Patgenmi nga Agbasa:

“Umayka agbalinka a pasurotko.” (Marcos 10:21) Saan laeng a ti kasasaona idi ti aw-awisen ni Jesu-Kristo nga agbalin a pasurotna no di ket uray datayo. Ipangpangagmo kadi ti awisna? Dakkel ti maaramidanna iti biagmo ti panagbalinmo a pasurotna. Apay?

Imbaon ni Jehova ditoy daga ti bugbugtong nga Anakna tapno itedna ti biagna kas subbot. (Juan 3:16) Malaksid iti ipapatayna maipuon kadatayo, impakita kadatayo dayta nga Anak no kasano ti agbiag. Iti amin nga inaramidna, nagtalinaed a natarnaw ken pinaragsakna ti puso ni Amana. Impakita met kadatayo ni Jesus no kasano ti agbalin a kas ken Amana. Dagiti sinao ken inaramid ti Anak naan-anay nga inyanninawda dagiti wagas ken ti pagayatan ti Ama.​—Juan 14:9.

Kuna ti Biblia a maysa ni Jesus a “pagwadan tapno sisisinged a surotentayo dagiti addangna.” (1 Pedro 2:21) No kayattayo ti agbalin a nasingsinged ken ni Jehova, no kayattayo nga agbalin a pudpudno a makapnek ti biagtayo ita, ken no kayattayo ti agtalinaed iti dalan nga agturong iti biag nga agnanayon, masapul a surotentayo a naimbag dagiti tugot ni Kristo.

Tapno maaramidtayo daytoy, nasken nga ammuentayo pay a naimbag ti maipapan iti biag ni Jesus ditoy daga. Rumbeng ngarud nga usigentayo a nalaing ti pakasaritaan ni Jesus a nailanad iti Biblia. Ad-adda a nalawag kadatayo no kasano ti agbalin a pasurotna no utobentayo dagiti sinao ken inaramid ni Jesus ken no panunotentayo no kasano a matuladtayo iti sao ken aramid.

Sapay koma ta tulongannaka daytoy a libro a mangparayray iti ayatmo kada Jesus ken Jehova. Ket tignayennaka koma dayta nga ayat a mangsurot a naimbag kadagiti tugot ni Jesus tapno maparagsakmo ti puso ni Jehova ita ken iti agnanayon.