Panangisuro​—Pannakapnek ken Rag-o

“Ania ti mamagtultuloy kaniak nga agisuro? Nupay narigat ken makapaksuy ti agisuro, no makitak a maragsakan nga agsursuro ti amin nga ubbing ken makitak a lumaingda, matignayak nga agtultuloy nga agisuro.”​—Leemarys, maestra idiay New York City.

NUPAY adda dagitoy amin a problema, pakalappedan, ken pakaupayan, agtalinaed ti minilion a mannursuro iti intero a lubong iti pinilida a propesion. Ket ania ti mangtignay iti rinibu nga estudiante a mangikagumaan tapno agbalinda a kualipikado a mannursuro idinto ta ammoda a mabalin a didanto maipaayan iti umno a pannakabigbig? Ania ti mamagtultuloy kadakuada?

Inlawlawag ti maysa a maestra a Ruso a ni Inna: “Makaparagsak a makita a nataenganen dagiti dati nga estudiantem. Mangngegmo ti panangibagada a talaga a nabenepisiaranda iti nasursuroda kenka. Makaparegta no ibagada a maragsakanda a manglagip kadagiti tawen a pannakikaduada kenka.”

Kinuna ni Guiliano, a naadaw kadagiti napalabas nga artikulo: “Maysa kadagiti kadakkelan a pakaragsakak isut’ pannakaamirisko a nagballigiak a nangtignay iti interes dagiti estudiantek iti maysa a tema. Kas pagarigan, kalpasan nga inlawlawagko ti maysa a punto iti history, kinuna ti dadduma nga estudiante: ‘Diyo isardeng. Agestoriakayo pay!’ Dagitoy natural nga ebkas mabalin a paragsakenna ti naliday a bigat idiay eskuelaan agsipud ta maamirismo a natignaymo dagiti agtutubo kadagiti banag a baro kadakuada. Makaparagsak a kitaen ti langa ti rupada no naragsak dagiti matada agsipud ta naawatanda ti tema.”

Kinuna ni Elena, maysa a maestra idiay Italia: “Patiek a masansan a mapnekak kadagiti babassit a mapasamak iti kada aldaw, ti babassit a panagballigi dagiti estudiante imbes a dagiti agkakapateg a resulta, a manmano a mapasamak.”

Kinuna ti nasurok a 30 anyosen nga Australiana a ni Connie: “Makagunggona unay no ti maysa nga estudiante a nakasingedmo iti panageskuelana ket makapagsurat tapno iyebkasna ti panangapresiarna kadagiti panangikagumaam.”

Kasta met laeng ti rikna ni Oscar, a taga Mendoza, Argentina: “Mariknak a talaga a makagunggona no masabatko dagiti estudiantek iti kalsada wenno iti sadinoman a lugar ket ipakitada ti panangapresiarda iti insurok kadakuada.” Kinuna ni Angel a taga Madrid, España: “Awan duadua a ti kadakkelan a pakapnekak iti panangipaayko iti sumagmamano a paset ti biagko iti daytoy nagsayaat ngem narigat a propesion ket ti pannakakitak a nagbalin a nalinteg a lallaki ken babbai dagiti agtutubo a sinursuruak idi, a dadduma kadagita ti resulta ti panangikagumaak.”

Kinuna ni Leemarys, a naadaw iti pangrugian: “Talaga a mariknak a naisangsangayan a tattao dagiti mannursuro. Naisangsangayankami met gapu  iti panangibaklaymi iti nakaskasdaaw a nagdakkel a responsabilidad. Ngem no adda maaramidmo a naimbag a pagbalbaliwan​—ti sangapulo man nga ubbing wenno uray maysa laeng​—nairingpasmo ti trabahom, ket daytat’ kasayaatan a rikna. Maragsakanka a mangaramid iti trabahom.”

Nagyamanka Kadin Kadagiti Mannursurom?

Kas estudiante wenno ama ken ina, nagyamanka kadin iti maysa a mannursuro gapu iti panawen, panangikagumaan, ken interes nga impakitana? Wenno nakaipatulodka kadin iti kard wenno surat a nangyebkasam iti panagyaman? Nainkalintegan ti imbaga ni Arthur a taga Nairobi, Kenya: “Sumayaat met dagiti mannursuro gapu iti komendasion. Ti gobierno, dagiti nagannak ken estudiante rumbeng a pagraemanda unay ida ken ti serbisioda.”

Insurat ti maysa nga autor ken maestra a ni LouAnne Johnson: “Para iti tunggal mangbabalaw a surat a maawatko maipapan iti maysa a mannursuro, adda sangagasut a pammadayaw a maawatko, a mangpatalged iti panamatik nga ad-adu pay laeng dagiti naimbag a mannursuro ngem kadagiti dakes.” Makapainteres ta adu a tattao ti mangtangdan pay ketdi iti detektib a “tumulong kadakuada a mangbirok iti dati a mannursuroda. Kayat dagiti tattao a masarakanda dagiti mannursuroda tapno agyamanda kadakuada.”

Dagiti mannursuro ti mangisaad iti pamuon ti edukasion ti maysa a tao. Uray dagiti kalainganen a propesor kadagiti maidaydayaw nga unibersidad ket nakautang kadagiti mannursuro a nangipaay iti tiempo ken panangikagumaanda a nanggutugot ken nangpatanor iti tarigagayda nga agadal, maaddaan iti pannakaammo, ken pannakaawat. Kuna ni Arthur, a taga Nairobi: “Adda tiempo iti biag ti amin a nangato nga opisial iti publiko ken pribado a sinuruan ida idi ti maysa a mannursuro.”

Anian a panagyamantayo kadagita a babbai ken lallaki a nangtignay iti panagreggettayo, a nanggutugot iti isip ken pusotayo, a nangipakita kadatayo no kasano a mapennek ti panagtarigagaytayo iti pannakaammo ken pannakaawat!

Ad-adda pay koma nga agyamantayo iti Naindaklan nga Edukador a ni Jehova a Dios, a nangipaltiing iti sasao ti Proverbio 2:1-6: “Anakko, no awatemto ti sasaok ket idulinmo kenka dagiti bukodko a bilin, tapno ti sirib ipangagmo babaen ti lapayagmo, iti kasta mapagannayasmo ta pusom iti panangilasin; mainayon pay, no agpukkawka maipaay iti mismo a pannakaawat ket iyesngawmo ti timekmo maipaay iti mismo a panangilasin, no itultuloymo a sapulen dayta kas iti pirak, ken kas kadagiti nalmeng a gameng itultuloymo a biroken dayta, iti kasta maawatamto ti panagbuteng ken Jehova, ket masarakamto ti mismo a pannakaammo iti Dios. Ta ni met laeng Jehova mangted iti sirib; manipud ngiwatna adda pannakaammo ken panangilasin.”

Paliiwem ta ti kondision a “no ” ket mamitlo nga agparang iti dayta mamagpanunot a teksto. Amirisem, no situtulok nga awatentayo ti karit, ‘masarakantayo ti mismo a pannakaammo ti Dios’! Sigurado a dayta ti kasayaatan iti amin nga adal.

[Kahon iti panid 13]

Maysa a Naragsak nga Ina

Ti sumaganad a surat ti naawat ti maysa a mannursuro idiay New York City:

“Manipud iti kaunggan iti puso ken kararuak, kayatko ti agyaman kenka gapu iti naaramidam kadagiti annakko. Gapu iti panangaywanmo, kinamanangngaasim, ken ti laingmo, natulongam ida a mangragpat kadagiti nangato a kalat a siguradoak a mabalin a dida koma pulos a naragpat no awanka. Pinagbalinmo dagiti annakko a pagpannakkelko unay​—kapadasan a diakto pulos malipatan. Naimpusuan unay, S. B.”

Adda kadi am-ammom a mannursuro a mabalinmo a paregtaen?

[Ladawan iti panid 12]

‘Makaparagsak a kitaen ti langa ti rupada no naragsak dagiti matada agsipud ta naawatanda ti tema.’​—GIULIANO, ITALY

[Dagiti Ladawan iti panid 13]

‘Makagunggona unay no ti maysa nga estudiante ket nakapagsurat tapno iyebkasna ti panangapresiarna kadagiti panangikagumaam.’​—CONNIE, AUSTRALIA