IBILANGMO KADI TI BAGIM A NARAGSAK? No wen, apay? Gapu kadi iti pamiliam, trabahom, patpatiem? Baka padpadaanam ti maysa a banag a mangparagsak kenka, kas iti panaggraduarmo, pannakaadda iti nasayaat a trabaho, wenno baro a lugan.

Adu a tattao ti maragsakan no magaw-atda ti arapaapda wenno maalada ti kayatda. Ngem kasano kapaut dayta a ragsak? Kaaduanna, temporario laeng dayta isu a makapadismaya.

Nadeskribir ti kinaragsak kas maysa a nasayaat a kasasaad a mabalin nga agpaut ken ramanenna ti pannakarikna iti narabaw a pannakapnek agingga iti napalaus a rag-o, ken ti panagtarigagay nga agtultuloy dayta.

Kasta met, gapu ta agtultuloy dayta a nasayaat a kasasaad, naikuna a ti kinaragsak ket saan a destinasion no di ket maysa a panagbiahe. No ibagatayo, “Naragsakak inton . . . ” kasla itantantantayo ti kinaragsak.

Kas ilustrasion, kitaentayo ti pagpadaan ti kinaragsak ken ti nasayaat a salun-at. Kasanotayo a maaddaan iti nasayaat a salun-at? Surotentayo ti nasayaat a rutina iti pannangan, ehersisio, ken nasayaat nga estilo ti panagbiag. Kasta met, naragsaktayo no addaantayo iti nasayaat a kabibiag a maitunos kadagiti nasayaat a prinsipio.

Ania dagiti prinsipio wenno kualidad a ramanen ti kinaragsak? Nupay napatpateg ti dadduma kadagiti sumaganad, dakkel ti maitulong amin dagitoy:

• KINAKONTENTO KEN KINAPARABUR

• SALUN-AT KEN KINAANDUR

• AYAT

• PANANGPAKAWAN

• PANGGEP ITI BIAG

• NAMNAMA

Kuna ti mararaem a libro a napno iti sirib: “Naragsak dagidiay awan pagkuranganna iti dalanda.” (Salmo 119:1) Adalentayo ita dayta a dalan.