1. Maysa kadagiti umuna a nailista a karaman kadagiti destiero a nagsubli idiay Jerusalem a kadua da Zorobabel ken Jesua manipud Babilonia. (Esd 2:1, 2) Nehum ti nailanad a naganna iti Nehemias 7:7.

  2. Maysa a padi a nailista a karaman kadagidiay nagsubli a kadua ni Zorobabel. (Ne 12:1, 3) Gapu iti simple a panagsisinnukat dagiti Hebreo a letra dayta a nagan, isu ti naawagan iti Harim iti Nehemias 12:15 ken iti dadduma pay a paset.​—Kitaenyo ti HARIM Num. 1.

  3. “Kangrunaan nga opisial ti gobierno” (ti Imperio ti Persia) a maipagarup a nagtaeng idiay Samaria ken indauluanna ti pannakaaramid ti maysa a surat ken Ari Artaxerxes a siuulbod a nangakusar kadagiti Judio mainaig iti panggepda a panangibangon manen iti Jerusalem. Kas sungbat ti imperio, naibilin ken Rehum ken kadagiti kakaduana a mapanda idiay Jerusalem ket puersaenda a pasardengen ti trabaho a panagibangon dagiti Judio. (Esd 4:8-24) Ngem di nagbayag kalpasan dayta, ginutugot da Haggeo ken Zacarias nga ituloy dagiti Judio ti panagibangonda, nga idi kamaudiananna inanamongan dayta ti Persia idi narepaso ti orihinal a bilin ni Ciro.​—Esd 5:1–6:13.

  4. Maysa a Levita nga anak ni Bani a timmulong a nangtarimaan iti pader ti Jerusalem.​—Ne 3:17.

  5. Ti pannakaulo ti maysa a pamilia a nagbiag kalpasan ti pannakaidestiero. Mabalin nga isu wenno ti pannakabagina ti nangpatalged iti tulag ti kinamatalek  bayat ti kinagobernador ni Nehemias.​—Ne 10:1, 14, 25.