[nagtaud iti sao a kaipapananna ti “serpiente”].

 Panguluen ti tribu ni Juda idiay let-ang. Ni Naason ket anak ni Aminadab ken karaman  iti kaputotan a maikalima a nailista kalpasan ni Juda. (1Cr 2:3-10) Kabsatna ti asawa ni Aaron. (Ex 6:23) Ni Naason ket paset ti linia ti kapuonan da David ken Jesus, ta isu ti ama ni Salmon, a nangasawa ken Rahab, ken isu ti apong ni Boaz, a nangasawa met ken Ruth.​—1Cr 2:11-15; Ru 4:20; Mt 1:4-6, 16; Lu 3:32.

 Kas panguluen ti Juda a kangrunaan a tribu ti Israel, tinulongan ni Naason ni Moises iti damo a panangilista kadagiti lallaki a mannakigubat idi addada idiay let-ang. Nangidatag iti kontribusion iti panagserbi iti tabernakulo idi nainaguraran ti altar, ket indauluanna ti buyot ti Juda nga agdagup iti 74,600, nga adda iti makinsango a linia iti panagmartsa ti Israel.​—Nu 1:2-7; 2:3, 4; 7:2, 11-17; 10:14.