adu met a tawenen a dimi ammo no kasano a ti asawa ti pangulo naikasabana ti nagan ti Dios iti daydi a tiempo. Isu nga idi nabasami ti artikulo a “Ti Nagan ni Jehova iti Pacifico” (Oktubre 22, 2003), naragsakankami a nakaammo iti panangilawlawagna.
E. G., Slovakia
Misionero Idiay Africa Apresiarek ti pakasaritaan ti biag ni Ernest Pandachuk a “Ti Pamuon ti Makapnek a Biagko.” (Oktubre 22, 2003) Nadumaduma ti problemak, kas iti panagsolsolok a mangbibiag iti barok ken ti panangibturko iti nakapuy a pammagik. Ngem awan kaimudingan dagiti parikutko iti mapaspasaran ti dadduma a Kristiano a kakabsattayo idiay Africa. Ti artikulo tinukayna ti pusok ken nagutugotak a mangmennamenna iti kari ni Jesus a masarakan idiay Mateo 6:33 nga aywanan ni Jehova dagidiay mangyun-una iti Pagarianna.
M. C., Russia
Panangmatmat iti Lubong Kayatko nga iyebkas ti panagyamanko iti benneg a napauluan iti “Panangmatmat iti Lubong.” Dayta ti umuna a basaek iti Agriingkayo!, ket segseggaak a makita dagiti ilustrasion. Dagiti drowing ti mangparparegta kaniak a mangbasa kadagiti suheto a gagangay a diak unay kaay-ayo. Kas pagarigan, anian a nakaay-ayat ti ababa a padamag iti Oktubre 22, 2003, a ruar maipapan iti “Dagiti Naarimbangaw nga Ikan”!
N. N., Estados Unidos
Iti “Pangsalaknib iti Lamok” a padamag ti “Panangmatmat iti Lubong” (Agosto 8, 2003), dinakamatyo ti maysa a report a nangisingasing iti panagtomar iti “300 a miligramo a bitamina B1 iti kada aldaw.” Makadangran iti bagi ti inaldaw a panagtomar iti kastoy a kaadu.
H. M., Japan
Sungbat ti “Agriingkayo!”: Saan nga agtutunos dagiti autoridad no kasano kaadu a bitamina B1 (thiamine) ti makadangran. Dadduma ti mangisingasing iti inaldaw a panagtomar iti 1.1 a miligramo. Nupay kasta, kinuna ti maysa a damag nga impablaak ti World Health Organization a sigun iti dadduma a report, “natakuatan a saan a makasabidong ti panagtomar iti 500 a miligramo iti kada aldaw iti las-ud ti makabulan.” Nupay kasta, sigurado nga ad-adunto pay ti maaramid a panagsirarak maipapan iti daytoy a suheto.